Ua faaalia e se sui sinia o le Konekarate Faufale o le Fletcher o loo i Samoa, o si alii na maliu i le vaiaso na tea nei i le latou galuega o loo faagasolo i Malifa, sa sipaka ma mafua ai le pa‘ū mai i le fogafale tolu o lea galuega tele. O le taeao o le Aso Lua o le vaiaso na tea nei lea na tulai mai ai lea faalavelave tusa ma le iva i le taeao.
Faaalia e lea sui sinia o le Kamupani faufale o le Fletcher, e lei leva ona amata galuega o le aso ae tulai mai loa le faalavelave. Na fesiligia le alii lenei pe aisea lava ua pa‘ū mai ai lē ua maliu, le alii o Mulivai Sakaio o Taga i Savaii, mai i lea nofoaga, ona e foliga mai o loo lautele lava le vaega o faasitepu lea na tu ai. Peitai o le mafuaaga e pei ona ta‘ua na sipaka si alii ma tulai mai ai le faalavelave.
E tatau ona aloaia mai i le taotoga o lea alii le mafuaaga tonu o lona maliu ma na ta‘ua e leoleo o le vaiaso lenei e tatau ona faamautu ai lea tulaga. Ta‘ua e le aufaigaluega na vaaia le faalavelave ina ua tulai mai, na tau sa‘o lava i lalo le ulu o le alii lenei ina ua pa‘ū ma na faatopetope i le falemai tele i Motootua mo togafitiga, peitai e lei leva ona oo atu ae maliu loa o ia.
Na ta‘ua foi e le alii ta‘ita‘i leoleo, o le sui sooupu o le Matagaluega o Leoleo ma Falepuipui, le afioga Leaupepe Fatu Pula, o le lipoti ua oo atu, o lenei alii e mai i Satuimalufilufi, e ogaoga tele manu‘a o lona ao ma o inā e masalomia lava na lē mafai ai ona toe laveai mai lenei alii. O Mulivai Sakaio o se tamā e toalima ona alo.
O le toatolu ai lenei o tagata faigaluega i galuega tetele a le Malo ua maliliu i totonu o le tolu tausaga. O le alii Saina na galue i konekalate a Saina ia na fausia faletaalo o Taaloga o le Pasefika i Saute, na pa‘ū i ai le iviivi o se tasi o faletaalo i le Apia Park ma maliu ai lava.
O le tausaga na tea nei lea na maliu ai se alii na galue i le eliina o paipa e sau ai le suavai lafoai mai le fale ua faamamā ai vai leaga i Sogi. O lea alii na tanumia i se uta o maa ma palapala a o iai i le lua na galulue ai mo le faataatitiaina o paipa e ta‘i atu ai le suavai. O le lona tolu ai la lenei o alii ua maliu i le galuega lea ua fausia ai le Maota tele o le Matagaluega o Aoga, Taaloga ma Aganuu i Malifa.
