Paulia le Forum Samoa i gatai o Mulinuu

E ese foi le malie o aga o le suiga o le tau e pei ona vaaia ai i le vaiaso ua tuanai a o faamanatu ai le vaiaso o tu ma aganuu a Samoa e ala i le faaaliga o le Teuila, 2009.
Na tomua lava lipoti o le vaiaso i se vaaiga i vaa tosovaa laiti se lua, o tauivi ma le malosi o galu ma le matagi, a o tau toso atu i le alavaa o le agai atu i le Uafu i Apia le vaa tele lau uta a le Pacific Forum Line, o le Forum Samoa.
O se tauiviga na oo i le fa o aso, o taumafai lava ae e matua le maluelue ese lava le Forum Line mai le faga oneone lea e faalava tonu i gataifale o Mulinuu talu ona paulia ai mai le Aso Faraile mulimuli o Aukuso.
O faamatalaga a sui o le auvaa na malaga mai i le vaa lau uta lenei, o le malosi tele o le matagi na tele ai i le pa‘u mātū le agai mai o le Forum Samoa i le uafu i Matautu.
O lea ua atoa lelei lava aso e lima o paulia lenei vaa atoa ai ma lana uta a o taumafai lava vaa tosovaa a le Pulega o Uafu ma Taulaga i Apia faatasi ai ma le fesoasoani a le Vaa a Leoleo, le MV Nafanua ina ia fai se faiga e mafai ai ona see ese ma le oneone lenei vaa ae ua le mafai lava. Na iu ina talosaga le malo o Samoa ia Niu Sila ma Ausetalia mo se fesoasoani.
O le Aso Gafua na tea nei na tuufaatasi ai loa le Forum Samoa ma se vaa fagota ina ua sau sao foi lea vaa ma paulia ai i ni nai mita lava i tai atu o le vaa lau uta tele a le Pacific Forum Line.
Na faaalia e lipoti e leiloa e le vaa fagota o loo paulia le Forum Samoa ma e foliga mai na agai sao mai lava i le vaega o le sami lea na vaaia ai le vaa tele lenei, ae paulia ai foi ma lea vaa fagota.
O le vaega tonu o loo paulia ai nei vaa e lua, o se vaega tonu lea ua manu ane talu mai afa fulifao e lua o Ofa ma Valelia ma a oo ina pe le tai e mafai lava ona vaaia ai nisi o tautai ua faaaoga lea nofoaga mo malologa i taimi o faigafaiva ma e vaaia lava le maualuga o le manu ae a le oneone i le taimi lea o le pe o le tai.
Ua malaga faapitoa mai lava sui o le PFL i Fiti e iloilo poo le a tonu lava auala e mafai ona puipuia ai le vaa mai le faaleagaina i le taimi e mafai ai ona toso.
E leai ma se faamatalaga o sau i lea aumalaga.
O le itu faigata ona sa faaauau foi ona faaletonu ma le mateia le tau i lenei masina fou ua oo i ai.
E tetele lava mugala ae faateia lava i le tetele mai o timuga ma ua alu le vaiaso atoa o faaletonu le tau, na amata mai lava i le mafuie lea na lulu i le amataga o le vaiaso, sosoo ai ma savili malolosi e pei ona molimauina i le talafatai o Apia. Ua siisii foi le malulu o po ma e le o malolo foi le sou o le sami ona o ia uiga faigata o le tau.
O le toso o le vaa lenei agai i le uafu e faitau sefulu afe tala tupe e faatino ai ma o le tapa o le fesoasoani a Niu Sila ma Ausetalia i se vaa e toso ai le Forum Samoa, atonu o le a faamama avega i le Pacific Forum Line, aua o lea o le a faatino o se fesoasoani i le va o malo ae a le mafai o lona uiga o le a totogi loa se vaa e avatu le uta tele a le Forum Samoa i luga o le uafu o Apia.
O le amataga foi o le masina na tea nei na paulia ai foi se vaa faila a se ulugalii mai i Amerika i tua ane o le vilimaa lea e i le isi itu o gataifale o Mulinuu ma na sa‘e ai lava lea vaafaila.
O meatotino sa i totonu o lea vaafaila na mafai ona faasao mai e le aufaigaluega o Pulega o Uafu ma Taulaga peitai na toso i le uafu o vaafaila lea vaa ona ua tele se faaleagaina ina ua paulia.
Ua toe foi le ulugalii Amerika ma le faanoanoa i le faalegaina o le la vaafaila ma na i lalo o le vaavaaiga a le Ofisa o Amerika i Samoa nei ina ua faaleagaina lo la vaa.