Soifua taalo i taaloga ma faafiafiaga
O au sa ou fiafia tele i le taaloga lakapi, e ui lava i le mau taaloga sa mafai foi ona taalo ai i le olaga talavou, peitai o le taaloga lava lakapi sa ou fiafia tele i ai ma sa ou matua taa ai lava. O le matuā tele lava foi o uo i lea taaloga, e fai o le tele o uo sa maua i le taimi o aoga, ae oo mai foi le olaga latou i le lakapi, e ese foi ona uo ma isi tagata sa fiafia i ai.
Sa matou kegi faatasi foi ma le tuaa o le alii tautaua o Brian Williams, ma o le toeaina lena o se sui faavae o le kalapu lakapi a Ponsonby, ma o le ala foi lea sa ta fiafia ai lava ma taalo mo lea foi kalapu.
O se kalapu sa matua lagolago tele foi mo tataou tama taaalo, na iu lava foi ina aumai i ai Papaliitele Pita Fatialofa, ma amata ai foi ona iloa Fats latou i le taaloga lakapi. E leai se vaipanoa o Aukilani ta te lei iloa ona o le olaga taa i le lakapi, o malae, o paka, o fale ‘ava, e pei lava e eva i Samoa, pe a oo i ai.
O le tulaga foi i siva ma faafiafiaga, o le isi foi lea au taleni, sa ou auai ma faavae se tasi o ausiva tele i totonu o Samoa.
O le susuga ia Lemi Ponifasio ma le susuga ia Masuisui Junior Pereira, o nisi ia o au tama siva, sa iai i lau ausiva i lena foi vaitaimi, ae lei toe taliu mai i Niu Sila mo le faavaeina o le pisinisi.
O lea lava la e iai lava foi nai taga eseese o le tulaga tau siva ia, ae ua sau lava foi le matua, ua tatau ona malolo. O le ala foi lea ua tuu ai ma le pisinisi, ona ua matua foi.
O le tausaga e 1967, sa faaipoipo ai le susuga ia Papaliitele Dr Peter Taouma i se tamaitai Niu Sila e suafa ia Jan. O le faletua ia Jan Taouma, o loo avea nei ma tamaitai ulu, poo le pule o le aoga Faa-Samoa Aoga Amata i Ponsonby i Aukilani.
E toafitu o la alo, e toatolu alii ma tamaitai e toafa, ma o loo tulaga manuia uma i le itu o galuega, sei vagana le tama e toatasi o loo faaauau pea nisi o mataupu i aoaoga e oo mai i le taimi sa tusia ai lenei faamaumauga.
O le isi alo tamaitai o le susuga ia Papalii ma le faletua ia Jan, o loo faiaoga i le aoga a Vaiala Beach School i Samoa, a o le isi o loo lauiloa i faasalalauga i luga o le Televise a Niu Sila, i le polkalame o le Tagata Pasefika, le tamaitai lea o Liza Taouma.
E lei finagalo Papalii e auiliili isi vaega tau i lona lava lotoifale faaleaiga, peitai ua o gatasi foi ma le manatu o le tatou galuega, peitai ua telē lenei tamaoaiga ua sasaa mai e fai ma lu‘i i lou soifua ma lou ola galue.
