O le tauvaga taitoafitu i Sikotilani i le faaiuga o le vaiaso na tea nei na vaaia ai le vaivai tele o le finau a le Manu Samoa lea na malolo muamua ia Kanata 19-17 faapea Aferika i Saute e 29-0 ma tofu atu ai i le tauvaga o le Tanoa poo le Bowl mo le taimi muamua i lenei tausaga. E ui ina manumalo ia Kenya 26-0, na atagia le faavaivai o le Manu ina ua sosoo sikoa e tolu a Aferika mo ai e 15-0.
Na amata mafatiaga o le Manu Samoa i lana taaloga amata ma Kanata lea na ta le malologa o sili Samoa e 17-0. O le ‘afa faaiu na momoe ai le ‘au ae sosoo sikoa e tolu a Kanata i le aunoa ma se tali atu i ai… na faapei o se tui oona i le tapuaiga a le atunuu le matauina o pue faatemeteme ma pei e lakapi pa‘i le tatou ‘au i le taimi na sili ai latou ‘ai.
Na avea lea ma auupega e alafai mai ai Kanata ma tuli atu lava manumalo 19-17. E ui na sikoa muamua le uigi logologoā ia Mikaele Pesamino i le amataga sosoo ai Lio Lolo ma Afa Aiono, ae na toe vaaia lava le ma‘i masani o le lē mataala tusa lava pe sili mamao ‘ai.
Na lē mafai e Pesamino ona tauave uma le tatou ‘au i le poloka o avanoa i luma o le foueki ma leai ai sa tatou puleaga i le tauiviga mo le polo faapea le tapuni mai ai ma avanoa e osofai ai le laina i tua.
Na toe feololo mai ia Kenya ae na masalomia lava le palaai loto o le Manu Samoa ia Aferika lea ua tolu ai nei tauvaga o faapalopalo lava e Aferika. E lei uma ona amata lea taaloga faaiu o le pulu masalo ana malo ai Samoa e sao i le ipu autū ae sikoa faalua le Aferika fou na o le 19 tausaga ia Justin Geduld.
Na vaaia i le aso muamua le faaletonu o le taumafaiga a le Manu Samoa e faataalo Tom Iosefo i le ‘afa a o la e sipea le ‘afa faapitoa (specialist) ia Sani Niue. Ua amata toe tapena nei le tatou ‘au mo le vae faaiu i Egelani i le faaiuga o le vaiaso nei, ma savalivali atu ai loa i le Ipu o le Lalolagi e faia i Moscow, Rusia i le aso 28-30 o Iuni.