E toe faatalofa atu i le paia ma le mamalu o si o tatou atunuu i lenei foi vaiaso. Faamalo atu le folau manuia ma le lagi e mama. E iai le talitonuga o loo tua pea i manu le faigamalaga a si o tatou atunuu ona o le tausiga alofa a lo tatou Alii.
E fiafia foi e toe faatalofa atu i paaga masani ma le mamalu o le aufaitau a le Samoa Times, o e o loo fiafia pea e talia mai le tautua atu a le Pulega ma le Aufaigaluega a le tatou nusipepa i lea vaiaso ma lea vaiaso.
Ua manatu e fia faasoa atu i lenei foi vaiaso i se lagona e faapea, “Aua e te faamasino atu”. Ua mafua ona tupu mai se augofie e faasoa atu i le tulaga lea ona o le natura o le soifuaga e poia ai le toatele o tatou i aso faisoo. O le natura e pei e faigofie ona tusitusi lima i nai tagata ua sese ma faaletonu foi ni isi o a latou filifiliga i ni vaega ua vaivai ai.
O le fesili, Aisea lava e faigofie ai ona afe i manatu le tulaga tau faamasino atu? O ni isi ua fai lava ma mea sumalie i le soifuaga le fiafia lea e faitio ma tuuai le leaga i le isi uso a tagata. E pei o se vaisu ia te ia lea vaivaiga, aua ua pei o se natura sa ola ma masani mai ai o le talanoa lea ma feaveai tala e olopalaina ai le tagata ua agasala ma ua faia o se gaioiga sese.
O ni isi foi e fiafia e talanoa i ai e pei o se tala malie, ae faaataata lafoga lava ae faitala oo ma fanau mai ai le loto tiga i se ua afaina. E fia tatai le manatu o le Tusitala i le saunoaga a Iesu ina ua momoli atu iai le faitioga e ala i le fafine e pei ona taua i le Tusi Paia.
Fa i latou na faitio atu ua o latou maua tonu lava i le avanoa e tausalaina ai Iesu aua o le a leiloa pe o le a sana tala o le a tali mai ai i le moliaga o lenei tina. Peitai o le faliu o Iesu ma tali atu i upu nei, “A iai se isi e leai sana agasala ia togi ia sana maa”. Na lava a lena saunoaga e tau atu ai i tagata na o latou molitaiina mai le tina agasala, le ituaiga tagata e iai Iesu.
Ae o le a se feau taua o loo tatou maua mai ai i lea vaaiga? E faigofie ia i tatou ona talia le tagata ua sese ma faaletonu i le alofa faale-Atua.
O le sese ma le faaletonu, o natura ia o le olaga.
E iai lava nei vaega e fai ma tofotofoga ma faaosoosoga i le soifuaga o loo tatou aumau ai. E leai se isi e fia oo i ai, e leai foi se tasi e manao e latalata i ai. Ae mafua ona aafia ai le soifua ina ua toilalo i faaosoosoga a le fili ma faiaina ai.
O ni isi foi tagata e mamao lava ma talitonuga o le a aafia i ni tulaga vaivai o le soifuaga, peitai o ni faaletonu lemafaufauina ua mafua ai ona palasi atu a latou faaiuga i vaega e tauvalea ai. Sa faalogologo le Tusitala i se talanoaga a ni tama se toalua sa faia i le vaiaso na tea nei ma talanoaina ai se tasi o Auauna a le Atua o loo tuli lona faasalaga i le toese ona o se solitulafono sa ia faia.
Na lagona lava le agaga faagaeetia ina ua faapea se tasi o tama, “O au ia ou te alofa isi auauna ona ua faaletonu foi i lona valaauina, ae talosia ia toe fuataina lona mafaufau i le nofoaga o loo iai ma ia tumau pea i le Alii ma lona valaauina”.
Na ese lava le tulaga na oo i ai se lagona ona o le manatu e faaalia mai i le alofa. E sau lava e oo i le loto. E mafua ona papai i le loto ma le agaga, ona o loo afifi mai ai se feau taua, atoa ai foi ma se aoaoga e fai ma luitau ina ia aua nei toe oo i ai i lea tulaga.
O le faatupu manatu i lenei vaiaso e fia luitauina ai pea lau faitau e faaupuina faapea: “O fea ea o iai le mapusaga mo e ua vaivai ma tausalaina”. Atonu o le a taoto atu lena fesili pe o le a sou finagalo i ai. Ae i le Peni lava ia a le Tusitala e mafai ona faapea atu, e tua lena tagata ia te oe ma au o le ua iai le alofa e sapasapaia ai se ua faaletonu.
O le upu a Toilolo e manatua ma ola pea e pei ona pepese ai le atunuu ina ua agaleagaina o ia e lona uso sa ia faapea ai: “Aua nei galo e a oe nei ae a au taeao”.
O le uiga o lea tala e tatau lava ona o tatou faaeteete ma faalagolago pea i le Atua, ae aua tatou te faitio aua e leiloa lava pe e te sao nei, ae e faaletonu taeao.
Ae amuia oe pe afai e fai oe ma faaola totoga i se ua mafatia ona o vaivaiga o le soifuaga. Amuia oe pe afai o lau fautua ma lau faamalosiau o le a toe fuataina ai se isi taeao ma se isi moemoe fou i le soifuaga ma le ola o se o loo faapea ona tiga mai i ni sala sa ia faatino.
E leai lava se isi e leai ni ona sese. Ae o le tatou galuega o le taliaina lea o le tagata ua tausalaina faatasi ma la tatou timai i vaega e feluitauina ai ina ia toe faasaga sao ai le taumua o lona vaa a o tatou iai i lenei lalolagi o loo tatou folau ai.
Aua tatou te faamasino atu, aua o le upu lena a le Tusi Paia, ina nei faamasinoina mai foi i tatou. Ae lelei lo tatou alolofa pea i e ua faaletonu, e alofagia mai ai foi i tatou, e le gata i tagata, ae o lo tatou Alii lo tatou Atua, aua o Ia o le alofa fua lava lea.
Ia manuia tele lenei vaiaso ma galuega o le a feagai ai.
Soifua
