O le fesili lea ua i mafaufau uma o le toatele aemaise ia i latou o le au failotu ma le lautele o tagata Samoa i le talanoaina ai o le tasi o vaega o le Tulafono o Soligatulafono o le 1961.
O lea vaega ua patino i faiga faamulilua, ua aofia uma i nisi o solitulafono o loo talanoaina le talafeagai ona faaauau i lalo o le Tulafono o Soligatulafono pe leai foi ona ua manino e lē o ave i ai se faamamafa i le itu tau i soligatulafono faalemalo lava ia.
O ni faiga ua manatu le Faamasinoga ma nisi o loia e lē o toe talafeagai le aumai i luma o le Faamasinoga i lenei vaitaimi o le talutalufou ma o se mataupu ua patino i Tu ma Amioga faaletagata Soifua ma Tu ma Aga faa-Kerisiano.
Ua mae‘a se faaiuga a le Faamasinoga Faaitumalo i Samoa i le vaiaso ua tuanai, lea na faatonuina ai se tamaitai na te totogi se tinoitupe e $50 tala Samoa i le Faamasinoga. E lē o se sala o le solitulafono o le mulilua na molia ai o ia, ae o le tau lea a le Faamasinoga i le faatautaiga o lana mataupu.
Na ioe le tamaitai lenei i le moliaga o le mulilua peitai ua maua e le faamasinoga e ala i se folasaga a lana loia, ua toe faalelei le aiga o lea tamaitai ma lona toalua.
O le manatu o le Faamasinoga na faaalia, o lea ua fofoalamea le mataupu ma e patino lava i le va faaleulugalii latou e ui “o se solitulafono matuia tele, pe a silasila i le itu lea o le soifuaga faaletagata ma le soifuaga faa-Kerisiano”.
O le finauga a le tamaitai loia i lenei mataupu ina ua tāpā se finagalo o le tamaitai na tuuaia, o loo lotea nei i iloiloga a le Komisi Faapitoa o le Tulafono le mataupu lenei, ona o le vaavaai toto‘a lava po ua talafeagai lenei ituaiga solitulafono mo le faamasinoga.
E fai o le tuai o nei soligatulafono ae o ni uiga o loo i lalo lava o le lisi o soligatulafono i totonu o Samoa.
O le mafuaaga foi lea na ta‘ua e le Faamasinoga mulimuli ane, ua vaaia ai e lē o tele se aafiaga o le Tulafono i lenei mataupu pe afai o totonu o le Palemene ma le tulafono o loo iai nei, o le sala aupito maualuga lava o le mulilua o le $100 (tala Samoa).
O le fautuaga ua tatau ona aveese lenei solitulafono mai le tulaga o iai nei – ae o le fesili la, afai e aveese mai le Tulafono o Soligatulafono lenei faiga, o lona uiga o le a taatia loa i faiganuu lea e vaaia amio a tagata o afioaga taitasi se faaiuga e faia i nei faiga. Pe ave foi i totonu o Ekalesia latou te faia lea tulaga.
O le taimi lenei o loo iai faasalaga o loo faatino i le tele o masina o le tausaga e afioaga pe afai e oo atu se tagi a se tasi o lona toalua ua mulilua. E malosi foi le tali mai a afioaga i lenei ituaiga solitulafono.
O totonu foi o Ekalesia ua aveese ai tofiga o i latou ua faamaonia ua faia ia uiga i totonu o o latou aiga. Atonu o le mafuaaga lea o le talanoaina o lenei mataupu ona o le mau a le Faamasinoga, o le Faamasinoga lava ia e mo solitulafono e pei ona tumutumu ai nei i le faaoolima, o le faaoo manu‘a o le fasioti tagata, ma sauāga eseese e aofia ai sauāga matagā, o le gaoi, faomea, talepe fale, faaaogā, totō ma le faatau atu o fualaau faasāina, ma isi uiga e lepeti ai le soifua o isi tagata.
Ae a iloilo toto‘a le mulilua, ua tele fasioti tagata i Samoa ua mafua mai ona o le mulilua, ua tele foi faaoolima ma faaoo manu‘a ua mafua mai ona o le mulilua, ma ai seiloga o le a tulai mai se tulaga faapea ona mafai lea ona lotea e le Faamasinoga, ae o le gaioiga lava ia o le mulilua, o lea ua iloilo nei pe tatau loa ona aveese mai i soligatulafono faalemalo, pe leai.
