Ua manino mai nei i le taunuuga o le faitauga aloaia o le palota tele a Samoa sui tauva ua filifilia ma ua avea nei ma Faipule o o latou itumalo i le paeaiga lona 16 a le Palemene. Ua manino mai ai foi sui ua lē faamanuiaina aemaise o sui sa umia tofi faipule o le paeaiga lona 15 a le Palemene ua mae‘a ua lē toe filifilia. E iai nisi o itumalo sa faaluafesasi faaiuga ma lē mautinoa tonu ai le sui ua manumalo ae o le faaiuga o le faitauga aloaia o lea ua taoto mai ai le sui ua filifilia. O itumalo o Faasaleleaga Nu.1 i Sasae sa tulaga muamua palota na maua e le afioga Sili Epa Tuioti, ae na alualu le faitauga muamua e lei aloaia tulai mai ua palota silia le sui tauva le tofa Pauli Ivan Williams. O le mae‘a o le faitauga aloaia o lea ua toe suia i le palota silia o le afioga Sili Epa ma ua filifilia mo le tofi o Faasaleleaga Nu.1 i Sasae.
O le itumalo o Gagaemauga Nu.3 e mae‘a le faitauga muamua e lē aloaia o loo palota silia le afioga Faamoetauloa Faale Tumaalii sa umia le nofoa ma o se tasi o Minisita o le Kapeneta. Peitai o lea ua aumai le faaiuga aloaia o le susuga Nafo‘itoa Talaimanu Keti ua manumalo i le nofoa o lea itumalo.
E faapena le itumalo o Falealili i Sisifo e 4 palota na sili ai le afioga Tusa Misi Tupuola sa umia le tofi i nofoa e lua o Falealili a o lei vaeluaina le itumalo lea sa seei faatasi mai ai ma le tofa Tuiloma Lameko. Peitai o lea ua manumalo palota ua maua e le sui tauva le afioga Aumua Isaia Lameko o se alo e faasino i le tofa Tuiloma Lameko ma ua malolo ai le afioga Tusa Misi. O le taatiaga mai o sui ua filifilia i tofi o itumalo e 49 o le atunuu ua manino mai ai e toaiva sui faipule o le Tautua Samoa o le paeaiga tuai a le Palemene ua lē toe filifilia, ae toatasi na toe manumalo le afioga A‘eau Peniamina Leavaiseeta o le faipule o Falealupo.
Peitai o lea ua toe manumalo mai ma le isi faipule o lea vaega faaupufai sa tauva faatutoatasi le tofa Levaopolo Talatonu ua filifilia mai mo le tofi o le itumalo o Salega i Sasae i lona suafa o Olo Fiti Afoa Vaai.
O le isi e toatolu ai o le sui fou le afioga Ili Taateo Tafili ua malolo ai lē sa umia le tofi o Aana Alofi Numera 2 le tofa Tolofuaivalelei Falemoe Leiataua o se tasi o minisita o le kapeneta ma sa avea foi ma Fofoga Fetalai o le Palemene.
E toaiva minisita lagolago poo sui faipule o le paeaiga talu ai a le Palemene mo le vaega a le HRPP ua lē toe filifilia ae toalima minisita. O lona uiga e to‘a sefulufā faipule o lea itu a le Malo ua malolo. E ese mai ai nisi o faipule na faamavae a o lei mae‘a le paeaiga ua mae‘a a le Palemene e pei o le afioga Le Mamea Ropati, Tuiloma Lameko, ma le afioga Alo sa umia le tofi o le itumalo o Anoamaa i Sasae.
A fua la i le HRPP i le numera e 36 o nofoa sa latou umia i le paeaiga ua mavae e to‘a 22 sui faipule ua toe filifilia mai. O le numera o nofoa ua ia maua i le mae‘a o le faitauga aloaia o le palota tele e 47. O lona uiga e to‘a 25 o latou sui tauva fou na manumalo i le faiga filifiliga a le atunuu.
O suafa o sui fou nei e aofia ai:
Sulamanaia Tauiliili Tuivasa – Vaimauga Sasae
Faaolesa Katopau Ainuu – Vaimauga Sisifo Nu.2
Salausa John Ah Ching – Faleata Sasae
Loau Sola Keneti Sio – Sagaga Le Falefa
Afamasaga Rico Tupai – Aana Alofi Nu.3
Mulipola Leiataua Laki – Aiga ile Tai
Toelafoa Ken Poutoa – Lefaga ma Faleaseela
Nonu Lose Niumata – Safata Sasae
Lea‘ana Ronnie Posini – Safata Sisifo
Faalogo Iosefa Sopi – Siumu
Fuimaono Samuelu Te‘o – Falealili Sasae
Aumua Isaia Lameko – Falealili Sisifo
Alai‘asa Sepulona Moananu – Anoamaa Sasae
Sili Epa Tuioti – Faasaleleaga Nu.1 Sasae
Pa‘u Sefo Pa‘u – Faasaleleaga Nu.2
Tofa Foleni Li‘o – Faasaleleaga Nu.3
Faasootauloa Pati Taulapapa – Gagaemauga Nu.2
Nafo‘itoa Talaimanu Keti – Gagaemauga Nu.3
Lopaoo Tanielu Mua – Vaisigano Nu.1
Tapulesatele Mauteni Esera – Vaisigano Nu.2
Aliimalemanu Alofa Tuuau – Alataua Sisifo
Toomata Aki Tuipea – Salega Sisifo
Afoa Amituanai Faleulu Mauli – Palauli Sisifo
Tuifaasisina Risati Leleisiuao Palemene – Palauli Sasae
Faumuina Asi Wayne Fong – Itumalo Tutaulaga Sisifo (Faleata)
Faaulusau Rosa Duffy Stowers – Sui Faipule Faaopoopo mo nofoa e lima o tina ma tamaitai i le Palemene
