Ua mae‘a atu lava le Daylight Savings, e lē o tele lava ni faamatalaga o faia i ai auā o lea lava o loo ua tele ina faagasolo lava galuega masani ma aoga a le fanau.
Ae e pei o le taulai ina ua sui le taimi na alu i le Uati i Apia lea e ogatotonu ai le tele o faleoloa, ofisa ma kamupani eseese i le ogatotonu o le taulaga.
O le vaiaso na tea nei na pe ai mo le uluai taimi le uati talu ona faatonutonu ma toe faaleleia e faatautaia ma lima taitaina ai suiga o le taimi ua iai nei Samoa.
O le ta tonu o le 12 i le aoauli o le Aso Lua na pe ai ma e mālie tele le mafuaaga. Ta‘ua e Tim Tracey le alii Ausetalia lea na aumai faapitoa lava e le Matagaluega o Fesootaiga Televavave faaonapo nei e galue i le faaleleia o le uati, e motusia faafuasei loa le eletise, motu loa foi ma le minoi a le Uati.
Seiloga lava la e toe faatonutonu mai e ala i fesootaiga tau satelite mai i Ausetalia e lenei alii le faaletonu ona faato‘ā mafai foi lea ona toe ola.
E toe ola mai i le taeao ua lua minute e tuai ai isi itu e lua o le uati ae o loo ua toe foi lava i le sa‘o lelei le taimi o isi itu e lua.
Talu ai o le motusia o le eletise na ta‘ua e Tracey e iai le isi afa o le uati ua tausisi lava i le umi e pe ai le eletise ona toe ola mai lea ua tuai ae o le isi vaega o loo agai sa‘o lava i le taimi o loo iai ae toe ola mai.
O lona uiga a mātau lelei le toe ola o le uati i le aso na sosoo ai, e lua lava minute o loo tuai ai le isi afa o le uati – o le tala a Tracey, e lua la minute na pe ai le eletise i le taulaga.
O le polokalame la ua faatautaia i le uati lenei e 12 itula lelei lava e malolo ai le uati pe a pe, ona faato‘ā toe ola loa lea ma e tatau ona ola ane ua toe sa‘o le taimi.
Ua galulue nei le Matagaluega o Fesootaiga Televavave Faaonaponei ina ia ta‘i se laina telefoni ina ia mafai ona fesootai ma le masini o loo ola pea i totonu o le uati, o se computer.
O le fesootaiga lenei e mafai ai e le alii inisinia faapitoa lenei mai Ausetalia ona toe faalelei atoa mai lava le uati pe a iai se faaletonu e tulai mai.
E lē gata i lea o le fesootaiga lea o laina telefoni o le a mafai ai ona toe faalogoina le leo o le uati i taimi faatulagaina e pei ona masani ai le toatele i tausaga ua mavae, le sailigi lea e tatagi leotele i le valu i le taeao, le faailo ua amata aloaia galuega, o lona uiga o lea o le a tatagi i le iva i le taeao.
Le faailo o le ta o le 12 i le aoauli ua oo i taimi o malologa o galuega o le aso, ma le tatagi mulimuli e faailo ai le afa o le fa i le afiafi ua uma foi galuega o le aso.
O leo nei e lei toe faalogoina talu mai afā o Valelia ma Ofa ia na faaleaga ai logo o le uati ma ua tele galuega e toe faaleleia ua lē mafai lava.
O le lelei loa la o fesootaiga na ta‘ua e Tracey o le a mafai ai loa ona fai atoa mai lava lea galuega tele mai i Ausetalia e pei ona faaaogāina ai loa le tomai lea ua faaaogā ai fesoogtaiga televavave ma malosiaga faa internet faapea fesootaiga tau satelite.
