O le a lē taumateina, le sasaa atu o faamanuiaga mo nisi o afioaga i Samoa, ona o le tautua ma le auaunaga a se tasi o kamupani Niu Sila, o le a malaga atu mo le tāina o le vaomatua, ma auina mai le laau Samoa, poo le laupapa gaosia mai le atunuu, ma faatauina i maketi i Niu Sila.
O le kamupani o le Kalarikal, o loo faauluulu i se alii mai Fiti, ma lona faletua o se tamaitai Niu Sila, ua sauni nei e malaga i Samoa, ina ua taulimaina se tusi faamaonia ma aloaia mai le Matagaluega o le Siosiomaga ma Alaga‘oa a Samoa (Ministry of Natural Resources & Environment).
O fuafuaga a lea kamupani, o le tāina lea i lalo o le laau mai le vaomatua, ma gaosi ai le laupapa Samoa, ma auina mai i Niu Sila.
O se poloketi ua faamaonia, o le a matuā sasaa ai faamanuiaga i le tamaoaiga i seleni, mo afioaga ma nuu o le a agai i ai lea fuafuaga tele.
O le vaiaso na tea nei na feiloai atu ai i le pulega o le Kalarikal, le susuga ia Gerald Warid ma Jo Robinson-Picknell. Sa faamatalaina e le pulega le faafanua atoa o le malaga atu i Samoa, atoa ai ma le faagaioia o le galuega fesoasoani mo tagata o le atunuu.
O le finagalo o le alii Faatonusili o le kamupani o le a feagai ma lea galuega tele i le atunuu, sa tautino ai, o le a aogā tele, ma o le a manuia tagatānuu o afioaga uma o le a agai i ai le polokalame. O le a faafaigaluega tagata o nuu lava latou ia e ona le vaomatua, ma o le a palasi tonu foi tupe ma totogi i tagata o nuu ma afioaga mo galuega uma.
O le manaia lea ma le sao o le faamoemoe o le kamupani, ina ia pa‘ū tonu le samala i le muli o le fao. Ia tauia tagata tonu o loo galulue, ma ia penefiti foi nuu ma afioaga i soo se faamanuiaga lava mai gaioiga ma galuega o le a faia.
Saunoa Gerald Warid, ua leva ona faagasolo talanoaga, ma fuafuaga ma le malo o Samoa. Ua tele foi tupe ua alu i le totogiina o le faagaioiga o mea uma i Niu Sila ma Samoa.
Ae o le mea sili ma le faafetai, ua talia mai e le malo o Samoa le manaoga, ma ua faamaonia foi lana kamupani mo le faatinoina o le galuega tele. O loo ua taulimaina foi e le Samoa Times, le kopi o lea tusi faamaonia mai le Matagaluega i Samoa.
O afioaga o Lefaga, Saanapu ua mautinoa o le a amata ai lenei galuega, mo le tāina o le vaomatua, ma auina mai le laupapa i Niu Sila.
O loo iai foi le itumalo i Falealili ma isi afioaga o Savaii i fuafuaga a le Kalarikal ma lana auaunaga.
Ua tele taimi sa malaga ai le alii pule o le poloketi lenei i Samoa, mo le faia o talanoaga ma le malo, ona o le naunautaiga lava ina ia faataunuuina ma ave lea fesoasoani mo tagata Samoa.
O se talanoaga lava foi ma le pulega, sa ta‘ua ai e faapea, o le a taumafai lava ina ia totogi tagata Samoa, i le totogi aupito maualuga ma le talafeagai mo le faatinoina o galuega.
Ua mae‘a foi ona faia e lea kamupani se faiga faapea mo le atunuu o Fiti, ma ua mautu i le taimi nei.
O le alii o Gerald Warid ma lona faletua o se ulugalii Kerisiano, ma o le laua mau, o le fia tufatufaina o faamanuiaga a le Atua, e pei ona ia polomisi ai ia Aperaamo ma lana fanau i le amataga. E ao foi ona faasoasoa atu lea lava faamanuiaga ina ia manuia ai soo se tagata o i luga o le fogaeleele.
Ua leva tausaga, o fai le faasao a Samoa, ma faasā ai ona toe ta le laau ma le vaomatua. O le agaga o le malo, seia oo ina tele ma ia toe faafoi le lelei i togavao o nuu ma afioaga, talu ona mae‘a afā tetele sa aafia ai Samoa i le 1990 ma le 1991.
O le tasi la lenei fua o lea sa lelei ona faia, lea ua tatau ai ona selesele ma ua oo lava i le taimi o le seleselega. E tele nisi nuu o Samoa o le a mafai ona oo atu i ai le tufa a lenei kamupani e pei ona faamaonia mai e le pulega, i se talanoaga sa faia ma le Samoa Times.
Ae lē na o le pau lea o se auaunaga a lenei ulugalii. O se tasi o kamupani i Aukilani nei, o loo faagasolo pea ana polokalame faalea‘oa‘oga mo tagata Samoa ma isi gagana.
Home for Families
Sa faailoa atu i le lomiga i le vaiaso talu ai le auaunaga ma le autū o le kamupani lona lua lea a Gerard ma Jo. O le Home for Families, sa faavae ina ua vaaia ma iloa se manaoga faapitoa mai tagata Samoa ma le Pasefika. O lea manaoga o le fia nonofo lea ma umia saoloto ni o latou lava fale tumau.
O Jo Picknell, ua silia ma le 20 tausaga o iai lea agavaa faapitoa mo lea ituaiga galuega o le faatau atu o fale. O le umi foi lea sa galue ai i lea ituaiga galuega ma fesoasoani ai mo tagata lautele.
O lona naunautaiga, ia malamalama lelei ma ia manino tagata uma i le faagasologa ma le faagaioia o le faatauina o fale ma maota.
O le sailia o faletupe, ma le tuufaatasia o aitalafu, atoa ai ma le ofoina o nisi fesoasoani manaomia mo tagata, o le autū ma le faamoemoe lea o a‘oa‘oga e pei ona faatinoina e lea kamupani.
E tele nisi o loo faaaogāina, ma ua molimauina foi le aogā ma le telē o le sao o lenei auaunaga mo i latou, ma ua maua fale ma o loo saogalemu foi le totogiina, ma le faatupeina ona o le lelei ma le puipuia o auala sa a‘oa‘oina mai ia Jo ma Gerard ma le kamupani a le Home for Families.
O le Kalarikal Management Ltd, ma le Homes for Families mo Samoa ma Niu Sila e mafai ona maua i le 13 Paulowina Palce, Manukau. Telefoni 09 267 3284, poo le 09 267 5255.
