O le Aso Lulu o le vaiaso lenei, le aso 6 o Aperila, e maua ai se feiloaiga i Ueligitone a le Palemia o Toosavili John Key ma nisi o susuga i faafeagaiga ma i latou ua avea ma sui o atumotu eseese o le Pasefika. Ua ta‘ua sui nei o le Pasefika, o le ‘Pacific Leadership Forum’.

I le tausaga ua mavae ina ua faatoa amata ona faamaoopoopo lea faalapotopotoga ma faamautu sa latou feiloaiga ma alii minisita o Bill English ma Peseta Sam Lotu-Iiga ma i latou e lagolagoina le vaega faaupufai a le National, sa iai nisi o faifeau se fesiligia a‘u i so‘u lagona e faatatau i lenei vaega.

Sa ou tali atu i ai, o se mea lele tele le maua o avanoa e feiloai ai le tatou atunuu ma taitai o le faigamalo o loo tulai mai i le taimi nei. O avanoa nei e fesiligia sa‘o ai le faigamalo poo ā tonu a latou faiga faavae o loo faatino e maua ai e o tatou tagata se fesoasoani.

O le isi vaega tāua o nei feiloaiga, e maua ai le avanoa e fofola sa‘o atu ai i le faigamalo mataupu tāua e manaomia ai e le tagata Pasefika le fesoasoani, aemaise mo le toatele o tatou tagata o loo vaivai le tamaoaiga, e tatau i le faigamalo ona fesoasoani i ai.

Sa ou avea ia i latou sa fesiligia so‘u manatu, ni mataupu e fai ma faataitaiga e mafai ona latou fesiligia ai le faigamalo a le National. Muamua, ia fesiligia le faigamalo a le National poo ā a latou galuega o loo fai ina ia tele ai ni galuega e maua e o tatou tagata, ma toe lelei ai totogi auā le tausiga o aiga.

O le isi, ia fesiligia le faigamalo poo ā a latou galuega o loo fai ina ia toatele ai tagata Pasefika e umia saoloto ni o latou lava fale, auā o lea ua pa‘ū le fuainumera o tagata Pasefika o loo umia saoloto ni o latou fale i lalo ifo o le 18%, talu ai le taugata o fale ma le faigata ona maua o nonogatupe e faatau ai sou lava fale.

O le isi mataupu, ia fesiligia le faigamalo poo afea e toe faataga ai le maua o nofomau o aiga i lalo o le vaega o tulafono o femalagaa‘iga ua ta‘ua o le ‘family reunification’ lea na  faalēaogāina e le National i le tausaga 2011, ma ua faafaigata ai ona toe maua avanoa o aiga mai le Pasefika e nonofo faatasi ai i Niu Sila.

O le isi mataupu, ia fesiligia poo ā galuega o loo faia e le faigamalo ina ia toatele ai tupulaga talavou a le Pasefika ia faigofie ona agai i aoga maualuluga ma iu mai ai, i lo le mea o loo iai nei le toatele o tupulaga talavou – e leai ni galuega, leai foi ni polokalame tau aoaoga o agai i ai.

Na logo mai ia te au e faapea, e ui sa fesiligia fesili nei i minisita o le faigamalo a le National, le alii o Bill English ma le afioga Peseta Sam Lotu-Iiga, ae e lē tali sa‘o mai, ona e ese foi le mea o loo fia talanoa mai ai le faigamalo latou ia.

Ua iai nisi o faifeau ua lē toe agai i ai i lea faalapotopotoga ona fai mai o latou o loo taulamua ai o loo taumafai e faaaogā lenei faalapotopotoga e saili ai so latou lanu i le faigamalo i mea o loo latou mananao i ai.

O le isi ua fai mai ua foliga o le auai o faifeau i lenei faalapotopotoga ua taumafai ai le vaega a le National e taitai uma atu ai latou aulotu faapea ua lagolago uma i le vaega a le National ma le faigamalo, e ui o lenei na o atu o le fia faalogologo ma le fia malamalama.

Ae fai mai foi nisi, o loo iai lava i latou o loo o e sailiili se latou lava manuia na o latou lava, ae e lē o o e saili se manuia mo tagata lautele.

O se tasi alii sa auai, ae ua lē toe alu i ai i nei fonotaga, fai mai o ia sa ese lava lona lagona i feiloaiga ma sui o le faigamalo ma latou o loo faamaopoopoina lenei faalapotopotoga.

Fai mai e faalogo atu lava e pei o lea e taitaiseseina i latou. Fai mai o ia sa masani ona faigaluega i fale fasimanu i Otahuhu i tausaga ua mavae. E iai le mamoe e tau o le ‘mamoe a Iuta le faalata’.

O lenei mamoe ua toleni lelei e na te taitaiina atu isi mamoe i totonu o le fale fasimanu. E taunuu atu loa i totonu ui ese loa le mamoe lenei a Iuta, ae o uma isi mamoe i le mea e fasi ma tape ai loa e le aufaigaluega. O se lagona lea ua oo atu ia te ia, ua lē toe alu ai i fonotaga a lea mafutaga.

Fai mai foi o ia o isi taimi pe a tetee le aufaigaluega i le pulega o fale fasimanu, ua tape ai loa e le aufaigaluega le mamoe a Iuta, auā e umi se taimi o toe toleni se isi mamoe e fai ma mamoe e faalataina isi mamoe.

Fai mai o ia e iai lona lagona o loo faalata latou e nisi o loo faamaopoopoina lenei mafutaga. E lē o le sailiga o le manuia o tagata Pasefika, ae o loo saili lava lo latou lava manuia.

O‘u fesili atu i ai poo le ā le uiga o lana faamatalaga, ae fai mai o nisi e foliga o loo o atu e saili ni avanoa e nofomau ai i Niu Sila, ae o isi o loo o atu e saili ni tupe mo latou lava polokeki, ae e lē o ni mea e manuia ai le atunuu atoa.

Ou te lē o iloa e a‘u pe moni lea tulaga, ae e lagona le faanoanoa pe afai o feiloaiga nei ma le faigamalo ua faaaogā ona o polokiki, ae lē o ni avanoa e saili ai se manuia o le Pasefika atoa.

O a‘u lava ia ou te lagolagoina lava avanoa e feiloai ai le tatou atunuu i soo se faigamalo. O avanoa faapenei e mafai ona sailiili ai se manuia ma se ‘ai a le tatou atunuu atoa.

Manatua lelei, o lea ua tu mai le faigamalo a le National, o le isi tausaga oi lumanai, e tulai mai ai foi le faigamalo a le Leipa. Poo ai lava le faigamalo, ae ala ona tāua ia te au feiloaiga ma le faigamalo, ona e tatau ona pue mai e le faigamalo mai o tatou lava tagata mataupu tāua e manuia ai le tatou atunuu atoa, ae lē o le saili manuia nao se vaega toalaiti.