Pa‘e le saito i Initia – Galuega faamisionare Solomona & Sola Chand

O le malaga faamisionare i Initia a le susuga ia Faafeagaiga Solomona ma lona faletua Sola Chand, faapea nisi o le ekalesia Living Water Christian Church i Aukilani.

O loo faagasolo nei a latou tala‘iga faamisionare i totonu o le aai to Tirupati o se aai ua maualuga tapuaiga i tupua ma malumalu o atua faapaupau aemaise tapuaiga faa-Hindu ma le Moselemi.

I se lipoti mai le imeli a le faletua ia Sola, na ia faaalia mai ai le toatele o tagata o le atunuu ua faapologaina ma faamativaina ona o talitonuga o loo faaseseina ai.

“Viia le mana o le Atua soifua ma lona alofa tunoa i le ofigofie o lana Afioga Paia i soo se taimi ma soo se mea o loo folafolaina ai.

Ua molimauina le toatele o agaga ua faaolaina ma faasaolotoina i le mana o le tala lelei o Keriso talu ona amataina lenei talaiga”.

Pau lava le mea faigata o le gagana ma le taumafai e talanoa ma tagata, ona e ese foi a latou tu ma aga, ae o se faamalieina o le loto ma le agaga ona o le vaaia lea o tagata ua liliu ia Keriso.

O le tele o tagata o lenei atunuu e matitiva, tele faamai, toatele e leai ni fale e nonofo ai, e momoe solo i luga o auala.

O loo momoli mai le agaga faafetai mai le susuga i le faafeagaiga ma le faletua mo a latou uo faifeau ma aiga aemaise le au Kerisiano, ona o le tatalo mo le latou faigamala faamisionare e viia ai le Atua.