Pe mafai ona ulutinoina e temoni se tagata Kerisiano?

E toe faatalofa atu i le suafa manumalo o Iesu Keriso lo tatou Alii ma lo tatou Faaola. Faamalo le soifua laulelei Samoa, malo le onosai, malo le finau, malo foi le lotomau.
Poo fea lava le tulimanu o le kelope o loo e maua mai ai lenei tusitusiga, o le tatalo ia aoga e faamalosia, ma faalaeiauina oe aua le savaliga faalefaatuatua.

O lenei foi ua tatou aulia mai le amataga o feau ma galuega o lenei vaiaso. O le upu moni, e le mafai ona tatou alofia le tele o fita ma faigata e agai mai ae tatou loto tetele aua o loo tatou auauna i le Atua malosi, o Ia o le Atua matautia, o Ia foi o le Atua e mafaia mea uma. O loo folafola foi lana Afioga, e leai, leai lava se mea e mafai ona tuu eseeseina mai i tatou mai lona alofa tunoa ia Keriso Iesu. Viia le Atua!

O le toe faaauauina lenei o le tatou mataupu o le ‘Agasala ma le Faaolataga.’ Pei lava ona faailoa atu i vaiaso ua tuanai atu, e tusa ai ma le molimau a le Tusi Paia, “ua agasala tagata uma, ma ua le mafai ai ona oo atu i le mamalu o le Atua.” Ae viia le Atua, ua ia saunia foi le auala mo i tatou. Ioane 3:16 “Aua ua faapea lava ona alofa mai o le Atua i le lalolagi, ua ia auina mai ai lona atalii pele e toatasi, ina ia le fano se tasi e faatuatua ia te ia, a ia maua e ia le ola e faavavau.” Ioe Samoa, o le alofa lena o le Atua mo i tatou, e ui lava ina o i tatou e agasala, a ua tatou le totogi la tatou sala, ae ua saunia le ala tatou te o ese mai ai le faafaanoga ae sao atu i le manuia e faavavau. O le vaiaso nei, o le a tatou tilotilo ai i le fesili lenei:-

E iai tagata i le Tusi Paia sa latalata ia Iesu ma sa faaaogaina malosi i le faataunuuina o lona finagalo. O nisi o i latou nei sa latou vaaia vavega ma aoaoga ma faataitaiga matagofie a Iesu Keriso i o latou soifua. A o le mea moni, sa le tuu tuusaunoaina i latou e le fili, ma sa faapea ona osofaia ma faaleagaina o latou olaga. O le mafuaaga tonu lena o loo faamanatu mai ai le Tusi Paia, e ao ona mataala ma tatalo i taimi uma nei oo mai faaosoosoga.

E tusa ai ma le aoaoga a le Tusi Paia, ua uma ona faaleaogaina ma faatoilaloina e Iesu Keriso le mana poo le malosi o Satani i luga o le satauro. O le toetu manumalo mai o lo tatou Atua i le oti ma le tuugamau, o le faaailoga lena o lo tatou manumalo i mea uma e oo lava i le pule a Satani. Afai o oe o le tagata Kerisiano, e ao ona e silafia, o lou manumalo foi lea. E leai la se avanoa e toe manumalo ai le fili ia i tatou. Ua uma ona faasaolotoina mai e Iesu Keriso i tatou mai nei aafiaga uma. Manatua Samoa, o le faaolataga ua saunia e le Atua, o le faaolataga atoatoa.

O le fesili o loo tulai mai pea: Aisea o loo faiaina ai pea, ma faaseseina ai pea, ma faatoilaloina ai pea i tatou e Satani? O le mea moni Samoa, o le toatele ia o tagata o loo alalaga ma tautau le Atua i le ao ma le po, ae ua taotaomia le soifuaga i mea o le olaga nei. O loo faapologaina pea i togafiti a le alii o lenei lalolagi. Ua fao faamalosi ma ave faagaoi e Satani manuia o le Atua ua uma ona folafola mai mo i tatou lana fanau. O le tele o taimi tatou te folafola o tatou o Kerisiano, ae ua olopalaina i tatou i le loto momomo, loto faavauvau, loto ita, loto le faamagalo, loto le talitonu i le afioga a le Atua, aemaise ai le loto tetee i pulega.

O se tasi o mafuaaga ua tele ina malo ai le fili ia i tatou, o lo tatou le ola mataala i taimi uma. Ua seetia i tatou i togafiti a le fili, ona ua le mataala i tatou. Ua avea pea lea ma auupega malosi a le fili e manumalo ai i le toatele o i tatou, aemaise ai lo tatou le usitaia o le upu a le Atua. O le taimi lava e tupu ai lea tulaga i lo tatou soifua, o le taimi foi lea ua e tatala atu ai le avanoa e ofi atu ai le agaga leaga i o tatou loto ma avea ai ma olo malosi i o tatou mafaufau. O nisi foi tagata, o manatu leaga ma manatu sese, o le loto eleelea ma le masalosalovale ma nisi manatu alualua e mafua mai i ni mea na tutupu a o ola mai ua fai lea ma faitotoa e toe sao mai ai le fili.

I le Tusi a le aposetolo o Paulo i le Ekalesia o Efeso 4:27 na ia lapataia ai le ekalesia: “Ia outou tuuese le pepelo, a ia tautalatala faamaoni taitasi ma le la te tuaoi; aua o itu tino lava i tatou o le tasi i le tasi. A outou ita, aua le agasala ai; aua nei goto le la o ita pea outou. Aua foi nei tuuina atu e outou se mea e mautu ai le tiapolo.” E leai se avanoa e mafai ai e Satani ona osofai i tatou ona o lea ua malu puipuia i tatou e Iesu le Alii o le ola. Peitai, e faatoa ulutinoina i tatou e le agaga leaga ina ua tatou faatagaina e ala i lo tatou tatala atu o le avanoa i mea e pei ona taua i luga.

Ua faapea foi ona aoao mai le Tusi o Roma 6:16: “Tou te le iloa ea, o lē tou te tuuina atu i ai outou e fai ma auauna e anana i ai, o ana auauna foi outou, po o le agasala e oo ai i le oti, po o le anaana e oo ai le amiotonu.” O le tatalo a le Taiala, ia fai i tatou ma auauna a le amiotonu. Aua nei tatou tatala pe tuu se avanoa i le alii o lenei lalolagi e mauaa ai i o tatou loto. Tatou mataala ma tatalo e le aunoa, aua o le fili ua pei o ia o se Leona tagi, o loo fealuai solo e saili nisi e saei ma faatamaia. A tatou le ola mataala la, o le a maua i tatou i togafiti a le alii o lenei lalolagi.

Manatua, o le filifiliga o le mea lea e fai toatasi e oe. O lau filifiliga e te manuia ai, o lau filifiliga foi e te malaia ai. E te filifili pe tatala le faitotoa pe tapunia foi. A o le fafagu mo oe i lenei vaiaso, filifili nei e talia le upu a le Atua, filifili nei e ola i le faatuatua, ma savali nei loa i se olaga manumalo. Aua nei toe tatala se avanoa e mauaa ai le tiapolo ia te oe. O Iesu lava na folafola mai, “Ia outou loto tetele, ou te ia te outou i taimi uma lava, seia oo i le iuga o le lalolagi”.

Manuia tele le vaiaso Samoa!