Soifua aoaoina
O le susuga ia Papaliitele Dr Peter Taouma, sa aoaoaina i le kolisi o Samoa, (Samoa College) i Samoa e oo mai i le tausaga 1959. Sa maua le avanoa e faasikolasipi mai ai i Niu Sila, ma sa malaga mai ai loa, ma faaaoga lea avanoa tāua tele e faaauau ai aoaoga i le aoga maualuga i Whangarei.
O le avanoa sikolasipi sa mauaina a o iai i le Form 3 i le kolisi o Samoa. Sa ta‘ua e le susuga ia Papaplii o ia ma Uiva Vagana sa mauaina lea faamanuiaga. E pei ona silafia, o Uiva Vagana, o loo avea nei o se faifeau tausi nuu, ma o loo galue pea e oo mai i le taimi nei, i le ekalesia PIC i North Shore, i Aukilani.
O le mae‘a o le taumafai i le aoga maualuga i Whangarei, ona agai ai lea mo lona taumafai i le iunivesite i Otago, mo le faamoemoe i le galuega faafomai nifo.
Sa muai a‘oa‘oina i lona tausaga muamua i le iunivesite i le galuega fomai, ona faatoa ulufale ai lea i le matata tonu sa agai i ai lona faamoemoe ma naunau i ai, ina ia avea ma fomai nifo (dentist).
Sa manuia le taumafai, ina ua pasi le sitepu muamua, ma faaauauina ai loa le taumafai mo isi tausaga i Otago lava.
E toatele nisi o tamafanau a le atunuu sa a‘oa‘oina faatasi ma Papalii, i le iunivesite lava lea i Otago, peitai e na o le toatolu sa iai faatasi i le a‘oa‘oina o le mataupu tau oloa ma nifo. O le susuga ia Ata Matamua, o loo soifua pea ma le susuga ia Kamuta Seuseu, ma ua maliu lea foi tamalii o le atunuu, e pei ona faamaonia mai e Papalii.
Sa solosolo lelei ma iu manuia a‘oa‘oga seia oo lava i le taunuuga o le faamoemoe, ma tauaaoina foi tusipasi ma tusi faamaonia o le galuega fomai nifo. Sa toe taliu i Samoa ina ua mae‘a le faauuga ma faaiuina foi ma le loto fiafia ma le viiga o le Atua.
