O se tasi o vaega sa maitauina pea i le taimi atoa sa feiloai ai ma lenei foi auauna, sa maitauina ai le aga malie ma ana saunoaga, ma e foliga mai o se tasi lea o ki i lona soifua faaeaina ma le tamaoaiga, o le loto fiafia, ma aga malie. O se tasi o ana saunoaga ua faagalogata tele i lou mafaufau, sa ia ta‘ua ai e faapea o le ulavale lava, ma le lē fefe sa oo ai lona soifua i le tele o faamanuiaga ma tulaga iloga o le soifuaga.
O lana sikolasipi sa maua i Samoa, o le amataga lea o le luitauina o lona olaga a‘oa‘oina, ma totō ai se miti i lona loto, ae sa mafua mai i le ulavale ma le lē fefe.
Sa ia ta‘ua, o le tau saili o ni tamaiti i Samoa i lena vaitaimi e sue i suega mo le avanoa sikolasipi, e lei taitai oo i ai lona mafaufau, peitai o lona fia ulavale lava sa oo ane ai ma faatumu le pepa, ma maua ai lona avanoa e sue ai i le suega, mulimuli ane filifilia ai lona tagata ina ua ia ausia maka poo togi e maua ai lea avanoa.
O le ulufale foi i le iunivesite i Otago, o le mea lava foi e tasi sa ia faia, sa ia iloaina e le faigofie le avea ma fomai nifo, peitai e lei solomuli lava pe faatafa ae sa fia oo lava i ai ma faataitai, ona o le mafaufau faatamaititi Samoa, e lē fefe lava i se mea.
O le iunivesite a Otago, o loo amanaia tele i le lalolagi atoa i le tulaga o lana tusipasi, ma lana aoaoga. O le ala foi lea e faafaigata tele ai ona laasaga e manaomia mo le ulufale ai i totonu.
O le itu foi i taaloga ma faafiafiaga, o le auupega lava foi e tasi sa faaaogāina e Papalii, pe a fua i lana talanoa mai, o le lē palaai ma le ulavale, na lē natia ai foi ma le taleni sa tuu i ai e le Atua e faaogaina ai lona soifua, mo lona lava taimi. O le susuga ia Papalii Dr Peter Taouma, ua malolo litaea nei lona soifua galue, ma ua tapunia aloaia ai foi ma lana pisinisi sa tautua ma auauna ai mo tagata lautele, aemaise o tagata lava o lona atunuu o Samoa.
O ai se tasi e tulai mai e faaauauina lenei galuega taua? O se galuega e fai si oge tagata ai o tamafanau ale atunuu i lea foi matata, peitai e le oge tagata ai le Atua. Ua toatele naunau a tatou loia, tele faiaoga, anoanoai fomai ma leoleo ma le tele o isi mau galuega faapolofesa, ae tau le maua ni Fomai Nifo pei o le susuga i le Papaliitele.
Talosia ia, ia maua se vaega o le soifua aoaoina, ma le soifua galue, atoa ai ma le soifua fai pisinisi, faafiafiaga ma taaloga, o Papalii Dr Peter Taouma, e toe lu‘itauina ai lou soifua ma lou ola, ae silisili ai fanau ua taulata i le tumutumuga o aoaoga, ma faatinoina o galuega.
Manatua le vaiaso fou, mo le faaauauina o le lenei itulau, “Samoa Saili Malo”.
