Ou te talitonu ua matua faanoanoa le Ekalesia PIC i Otara, ae maise le susuga i le faafeagaiga Toeaina o Reverend Aotofaga Lemuelu ina ua tuualemalo e le tina o le Ekalesia, le faletua peleina ia Gafatasi Lemuelu.
I le matou mafutaga ma le susuga i le faafeagaiga ia Lemuelu faapea le faletua ia Gafatasi, ua fai nei i lagi lana faigamalaga, ou te matua molimauina le alofa o lenei tama ma le faletua i le Ekalesia ma le komiuniti lautele. E finafinau ma galulue tauivi i le taumafaiga e fesoasoani i le atinaeina o aiga taitasi, e le gata i le itu faaleagaga, ae faapea foi le itu faaletino.
O le tautua a le Ekalesia PIC Otara mo tagata lautele ou te talitonu o le molimau lava lea i le Susuga i le Toeaina o Lemuelu ma lona faletua o Gafatasi. E ui e tele nisi faifeau sa muamua avea ma taitai o le Ekalesia PIC i Otara talu mai lona faavaeina. Ae ou te talitonu e sili atu ona mafanafana le mafutaga a Lemuelu ma Gafatasi ma le Ekalesia PIC Otara ma le lautele o tagata i Otara ma Manukau.
O le Ekalesia PIC Otara o le Ekalesia muamua lenei sa auauna mo tagata Pasefika i le faatoa amataina mai o le faavaeina o Otara mai le faaiuga o tausaga 1950s.
Sa auai i lenei Ekalesia le tele o tagata Pasefika e iai Samoa, Niue, Rarotonga, Tonga ma le toatele o i latou ua faatoa taunuu mai i Niu Sila ma o loo tau atiae o latou aiga ma faamautu i Otara ona e latalata ane i galuega i Otahuhu, Mt Wellington, Penrose ma Ellerslie.
O le Ekalesia foi lenei sa muamua ona faavaeina ni polokalame o aoaoga, e faatino e tupulaga matutua o loo aooga i iunivesite, ina ia fesoasoani i tamaiti aoga i kolisi mo a latou tapenaga i suega o le School C ma le University Entrance (1972).
E le gata i lea a o le Ekalesia foi lea sa faamaopoopoina tupulaga talavou Pasefika i le amataina lea o au kirikiti Pasefika e tauva i taaloga kirikiti a papalagi i Aukilani aoao (1970-1979).
I le matou mafutaga o a’u, faapea le faipule o Manukau East o Ross Robertson, ma le pulenuu o Manukau o Len Brown, o le Ekalesia PIC Otara, aemaise le susuga i le toeaina ia Lemuelu ma lona faletua o Gafatasi, o se mafutaga ou te talitonu e taua tele i talafaasolopito o Otara lava.
O le masani a le vaega faaupufai a le Leipa i Otara lava, a oo ina tapena faiga campaign i le sailia o tofi o Otara mo le pulega o Manukau poo tofiga foi o le palemene, e muamua lava ona matou asiasi i le Ekalesia PIC Otara. Aua e lauga faufautua mai lava le susuga a le faafeagaiga i tiute tauave i aso taitasi ma momoli mai ana faamanuiaga faapea faamanuiaga mai le Ekalesia mo i matou o loo sauni i faigapalota. E pei ua masani lava le matou vaega i le asiasi atu i lenei tama o le Ekalesia e saili mai ana faamanuiaga a o alo atu i taaloga faapolokiki.
E le faapea ua matou agai i ai ona o ia ua polokiki, e leai. E mafua ona taua lenei mafutaga, aua o ia o se tama e saunoa sa’o i mea e tatau ona fai mo le faaleleia o le atiae o aiga o tagata lautele. E le poi foi sana faamatalaga pe afai o iai ni sese i le matou galuega.
A maea foi le campaign ua maua se ai pe leai, o le matou masani lava o le toe foi e failotu faatasi ma le Ekalesia PIC Otara, ma momoli i ai le matou faafetai ia latou tapuaiga.
I soo se taimi o lenei mafutaga, o le toeaina lava ia Lemuelu e matou te faafeagai, a o si faletua ia Gafatasi e maitauina pea ona fofoga fiafia faapea nai ona uiga tausaafia i le tali lelei mai o tagata asiasi atu.
O uiga filemu ma le tausaafia ia o le tina ia Gafatasi, e faigata ona faagaloina ma o loo ou teulotoina. O ia o se tagata e tausi mamalu aua le feagai ai o le Ekalesia ma ana malo asiasi. O ona uiga ia e molimauina ai lona alofa tele ia Lemuelu aemaise lana Ekalesia PIC i Otara. O se tina Kerisiano ma faamaoni lona alofa ma e iloa gofie i lana tautua a o tatou faatasi ai i lenei olaga.
Ua avea foi i laua e pei ua faamatua i ai i matou o loo galulue i tulaga faapolokiki matou te faalagolago tele i ai i fautuaga e tusa ai ma galuega o loo feagai ai.
Ou te faafetai tele mo Gafatasi aemaise le susuga i le faafeagaiga faapea le mamalu o le Ekalesia PIC i Otara mo galuega lelei uma.
Ia alofa le Atua e faamafanafana i le Susuga i le Toeaina ia Lemuelu ma le fanau faanoanoa, faapea foi ona faamafanafana atu i aiga e lua ma le Ekalesia.
Ia manuia lau malaga Gafatasi, ia maua sou nofoaga tumau i le lagi.
