Ua pasia e le Palemene ni teuteuga faanatinati i le tulafono o faigapalota, lea ua lē mafai ona liliu pe transfer se tagata palota i se isi itumalo e iai sona piitaga seiloga e mae‘a le lima tausaga.
O lona uiga o i latou uma na liliu pe transfer i isi itumalo i le faigapalota o le 2006, e lē mafai ona toe liliu i le palota o le tausaga fou seiloga e mae‘a le palota o le 2011 lea e faatoa mae‘a ai le lima tausaga o le paeaiga a le Palemene o iai nei.
Ua faamoemoe o Novema o le tausaga nei e tapunia ai lola palota mo le faamauina o suafa o tagata palota, peitai e faaauau lava ona lesitala i latou e faato‘ā atoa le 21 tausaga o le soifua ia Tesema seia oo ia Ianuari o le tausaga fou.
O teuteuga nei ua finauina ai e le sui faipule fou o Faleata i Sisifo, le tofa Ale Vena le tatau i le Malo ona faia se aiaiga e taofia ai le toe palotaina e tagata ese o loo ua nofoia fanua faatau ma nofo lisi i lona itumalo mai le toe auai i faigapalota e sailia ai tofi faipule o Faleata i Sisifo, ae tau lava o nuu mavae o lona itumalo.
O le palota laititi talu ai nei na iloa ai e lea sui faipule le toatele atu o tagata o loo nofoia fanua faatau ma nofo lisi i totonu o Faleata i Sisifo nai lo tagata palota o nuu mavae e amata mai i Vaiusu e oo i Puipaa.
