Soifua galue ma galuega
O le tausaga e 1967, sa toe taliu ai i Samoa ma amata ai loa ona galue mo le taimi muamua, ma faaaogaina ai le silafia ma le agavaa e pei ona aotauina ai, i lalo o le faamalu o le malo o Samoa.
O le tausaga e 1968 na toe taliu mai ai i Niu Sila ma amata ai loa le pisinisi, e ala i le faatuina o le auaunaga mo le vaaia o oloa ma nifo. Sa amata le tautua a le susuga ia Papaliitele Dr Peter Taouma, i le nofoaga o loo iai nei le ACC i Ponsonby i Aukilani. Sa toe siitia le auaunaga i le maota o Samoa, Samoa Fale i K Rd, i Niutone i Aukilani lava.
O le auaunaga sa manuia ai lona aiga, ae sa penefiti ai foi tagata Samoa o loo aumau i Niu Sila, aua sa faaaogaina lava gagana e lua mo manaoga o tagata o loo fia maua le fesoasoani.
E le gata i lea ae o le faaaogaina o le maota Samoa, o sona foi lea sao ma le lagolagoina o le malo o Samoa, e ala i tupe sa totogi (rent) ai lona faaaogaina o le avanoa i totonu o le fale.
O le tasi itu, sa fesoasoani tele le auaunaga ma le pisinisi a lenei tamalii, e le gata mo tagata Samoa lava latou, ae faapea foi tagata mai isi atunuu, ona o le maualalo o le totogi o galuega sa tuuina ane mo tagata.
O le lua tausaga talu ai e oo mai i le masina na tea nei o le tausaga nei lava, sa toe siitia ai le nofoaga o lana tautua i Otahuhu i Aukilani i Saute. O le nofoaga mulimuli lea sa faaaogaina, ae malolo litaea loa le susuga i Dr Peter Taouma, ina ua atoa ai lona 65 tausaga.
Soifua soofaatasi ma isi
O au o se tagata e fiafia tele e mafuta ma isi tagata. Ou te faiuo tele, ma na amata mai lava i lou laititi i totonu o aoga, e toatele nisi sa ma tou milo faatasi ma kegi faatasi, e oo mai lava foi i totonu o Niu Sila. Na oo lava i le taimi o iai i le iunivesite i Otago mo le sueina o lou faailoga, e lei aveesea ai lava lou fiafia e faiuo. O se vaega o lou olaga e le mafai e se isi ona aveesea, o le taimi foi o le faiga o le pisinisi, ua atili ai ona faatoateleina nisi ou te masani ma faauo atu i ai.
O se tasi lea o vaega fiafia o lou olaga, e pei lava ona ou tautino, e le mafai ona galo pe tea ese ma a‘u lea uiga.
O nisi o tamalii o le atunuu ua tulai mai i tofiga maualuluga, ma galuega iloga i le atunuu ma le lalolalgi atoa e oo mai i lenei vaitaimi, i soo se matata, ae sa matou faifaimea faatasi ma aooga faatasi e oo mai lava i le iunivesite i Otago.
O Ata Matamua (fomai), Kamuta Seuseu (fomai – maliu), Vaiao Eteuati (taitai o le Ekalesia Metotisi) Logova, Simanu Fulu (PagoPago Amerika Samoa), Situfu Tanielu (faifeau toeaina o le EFKS), Alo Anesi (GP i Samoa), Le Mamea Ropati (sui o le palemene), Moana Soonalole (fomai nifo), Falefatu Sapolu (Faamasino sili Samoa), Patu Simanu (peresitene Koluse Mumu i Samoa) Burns Wallwork (fai pisinisi i Dawson Rd, Aukilani), Neroni Slade (Faamasino maualuga o le lalolagi), Fiamalua, Tile Laumea (sui o le Palemene – maliu), Fiti Ieriko, Latu Lome (sui o le palemene), Oscar Meredith, Uiva Vagana, (faifeau PIC North Shore).
