O le a ou le toe faloina le afaloloa pe ou te toe talatalaina le fuelavelave i ou paia Samoa leaga o le fue e talatalagata.
O Samoa lava ia o le atunuu ua uma ona totofi, e tala tau Toga ae tala tofi si o tatou atunuu.
O le mea lea o le a nuunuu atu ia faatini o tausala ou paia ma ou mamalu ae o le a le afea i se faamatalaga, tulou, tulou, tulou, tulouna lava.
Ae fiafia lava foi e avea lenei avanoa taua e faatalofa atu ai i le mamalu o Samoa i ona tulaga faalupelupeina. Faatalofa atu i susuga i Faafeagaiga o loo faatuna paulia ma faafalelemalu i soo se ekalesia o loo talafaauto ai aua le galuega paia a lo tatou Atua.
E faatalofa atu i afioga i Tapaau ma Aiga, o Faleupolu ma Failauga, o faletua ma tausi ma le malosi o si o tatou atunuu.
E faapitoa foi se faafeiloai atu i lenei vaiaso i tuaa sinasina o Samoa, aemaise ai lava i latou o loo ua pulapula lagoto le soifua afu ona o le tausiga a lo tatou Alii. Malo le soifua manuia ma le lagi e mama, faamalo foi le folau.
E iai lava le talitonuga e ui ina eseese vaega tatou te nonofo ai, eseese foi o tatou tiute faatino i lea aso ma lea aso, ae o loo taufai tutusa i tatou uma i le tausiga alofa ma le faamaoni a lo tatou Atua.
E le o toe po se lilo le tulaga sa alo atu ai Samoa i le vaiaso na tuanai atu nei e ala lea i le suiga e pei ona ua iai nei ona auala sei vaeane le mamalu i le aufaitau.
O lenei suiga sa lei faigofie aua sa tele i ai finagalo faaalia.
E le gata i lea ae sa faatulai mai ai foi se vaega na o latou matua teena malosi lenei suiga, e pei ona iai le faalapotopotoga a le PASS.
Sa le asa se aso ma le tulai mai o finagalo faalauaitele, o talanoaga i luga o leitio ma televise, ae le faitaulia ai nusipepa ma talanoaga i luga o auala, o totonu o faleoloa, o falesa, falesiva ma aiga. Sa matua iloga ona faatalanoaina ma soalaupule i manatu o tagata le suiga o auala.
O nisi lava latou te lagolagoina, ae o le toatele foi e matua le maluelue lava lo latou agaga le lagolagoina.
O le tele o nei manatu na iloga ai foi ona feteenai lagona o tagata lautele ona alu ai lea e pei o le taitaiga a le tauaso ma le pipili i nisi aua ua pei ua alu i taaiga ae ua leai sei vailiili lelei itu uma ona faaleo ai lea o finagalo.
O lea lava foi sa oo a ina saili i le faamasinoga pe o le a se faaiuga, ma iu ai ina faaleaogaina le itu a le au tetee ae manumalo pea le Malo.
E ui ina siisii taofi o i latou sa teena le suia o le itu e feoai ai taavale, ae sa toa lava le Malo ma le faaiuga na o latou faia. E lei vevesi vale pe gaoia e ui ina manatu le toatele o le a manumalo le PASS i le latou finau atu pea.
O le itu lelei sa maitauina, e lei maualalo le finau ma le tauivi o itu uma e lua. Na tau fai saili lava i auala ma vaega uma ina ia maualafia ai ona manumalo, e fai o i latou sa tetee, ae faapea foi i le Malo.
Samoa le atunuu pele, o le mea lea e uigaese ai Samoa i isi lava atunuu o le lalolagi.
E mafua mai ona o Samoa e faavae i le Atua, lea foi ua faavae ai ma faiganuu ma puleaga a alii ma faipule i totonu o afioaga.
E le gata foi i lea, ae o le tapuaiga malu i susuga i Faafeagaiga o loo le mapu lo latou tulivae pea i le ao atoa ma le po, aua le nonoina o ni manuia mo Samoa ma ona tagata.
O le a le tali faaaliali? A lea o loo tumau pea le filemu ia Samoa. E ui ina ave i luga ma toe aumai i lalo le mataupu i auala ae lei sii lava se taua pe ogaoga ni ona faafitauli e tutupu mai.
O le mea lea sa iloa ai, sa tauivi i mafaufauga ma le poto aoaoina, o le fefaaaliaiga o le atamai ma le silafia, ae sa mamao lava ma ni vevesiga e pei o le tele o isi atunuu e le o utuva le toto masaa ma le soifua avea.
E ui ina vevesi ma popole ina nei tulai mai ni faafitauli e ala i le lavevea o taavale, ae o lea o le a atoa le vaiaso o le suiga e leai lava ma se faalavelave o lipotia mai.
O lea foi sa lauga le Palemia ma momoli lana faafetai i tagatanuu o Samoa aemaise foi i latou sa teena malosi le mau ina ia aua nei suia auala.
O le a le ata ua vavala mai? A lea ua galulue faatasi lava tagata uma ina ia tausisia le saogalemu o Samoa mai nei popolega e pei ona sa atugalu ai.
Ia sagai ane laia ai o le tai. Ia taula pea i le Atua le tofa ma le faautautaga e manuia ai le alofaiva o si o tatou atunuu i le faatumauina o lenei foi tala faasolopito ua tusia i le talaaga o le lalolagi.
Tatou limalima faatasi ma galulue soosoo tauau e manuia ai le suiga o auala e pei ona ua iai nei. Aua e ui a ina tetele pesega, ae o lea lava ua matua lava i le oo.
Ia manuia le alofaiva i tiute ma galuega o le a feagai ai i lenei foi vaiaso i le alofa ma le agalelei o le Alii. Tatou feiloai pea.
Soifua
