O le a taoto pea ia paia ma mamalu o Samoa i ona tulaga faalupelupeina. O paia mai lava i le Tai Samasama o le Tuimanua seia paia Fili ma Puletuu na tauilo ai Malo. O paia e le toe tau faamamaluina e se tasi, mai lava i le faavavau seia oo i le faavavau.
Ae avea ia lenei avanoa taua ua toe maua i lenei foi vaiaso e momoli atu ai le faamalo i si o tatou atunuu pele Samoa. Faamalo atu le folau ma le onosai i faigata ma tiga o luitau o le soifuaga e pei ona luitauina ai i tatou.
I lena lua vaiaso ua tuanai atu sa lei mapu le tatou nofo taufai tatalo ma tuuina atu pea i le Atua si o tatou atunuu o Samoa a o feagai ai ma mafatiaga ona o galulolo sa lofia ai ni isi o nuu tumatafaga o si o tatou atunuu.
Sa lei faigofie ona taliaina nei mafatiaga ona o le toatele o soifua sa maliliu ai, ae le gata i lea o le toatele o i latou sa manunua. E tele ma anoanoai tala o lenei mafatiaga, ma o nei tala o le a le galo ae manatua pea. O le a sili ona le galo i tupulaga o fanauiti sa vaaitino i le taimi na tupu mai ai le galulolo.
E le gata ina o le a le galo, ae o le a fai lava lea ma taufaamatau i le vaai atu i le vasa, aua o le a pei le sami o se avega i le mafaufau talu ai le faalavelave na tulai mai.
E momoli le faafetai ma le faamalo isi o tatou atunuu ma le tulaga talisapaia o le faatagi mai o aiga o loo mafatia e ala i ni fesoasoani. E faafetai i le Malo Niu Sila i le Palemia ma ona taitai, ona o le tele o fesoasoani ua mafai ona faatino, amata mai lava i le taimi na tupu ai le faalavelave seia oo mai i le taimi nei. E faafetai foi i tagatanuu o Niu Sila ona ua le faailogaina se tasi i lenei taimi.
O papalagi ma tagata Asia, o Initia ma tagata Pasefika, ua taufai tutu mai e faailoa le valevale alofa ia Samoa a o feagai ai ma loimata o faanoanoaga ona o faalavelave faalenatura. E maeu le matamata atu i le televise ona o le taupati mai o tagata e lafo a latou tupe i nisi o faalapotopotoga o loo tuufaatasia ni isi o fesoasoani tau tupe.
E le gata foi i lea, ae o luga i leitio i le faalogologo atu i le toatele o i latou o loo ofoina atu le faitau fia ma fia o tupe e faimeaalofa ai i nai aiga o loo mafatia i Samoa.
E faafetai foi i taitai o le Malo Samoa i totonu o Niu Sila nei, aemaise ai o susuga i faafeagaiga ma Samoa potopoto ona e maoae lava le tali mai i le faatalauula atu a nisi o faalapotopotoga o loo galulue aua le auina atu faatopetope o fesoasoani i nai aiga o loo tagi mai nuu ma fanua, aemaise ai i latou o loo ua api i le vaomatua i le taimi nei.
Sa ou asiasi atu i le faamoemoe e pei ona tapenaina e le afioga i le Konesula ma le komiti o loo tuufaatasia le faamomoli mo Samoa. Sa ou auai atu la i le vaega o loo faamaopopoina ai faamomoli i Magele i le lotoa a le Te Whanaga o Aotearoa.
O le afioga Tupuola Toalepai Lui Tautolo o se tasi foi o tamalii ua iloga lona tautua ia Samoa a o avea ai ma pule a le Polenisia i Aukilani nei.
O ia lea o loo vaaia le faaitu lenei i Aukilani i Saute. O le itu e ofo ai le loto, ona o le gasolo atu o aiga ma ekalesia, o faafeagaiga ma soo se tasi.
O soo se atunuu e tagi le agaga ona o le alofa ina a tele. E le gata i lea, ae o nai Ekalesia o loo galulue malosi i le faamaopoopoina o lenei faamoemoe tele.
O si autalavou ma le Aoga Aso Sa a le ekalesia PIC i Otara, faapea ai foi ma le Autalavou ma le Aoga Aso Sa a le PIC i Magele, ma matua o e sa ofoina atu le latou fesoasoani. Faamalo faafetai Samoa i lo outou lagolago ma lo outou aao mafola.
Tau ia ina ia faaauau lo tatou loto faanoanoa faatasi ma si o tatou atunuu pele, atoa ai ma lo tatou tuu atu pea i le Atua i talosaga e maua ai le lototetele, ae sili ai o le tatou faamoemoe atu pea i Lona Agaga e maua ai le faatuatua e iloa atu ai isi faamanuiaga ua Ia saunia mo i tatou.
E avea foi lenei avanoa taua e faaoo atu ai se lagona vaivai, a o se agaga foi o le faamafanafana atu i le faletua Maxine ma le nofoalo, ae tainane o aiga e fia o le afioga Taito Phillip Field ona o le tulaga ua oo i ai le iuga o le faamasinoga. Ia lototetele ma taula pea i le Atua outou finagalo e maua ai le malū pe a mavae atu aso louloua o le olaga ona o mafatiaga e ala i le tulaga ua iu i ai le faamasinoga. Ia faalagolago pea i le Atua, ma ia tatalo pea e le aunoa, e maua ai le malosi sili faaleagaga, ae faapea foi ona saga lototele ai Lana auauna, a o iai o ia i le tuliina o le faasalaga.
E ui ina faigata le iuga ua tuuina mai, ae sa molimauina e le Tusitala le lototele o le afioga Taito.
Ua alu foi ma le faamalieina o lona finagalo i le maoae o le lagolago a Samoa atoa, o ona aiga ma ana uo mamae o e sa tutu faatasi ma ia, mai lava i le amataga o suesuega seia oo ina fofogaina le iuga o le faamasinoga.
Ia manatua, o loo tatou iai faatasi ma outou i talosaga molioo i le Atua e le aunoa, ona o faanoanoa e ala i le tulaga ua iu i ai le mataupu e pei ona molia ai le afioga Taito ona o nei tuuaiga. Ae mo Taito, ia agalelei atu le Alii i lau afioga, ma ia lua mafuta pea ma Lona Agaga e le aunoa.
Soifua ma ia manuia
