O se alii talavou luasefulu ma ona tupu tausaga le matua e galue i se kamupani e faaleleia ma faapipii masini ea malulu poo air condition, e lei atoa se 24 itula na taofia ai i le falemai o Tupua Tamasese Meaole mo togafitiga ae maliu.
Na faaalia e le sui Komesina o leoleo le afioga Afamasaga Michael Soonalole, o loo faia suesuega i le mafuaaga tonu o le faalavelave ae pau le faamatalaga ua oo atu i leoleo, o lē na aafia sa faapipii se ea malulu o se tasi o maota maualuga o le ofisa o le tiute le Customs office, ma afaina ai lona soifua.
“Fai mai e lei iloa e le tama o le tioata le isi vaega o le floor lea na tu ai tae le tioata, le mafuaaga na palasi ane ai i lalo”, o le saunoaga mai lea i le sui Komesina.
O se molimau o se tausi soifua poo se nurse i le maota gasegase o Tupua Tamasese Meaole na faaalia ai, e tigaina tele aafiaga o le taulealea ona o lona ao poo lona ulu sa afaina. O le Aso Tofi na tea nei na tupu ai le faalavelave i le aoauli, nanati loa i le falemai mo se laveai. Peitai o le Aso Faraile na sosoo na siliga tali i seu taumafaiga a fomai ma maliu ai lava le taulealea.
E lē o mafai ona faailoaina mai e leoleo le maota tonu i le taulaga na tupu ai le faalavelave ona o loo faia suesuega. O se molimau e lei faamaonia ua faailoa mai ai o se tasi o maota maualuga e lei leva tele ni tausaga talu ona faaaogā, ma o loo iai nisi o ofisa o le Malo.
O se faalavelave ua fesiligia ai le saogalemu o tagata faigaluega e faatinoa ia ituaiga o galuega, pe a oo ina faatino ni galuega i ni fale tetele aemaise lava pe afai e faaleleia ni vaega i fafo o ia ituaiga o fale faaonapo nei.
Ua ta‘ua e se molimau o lea ua faia foi se suesuega a le Matagaluega o Leipa e vaaia le saogalemu o tagata faigaluega, faapea foi ma le Faalapotopotoga o Taui o Faalavelave faafuasei le Accident Compensation Corporation.
O loo agai suesuega i le pulega o le maota sa faia ai le galuega, faapea foi le konekarate sa faigaluega ai lē ua maliu. Na faamatala ma le ootia se tasi o tina sa iai i le falemai i le taimi na taunuu atu ai lē na aafia ona o foliga tigaina o le taulealea.
“Na tatala e fomai ma tausi soifua ona lavalava se‘i tau fai togafitiga ae na maua i le taga o lona ofuvae se pepa fai vai inu suamalie”. O loo iai le faamoemoe o se aso o lenei vaiaso fou e faia ai toe sauniga o le alii talavou mai le afioaga o Fagalii, ma e maliu o ia i le faatinoga o lana galuega e lei fai toalua.
