O se finagalo lea o le Sui Sooupu o le Matagaluega o Leoleo ina ua tāpā mo se finagalo faaalia o le Matagaluega i le faamaonia ai o moliaga o le faia o amio matagā faasaga i se leoleo sinia.
O lē ua faamaonia moliaga e lima faasaga ia te ia, o Tafilipepe Fineaso Aimaasu, o se alii Taitai Leoleo na ave e le Toomaga mo Ē Puapuagatia i le Faamasinoga.
O le gaioi mai a le Toomaga ona o le oo atu o se alii talavou (faafafine) e faitio i le fiu e taumafai sana tagi i le Ofisa o Leoleo ae e lei oo lava se tagi i le Faamasinoga.
Ua ia tuuaia le alii leoleo i le faia o ni sauāga matagā faasaga ia te ia a o tuli ai sona faasalaga faasolitulafono i Olomanu, le nofoaga mo alii talavou ua faamaonia solitulafono ae ua lē mafai ona faasala faafalepuipui i Tafaigata ona e laiti.
O le alii leoleo ua faamaonia nei ona moliaga sa faauluulu i ai lea nofoaga ina ua tulai mai ia moliaga.
Faaalia e le Komesina Lagolago, o le sui sooupu o le Matagaluega o Leoleo ma Falepuipui, o se mataupu ma‘ale‘ale tele lenei, ma o le tuuaia o se tasi ua tele tausaga o galulue faatasi “e le faigofie”.
“Ae o le faaiuga ua aumai e le Faamasinoga ua unaia ai ma le tulaga lea, pe o oe o se Leoleo pe leai, e leai lava se tasi e mafai ona maualuga atu i le Tulafono,” o se saunoaga lea a Leaupepe.
Faaalia e Leaupepe na faamalolo lava Tafili Fineaso mai ona tofiga faataitai leoleo ina ua oo le mataupu i le Faamasinoga, ae na maua lava lona totogi ona sa tālia se faamaoniga o nei tuuaiga mai le Faamasinoga.
“O lea la ua iai nei le faamaoniga, e mautinoa lava e lē mafai ona toe faigaluega o se leoleo.
E lē faigofie le tulaga ua iai lenei mataupu, ae e pei lava o isi ofisa o le malo ma kamupani tuma‘oti, o ai lava e faamaonia ua soli le tulafono, aemaise ia i latou ua ta‘ua o Malu o le Malo, o lona uiga e pa‘ū lava le samala i le ulu o le fao,” o se saunoaga lea a Leaupepe.
E tasi le moliaga ua faaleaogāina e le Faamasinoga, o le moliaga lea o le faia o faiga faa-Sotoma, ae na matua teena uma e lenei alii ia moliaga uma.
O le tausaga na tea nei lea na tulai mai ai lenei mataupu, ma na ta‘ua e le alii na tagi, o le mae‘a ai o le tulai mai o nei sauāga ina ua magalo na alu ai i se tasi o le vaega o suesuega a le Matagaluega o Leoleo, peitai na toe tulai mai se isi moliaga o le gaoi faasaga i lea alii ma ua matua nei, ua ave ai loa e le Faamasinoga i le toese i Tafaigata.
E alu atu foi i le toese ua galue mai ai Tafili Fineaso, ma na toe foi mai loa ua mae‘a ona tuli lea foi faasalaga, alu sa‘o loa i le Toomaga mo e Puapuagatia.
O le aso 20 o Iulai lea ua tolopo i ai lenei mataupu ina ia tālia ai le iuga a le Faamasinoga e faatatau i lea alii leoleo sinia, ae o loo tumau pea le tetee o Tafili Fineaso ma lana faamatalaga faapea, o loo iai nisi o loo taumafai lava e faaleaga lana auaunaga faaleoleo.
