Ua sola le tausala a le atunuu tuaoi o Fiti, le tamaitai o Alisi Rabukawaqa, e 24 tausaga le matua, ma le manumalo o le tauvaga na faia i le po o le Aso Toonai talu ai, na sailia ai se lalelei poo se Tausala o le Pasefika i Saute.
O le Tausala o Samoa, le tamaitai o Olevia Ioane, e lei maua sona tulaga, ma e lei faamanuiaina foi i se faailoga faapitoa, poo Special Prizes. Ua fai si umi e lei toe manumalo se Tausala o le tatou atunuu i le tauvaga tele nei, e sailia ai se Lalelei o le Pasefika.
Ma e ui e lei manuia le taumafai a le atunuu, ae o le lagona taatele lava pe a lē tau lau o se faamoemoe, o le onosai ma tatalo auā e toe oso foi le lā.
Faasologa o le Tauvaga:
Miss South Pacific 2011-2012 : Miss Fiji – Alisi Rabukawaqa
1st runner-up: Miss Hawaii – Kawena Ka-Malamalama-O-Nalani Souza
2nd runner-up: Miss Tonga – Liberty Hinalei Afeaki
3rd runner-up: Miss Papua New Guinea – Sarah Kila Karo
4th runner-up: Miss Cook Islands – Uirangi Bishop
Faailoga Faapitoa:
Miss Internet – Papua New Guinea
Best Interview – Miss Fiji
Best Traditional Wear – Miss Fiji
Best Sarong – Miss Hawaii
Miss Photogenic – Miss Hawaii
Miss Personality – Miss Tonga
Miss National Tourism – Miss Tonga
Tausala o le Pasefika ma ona suiga i le 25 o tausaga
O tausala nei o le Pasefika mai i atunuu e iva (9) na fai i ai le tauvaga e saili ai se Tausala o le Pasefika 2011/2012. O tamaitai nei na fai ma sui o Fiti, Tonga, le Atu Solomona, Tokelau, Hawaii, Atu Kuki, Amerika Samoa, Papua Niu Kini, ma le tausaga o Samoa.
O le tamaitai ia Joyana Meyer o le Atu Kuki lea na umia lea tofiga mo le tausaga ua mavae atu. Ma na faaalia lona lagona faanoanoa ona o le a uma foi lona taimi, peitai na ia ta‘ua le tumau pea i lona loto o le tele o lesona tāua na ia a‘oa‘oina mai a o ia tauavea ai le tofiga mai le tausaga 2010 seia pā‘ia mai lenei tausaga.
O le tausaga lenei ua talimalo ai Samoa i lea tauvaga ma ua tele foi nisi o suiga ua toe talosaga ai le Komiti faafoe e nafa ma le tauvaga, i nisi o itu tāua e tatau ona toe faafoi mai o le tauvaga, e pei o le tapu lea ona faaaogā e tamaitai tauva o ni seevae muliuumi (high heels) ma le faaaogāina o le popo o se tasi o vaega o lenei tausinioga sa taofia foi i ni tausaga ua mavae. O le faaaogāina o le popo ua ave ai le faatāua i le tomai o le sui tauva e mafai ai ona ta le popo i se galuega taulima e fesootai ma fe‘au ma galuega i totonu o atumotu o le Pasefika.
O le tausaga lenei ua atoa i ai le 25 o tausaga o lenei tausinioga, ma e manino lava le tele o suiga ma isi faiga fou ua aofia ai.
O Samoa o le atunuu lea na faavae mai ai lenei tauvaga, ma e tailua lava tausaga ma toe foi mai i Samoa le tausinioga. O le vaiaso atoa lava na fai i ai faaiuga i tamaitai nei a o asiasi solo i nofoaga eseese o Samoa.
O le tausaga na tea nei na talimalo ai Papua Niu Kini, ae o le tausaga i ona tua atu na faatautaia ai i Fiti. E lē o toe iai foi se isi laasaga i luga atu pe a mae‘a le Tausala o le Pasefika – e lē tauva tamaitai i le tauvaga a le Lalolagi poo le Tauvaga a le Miss Universe. O lona uiga o le faatumutumuga lenei o tauvaga tausala mo tamaitai lava ia o le Pasefika.
Sa iai foi atugaluga na laga i tausaga ua tuanai ona o le manatu o le atu Melenisia e lē maua lava e tamaitai o le latou itulagi le manumalo ona o le taulai a le tele o faamasino o lenei faaaliga tausala, ua vaavaai ai i le matagofie poo le aulelei faa-Polenisia.
E lē o aofia ai le vaai i tamaitai Melenisia ma Maikeronisia, ma o le mafuaaga lea ua vaaia ai foi le tele o le suiga ia i latou e faamasinoina lenei tauvaga ina ia mautinoa e lē faaituau le vaai a tagata Polenisia ua na o foliga Polenisia e tatau ona manumalo i ia tausinioga.
E tasi lava le sui o le atunuu e lē mafai ona agai mai nisi e nonofo i Niu Sila ma Ausetalia poo Amerika foi e ese le latou sui, ma o le mafuaaga lea e saili uma tamaitai mai i atunuu ia i le sailiga o le tausala o le motu, ona faato‘ā tausinio lea i le tauvaga lenei, e pei ona iai se mataupu na laga mai e le Tausala Samoa Niu Sila, lea ua lē mafai ona tauva i lenei tauvaga ona sa tatau ona agai mai i Samoa e tausinio ai ma fai ai ma sui o Samoa atoa i soo se itu o le lalolagi.
Mo Niu Sila lava ia o loo iai le tausala a Maori e tatau ona tauva, ae o le tausaga lenei ua lē vaaia se tausala a Aotearoa i lenei tausinioga. I se feiloaiga foi a tusitala ma tamaitai tauva i le vaiaso na tea nei na fesiligia ai foi tamaitai tauva i so latou lagona pe tatau ona faaaogā e le tamaitai lana ia lava gagana i le taimi e faagasolo ai le tauvaga e faaalia ai le faatāua o lau lava gagana.
O lea na latou faaalia ai e ui o le toatele o i latou e lē iloa tautatala ia latou lava gagana, ae na latou ta‘ua le tāua foi o lea manatu auā e lē gata ina iloa ai le atunuu e sau ai, ae faapea foi ona faailoa atu ai i tagata le tatau lea ona toe tapu‘e ma toe faaolaola mai a tatou gagana ua tauau ina mou atu. O le isi la lea suiga ua faamalosia nei, o le tatau i tamaitai tauva uma ona tautatala ia latou lava gagana e ui o le gagana aloaia lava o le tausinioga o le Faa-Peretania.
O loo tumau le tauvaga o ie sulu ‘ao‘ao ae ua lē faatagaina faaaliga o ofu taele. Ua faapea foi ona faamalosia lava tausinioga o ofu faaleaganuu a atumotu taitasi ae o loo tatala le avanoa i taleni i soo se tomai e oo i ai taleni a tamaitai taitasi. O isi vaega tāua o lenei tauvaga o loo tumau, o le faatalatalanoaga lea e faaopoopo ia latou folasaga ua tuu i ai a o lei mae‘a le vaiaso o tausinioga. O isi aiaiga faaopoopo e aofia ai taavale teuteuina ma palota i luga o le initaneti, o le tamaitai tausaafia ma le tamaitai e atalelei i ata e tapu‘e o le vaiaso atoa.
