O le amataga o le masina o Novema lea ua faalauiloa mai e le Tautua Samoa o le a faia ai se faiga palota a le Vaega Faaupufai lenei e saili ai se o le a tulai mai i le tofi Peresitene ma se Komiti Faafoe fou.
O se faasilasilaga lea ua faia e le Vaega Faaupufai i se fono ma tusitala i le faaiuga o le vaiaso ua tuanai atu.
O le tofi lea o le Peresitene e pei ona silafia sa umia e le Afioga Vaaelua Eti Alesana lea ua tuumalo.
O se faiga filifiliga foi lea ua faaalia e le Vaega Faaupufai o le a faapea ona filifili mai ai loa ma ni sui e umia tofiga o se Komiti Faafoe mo le Tautua Samoa.
O le taimi lenei o le taitai o le Tautua Samoa o le Afioga Palusalue Faapo II ma o loo sui taitai o A‘eau Peniamina.
O le Afioga Vaaelua Eti Alesana o le uluai Peresitene lea o lenei vaega faaupufai talu ona faavae mai i le tausaga na tea nei. O le tofi Peresitene na faaee ia Vaaelua ae ua toe o ni vaiaso amata le faiga palota a le atunuu ia Mati.
O se sui o le Tumuai Tutusa – lea na tuufaatasi ma isi vaega faaupufai laiti ina ia maua le Vaega lea ua ta‘ua nei o le Tautua Samoa.
O ma‘i o le tino na tuumalo ai Vaaelua Eti ma o lea na molimauina ona toe sauniga i Lalomalava Savaii i le vaiaso na tea nei.
O le tofi Peresitene ua lē fuatasi na o sui faipule o le Palemene mo le Tautua Samoa ae o ni tofiga nei e mafai ona palota i ai sui lesitala o le vaega faaupufai.
Ua lē gata la i le tofi Peresitene ua iai foi le manaoga o le Tautua Samoa – ua tatau lava ona faamautu le Komiti faafoe lea e pei o le Failautusi, Teutupe atoa ai la ma le tofi Peresitene ma le Sui Peresitene foi. E lē masani ai Vaega faaupufai o Samoa ma tofiga faapea ia latou pulega ae o le taimi muamua lea ua iai ni tofiga Peresitene e pei ona sa tofia ai le Afioga Vaaelua Eti Alesana.
O le Vaega Faaupufai o loo tulai mai i le Malo i le taimi nei, o loo iai lana komiti faafoe – le Vaega faaupufai lea e Puipuia aiā tatau a tagata, le HRPP.
E iai lona taitai le Alii Palemia lea e palotaina lava i tausaga uma ma o le Taitai lava o loo i le Susuga Tuilaepa Lupesoliai Sailele Malielegaoi.
O le isi tofiga ua faapea ona aofia ai le Failautusi ma le Teutupe ae o tofi Peresitene e pei o tofiga nei o loo ua vaaia i vaega faaupufai i atunuu e pei o Niu Sila ma Ausetalia, ma e tele ina umia e i latou e lē o ni faipule o le Palemene ae o sui lesitala lava o lea vaega faaupufai ma lea vaega faaupufai.
O le faaiuga o le vaiaso na tea nei sa auai atu uma ai le Tautua Samoa i Lalomalava i Savaii e faamavae i lo latou Peresetene ina ua lagomau o ia i lona aiga.
O le afioga Vaaelua Eti Alesana o se tasi lea o alo o le Afioga i le Tootooalii, Tofilau Eti Alesana lea na tulai mai i tausaga e tele i le taitaiga o le Malo ma le Vaega faaupufai o le HRPP.
