Sui o le Auckland Council, sui o local Boards ma le mamalu o le atunuu sa auai i le faatalatalanoaina o le tulafono mo le laiseneina o tufuga ta Tatau

Sui o le Auckland Council, sui o local Boards ma le mamalu o le atunuu sa auai i le faatalatalanoaina o le tulafono mo le laiseneina o tufuga ta Tatau

I le taimi nei o loo faagasolo pea ni fonotaga a le Pasifika e ala lea i le faatalatalanoaga o le tulafono faaleitumalo mo le soifua maloloina e tauala atu lea i suiga ua fuafuaina mo le tulafono faaleitumalo e faasino i le Soifua maloloina ma le Tatau.

I le taimi nei o loo faatulafonoina le laiseneina o tufuga ta Tatau uma, e le Council a Aukilani faatasi ai ma le mataituina o ni alafua.

O se polokalame e maua ai avanoa e faasoa ai finagalo o tagata lautele a le Pasifika i le Council pe alagatatau ona faaauau pea le laiseneina o tufuga ta Tatau faatasi ai ma le mulimulitai lea i ni alafua. Ae le gata i lea o suiga fou o le gagana poo le faaupuina o le tulafono e alagatatau ma le aganuu ma sili atu nai lo faaupuga o loo iai i le taimi nei.

O le po la o le Aso Tofi o le vaiaso ua mavae na toe faaauau ai lenei polokalame i le Mangere Art Centre i Magele e fetufaai ai lagona ma manatu o tagata lautele aemaise o tufuga o loo latou faatinoina lea galuega pe ua tatau loa ona laiseneina tufuga ta Tatau.

Na auai sui o le Council le faletua ia Josephine Bartley ma le tamaitai ia Linda Cooper o i laua ia sa faamaumauina finagalo o le atunuu, faatasi ai ma nisi o le latou ofisa ae sa galulue faatasi ma nisi o sui o local boards a Otara, Magele ma Otahuhu e pei ona faatautaia ai lea po e le tamaitai ia Lydia Sosene.

E faitau eseese lagona ma manatu o tagata i lea afiafi, aua e fou i manatu ma lagona o tagata lea tulafono ua tau faaofi mai pe a fua i aso ua tuanai i Samoa lea sa ta ai pe’a a toeaiina ma malu a loomatutua e leai ni tulafono sa fai ma taiala o lea galuega, ae sa iai foi le lagona o tagata i lea taimi o le tagata tautua i totonu o le nuu ma aiga ua alagatatau ona ta ai lana pea aua ua fetaui lelei ma le fale o matai. O aso foi ia e lei iai ni tagata na mama’i pe na maliliu a’o faatino lea galuega e tufuga sa latou amata lea galuega mai i Samoa, ae sa tele foi i na faaaoga fale o aiga e ta ai pea ma malu.

Aea le suiga ua iai nei aso, o lea ua tau faaofi mai le tulafono lea ua faaigoaina o le Bylaw mo tufuga ta Tatau i totonu o Niu Sila ona o le manatu maualuga o le Auckland Council e tatau ona iai ni laisene ma ni taiala e alafua ai galuega a Tufuga ta tatau ina ia malu puipui i latou o loo fia taina a latou pea ma malu mai le soifua maloloina lelei.

O nisi o lagona faaalia e tatau ona iai ni vaega e malu puipuia ai le tulafono lea o le’a fai, e faavae lea, ia aua nei vavevave le atunuu i le pasia ma le ioe e faatino le laiseneina o tufuga ta tatau, ae ia iai ni polokalame e auai mai ai nisi o sui o le soifua maloloina, sui o le Council ma tagata lautele e faatinoina ai ni aoaoga aua le faamalamalamaina o polokalame nei mo le silafia lautele o le atunuu.

Ua tuuina foi i le fonotaga lenei i le po o le Aso Tofi le mau a nisi o le atunuu e tatau ona faaliliu i le gagana Samoa le tulafono lenei o le Bylaw.

O nisi o finagalo faaalia e le ioeina ai e tagata le laiseneina o tutuga, ona o nisi o mafuaaga e pei o le toatele o tufuga e malaga mai i Samoa ma isi atunuu e le nonofo mau i Niu Sila ae o mai faatino galuega ma toe foi, o le isi itu e foliga mai e laisene loa tufuga o lona uiga ua ta mau ai le tufuga i tulafono ia ma taiala nei, ae pei ona silafia e ese mafaufau o le Council e ese foi mafaufau o tagata Samoa i le faatinoina o le tatou aganuu.

E laititi lava le mea o loo iai lagona o le Council ae o le a le faatauaina ai le aganuu a Samoa i ona itu tetele e pei ona iai lea vaega o measina a Samoa.

O nisi o tufuga sa auai i lea po, o loo latou lagolagoina le laiseneina o tufuga aua e mafai ai ona tatala mai le tele o faitotoa ma avanoa mai le Council e auala mai ai vaega e tatau ona faaaogaina mo le maua e le tagata o le soifua maloloina lelei e pei o vailaau e fufulu ai au amaise o le lelei o nofoaga e tatau ona faatinoina ai le galuega.

O le lelei foi o lea tulafono ina ia tapasa ai le tufuga i alafua e tatau ona agai iai le faiga o lana galuega i totonu o nei atunuu aemaise lava i atunuu nei i fafo.

Pei ona taufamafai mai le Auckland Council i lenei tulafono, ona o le taumafai lava ia fufulu lelei lima, ia lelei fale e faaaogaina e faatino ai le galuega, faatasi ai ma le fufulu lelei o au o loo faaaogaina.

O le aso 26 o Oketopa o lea maua ai se fetuugaina a le laulau a le Council e uiga i lenei tulafono ma Novema e fai ai loa le faaiuga mo nisi o suiga o le tulafono faaletiumalo.