Le ulugalii fou ia Tolu ma Clareita ma a la uosili ma aumea mamae

Le ulugalii fou ia Tolu ma Clareita ma a la uosili ma aumea mamae

E lei faigofie i le tamā ia Taupau Fetulele Taupau le taimi o le sauniga a’o ia momoliina atu lona alo tamaitai ia Clareita Taupau e fai ma manamea a le alii ia Tolu Tuu’u Uuga Talo Ofisa. O le faigata i le tamā ona o le ulumatua lea o lana fanau ae o se teine e faagalo gata foi ona uiga i totonu o le aiga. O le auau tele o Taupau Fetulele ma Juliana i le la’ua alo na tutupu ai lagona o le alofa i mātua i le taimi o le sauniga, ma faaaogāina ai e le tamā ia Taupau le upu momoli e momoli atu ai lona alo tamaitai ia Clareita i lima o Tolu e fai ma ana ava faaipoipo.

O lagona o le tamā e faapea, na te lei faaaogāina le upu foai e foai atu ai lona alo tamaitai i le taimi o le sauniga, ona afai na te faaaogāina le upu foai atu, o lona uiga e peiseai ua motu ma le taula ua lē toe iai se leo o mātua e faufautua iai i le aiga o le fanau, ae e sili atu ia te ia le faaaogā o le upu momoli atu, auā a momoli atu, ae alu alu suaga o le vaa tele o le la aiga ae lē toe manaomia e Tolu lona alo tamaitai, ia ona toe momoli mai lea i o laua lima se’i toe faaatoa ai lona fatu, auā o le ‘afa lea o lona fatu lea ua aveese atu.

O loimata e to faatimu sa iai i le taimi o le sauniga o le Misasa auā o lē sa pele i le loto ma le agaga aemaise o lē sa faamoemoe iai mea e fai o le aiga a’o lea ua alu ese atu. E ui i le faigata o le momotu o mafutaga o mātua ma fanau, ae ua tuuina atu lava i laua se’i faavae lo laua aiga ae lē tuua ai lo latou titi faitama i le lagolago ma faufautua i le amataina o le la aiga fou.

Le tamaitai faaipoipo o Clareita ma nai ona mātua o Taupau Fetulele ma Juliana

Le tamaitai faaipoipo o Clareita ma nai ona mātua o Taupau Fetulele ma Juliana

O upu tima’i na saunoa iai le afioga ia Patele Michael Endemann i le taimi o le sauniga e faapea, ia faatāuaina le avea o le tamā ma ulu o le aiga ae ia avea le tina ma ua o le aiga. O le tina o le pae ma le auli i totonu o le aiga, ua faatusaina foi la o lē ua na te feluia’iina le ulu i soo se mea e lelei ai le aiga, auā a leai le ua e lē mafai ona migoi le ulu i le mea e fia faasaga iai.

O le tāua la o le galulue faatasi o le ulu ma le ua i le tino o le tagata o le manuia foi lea o le tagata, e fapena foi le aiga, ia tāua le galulue faatasi o le tamā ua avea ma ulu ma le tina ua avea ma ua i totonu o le aiga, o le manuia foi lea o le aiga i le lumanai ma ia faavae mea uma ia Iesu. Ua lava tapena le oso o le aiga fou o Tolu ma Clareita i le amataina o le la aiga i le taimi o le sauniga o le Misasa e pei ona ta’ita’ia ai e le afioga ia Patele Iosefa Euese ae o le upu folafola a le Atua na fofoga lea e Patele Michael Endermann, faatasi ai ma faamanuiaga ma alofaaga a aiga na lua faapea uo ma ē masani sa faatasi mai e molimauina le tuufaatasia o le alii o Tolu ma Clareita i le sauniga o le faaipoipoga. O ē na malaga mamao mai i Ausetalia, Amerika faapea ma Samoa sa molimauina le aso fiafia o le fanau.

I molimau a mātua o le alii o Tolu le tamā ia Tuu’u Uuga Talo Ofisa ma le tina ia Motiana Ofisa na talatala ai i le olaga o le laua alo mai lava i lona laititi seia oo mai lava ina matua, o se tama na faafailele mai lava lona olaga i le ekalesia Metotisi i Otara, mai lava i le Aoga Aso Sa, autalavou ma le lotu lea lava ua oo mai lona olaga fai aiga, o loo tumau pea lona fiafia i taiala ma auala aemaise o lona faasinomaga na a’oa’oina ai lona olaga e ona mātua.

O lea foi faatoa iloa lea ua alu ese mai Tolu ma le aiga aemaise o laua o mātua ina ua fai lona aiga, ae o loo tumau pea lo laua lagona faamātua i le la tama ona o se tamaititi e lē mafai ona alu ese ma mātua i taimi uma o lona olaga. Pe fai lava la le aiga o Tolu o le a tutū pea i tua o le aiga o lana fanau ma faufautua ma lagolago i mea e manaomia i totonu o le la aiga.

Le alii faaipoipo o Tolu ma ona mātua o Tuu’u Uuga Talo Ofisa ma Motiana

Le alii faaipoipo o Tolu ma ona mātua o Tuu’u Uuga Talo Ofisa ma Motiana

O le susuga ia Vaipou BJ sa fai ma fofoga o le aso ae o le tofa ia Futi Tele’a Tali sa fai ma sui o aiga na lua e momolia le agaga o le faafetai i le paia o le aufaigaluega a le Atua sa faatasi atu i lea aso aemaise o le mamalu o le auvalaaulia, o ia foi sa gafa ma faaaloaloga i le taimi mulimuli.

O alofaaga ma faamanuiaga o aiga na lua na saunia ai le tele o faafiafiaga eseese lea sa maualuga ma matagofie ai le aso o le fanau, faatasi ai ma faamanuiaga a aiga uo ma ē masani na tuufaatasia i luga o upega tafailagi ma cards. Ia manuia le aiga fou!

O le susuga ia Tolu Ofisa e mai le afioaga o Manono, Safotu ma Mulivai, ae o le tamaitai ia Clareita Taupau e mai le afioaga o Faleapuna, Saleimoa, Leulumoega, Manono ma Palauli. Ua faigaluega uma i laua auā le tausiaina o la aiga aemaise o le amataina o le la aiga fou.