Peni a le Tusitala 16 Novema 09

Ae ou te lei soaina le lualoto nai le Faletolu o Sagaga ma le Faleono o Leatiigaga, pe ou te utu pupu foi i le vai nai Mulinuu ma Nuuausala, e muamua ona ou faatulou atu Samoa faigata o oe o le Aomamala. O ou paia ma ou mamalu o le a nuunuu atu faatini o tausala aua e leai se poto ma se vave e na te talatalaina faafue lavelave, aua o paia lava mai le amataga seia oo atu i le gataaga. Ae avea ia o lenei taimi ou te faatalofa atu ai i le paia ma le mamalu o Samoa i lenei foi vaiaso i le suafa manumalo o Iesu Keriso. Faatalofa atu ia outou susuga i faafeagaiga ma outou faletua. Faatalofa atu foi i le paia i tupu ma tamalii, o faleupolu ma failauga, faletua ma tausi, aumaga ma aualuma, ma le loaloa o Samoa i ona tulaga faalupelupeina. Faamalo atu le soifua manuia ma le lagi e mama i la outou tapuaiga malu i tuaasinasina o loo faia pea le faiva o le taputapuai mai i maota ma laoa, a o alofaiva foi Samoa i ona tiute faatino ma faiva alofiaao i lea vaiaso ma lea vaiaso aua lava le tautuaina o si o tatou atunuu, ia ma lenei foi Malo o loo ua outou soifua ma o tatou aumau ai.
Ua logo tulimanu e fia o le atunuu i le tala e pei ona iai le faalavelave i le pasi lea sa lavea faafuasei i le afioaga o Solosolo i le vaiaso na tuanai atu nei, lea ua faamaonia mai le fuainumera e toavalu i latou ua maliliu ma avea ai lo latou soifua. O isi o loo manunua mitimiti, o isi foi o loo manunua tuga, ma isi o loo taufao ai le mai ma le magalo i lo latou soifua pe a tua ma ni a togafitiga a alii ma tamaitai fomai o loo galulue ai. O lenei tala faanoanoa ua manatu le Tusitala ua toe faaopoopo mai foi i le avega a le atunuu o loo amo nei, e ala lea i mafatiaga o le sunami lea na maliliu ai le tele o soifua. Peitai e iai le eseesega o nei faalavelave e pei ona tulai mai.
O le sunami o se vaega o faalavelave faalenatura e faigata ona talanoa ma se isi. E moni lava foi e iai ona faailoilo ina ia mafai ai ona tapena tagata ma nofo sauni ai e talia lona oo mai, ae faigata lava ona tetee pe fai foi iai se loto o se tasi aua o le mea mautinoa o gasologa o le siosiomaga ma le natura o le foafoaga o mea sa faia e le Atua, e leai la se isi e au, pe oo i ai lona malamalama. Peitai o le faalavelave sa tulai mai e ala lea i le lavea ma le mafuli o le pasi, o se faalavelave e mafai tele ona puipuia mai i lona tulaga e oo lea i ai. I se isi faaupuga o se faalavelave sa le tatau ona tupu.
E oo mai i le taimi nei o loo tausaili pea le mafuaaga o lenei faalavelave. Na pau le mea ua mautinoa o lea ua maliliu le toatele ma faamanualia. Ae i le taimi nei, o lea foi ua i aao o leoleo le sa aveina le pasi, lea na mafua ai ona tulai mai lenei faalavelave matuia.
O tala ua oo mai e pei ona lipotia ma faamatalaina mai e le au tusitala mai Samoa, o loo taua ai na mafua lenei faalavelave ona ua saoasaoa tele le alu a le pasi. O le isi foi itu, o loo taua i faamatalaga a nisi, o le alii lea sa avepasi, sa tulai mai ai se faalavelave muamua i se tasi foi o pasi na lavea i le afioaga o Vaoala ma sa maliu ai foi se tagata se toatasi. Afai ae faamaonia mai nei molimau, o lona uiga e matua ofo lava le agaga ona o le mafai e lenei alii ona toe maua lana laisene e pei ona toe faaauau ai lana galuega faaavepasi. I le isi foi itu, e matua ofo lava le loto ona o le le aoaoina mai e lenei lava alii o se lesona taua o lona olaga mai le faalavelave sa tupu muamua pe afai ae sao nei faamatalaga. Na pau le tulaga ua oo mai, o loo momoli mai i lenei faalavelave se feau taua tele ma le aoga mo i tatou uma. O le fesili la o le a lea feau?
O le mea muamua, e ao lava ina aoga mea tutupu muamua i o tatou olaga e fai ma lesona tauave e tua i ai le lumanai. Afai sa lavea muamua se pasi i lenei alii ona o le saoasaoa ma le faatamala, sa tatau lava ona ia manatua lea faalavelave e faamanatu mai ai pea ia te ia le taua o le alu alu lemu ma ia faautauta. E iai le fuaitau faa-Peretania e faapenei, “Only a fool will never listen”.
O lona uiga pe a faamatalaina, e na o le vale e le faalogo. E mafai foi ona faapea e na o le vale le aoaoina mai sana lesona taua i mea na tutupu. Ia manatua lelei, o lea e lei leva atu nei ona sui itu e feoai ai taavale i si o tatou atunuu. O le taimi nei e tatau lava ona faapalepale ma ia lava le faaeteetega e feoai ai tagata uma aua le saogalemu i luga o aualatele.
O le vaega lona lua, ia tautuana ma avepasi ma ave taavale laiti (taxi) ma soo se taavale lau pasese, o le soifua o le pasese lea o loo i ou aao. E tasi lava si ou ola sei tulou, ae o le pasese pe toalua ma sili atu lea o loo e tauaveina e tele atu o latou soifua nai lo oe, o lona uiga e tatau ona e matua mataala i le faatinoina o lau galuega. O le feau lea mo i tatou uma. E le gata i ave taavale laupasese, ae faapea foi oe lena o loo e faigaluega i soo se matata. Ia maua le faautauta e faatino ai tiute, e mautinoa e tua ai i le manuia.
Ia faamaise atu le Atua i aiga uma o soifua ua maliliu ona o lenei faalavelave. Ae mo le ave pasi ua faatamala, sauni ia lau susuga e tali i ou moliaga, o le mea ili e lei maua lau susuga e se tasi o pasese i le taimi na tupu ai le faalavelave, ia poo se isi foi o le afioaga.
Ia manuia galuega o lenei vaiaso ae tatou te feiloai pea.
Soifua