1. Malaga le Alii Palemia i le Fono a Taitai o Malo o le Pasefika
Ua faamaonia e le Kapeneta le auai atu o le Afioga i le Palemia, Tuilaepa Sailele Malielegaoi, i le Fono a Taitai o Malo o le Pasefika lea o le a faia i le aso 4 – 7 o Aukuso 2009 i Cairns, Ausetalia.
O lenei feiloaiga o le a silasila ai Taitai o atunuu o le Pasefika i nisi o mataupu e pei:
Aafiaga o le tamaoaiga o atunuu o le Pasefika ona o le tulaga faaletonu o loo iai le tamaoaiga o le Lalolagi
Nisi o auala e ono faaitiitia ai nei aafiaga
Tulaga i feagaiga i fefaatauaiga i le va o atunuu o le Pasefika, Niu Sila ma Ausetalia
Lipoti lata mai o galuega fesoasoani i Solomona
O le po anapo na tuua ai e le Afioga i le Alii Palemia le atunuu, ma o le a auai muamua atu i le Fono a Malo o le Pasefika ma le Malo o Farani, lea o le a usuia i Niu Kaletonia, i le aso 31, Iulai 2009 faapea ai ma le Fono a le Lowy Institute mo Faiga Faavae Faavaomalo o le Lalolagi, lea o le a usuia i Brisbane Ausetalia i le aso 2 – 3 Aukuso 2009.
O le a auai faatasi atu i ia Fono le Afioga i le Alii Palemia, ma le Pule Sili o le Matagaluega o le Vaifafo ma Fefaatauaiga, Aiono Mose Pouvi Sua. Ua faamoemoe foi e faatasi ane le Hai Komisina o Samoa i Ausetalia, Lemalu Tate Simi i Fono o le a faia i Brisbane ma Cairns.
2. Feiloai le Asosi o le Au Tusitala a le Pasefika i Vanuatu (PINA)
Ua faamaonia e le Kapeneta le auai atu o sui o Samoa i le Fono a le Asosi o le Au Tusitala a le Pasefika (PINA), lea e usuia i Vanuatu i le aso 29 o Iulai 2009.
O lenei Fono o le a soalaupule ai le mataupu e uiga i le aveeseina mai o le Ofisa Tutotonu o le PINA ma le PAC News mai Fiti, ma o le a sailia ai se isi atunuu mo le faamautuina o nei Ofisa taua ona o tulaga maaleale ua silafia e pei ona iai faigamalo a lea atunuu. O le a faapea foi ona tuuina atu ai ni mataupu taua e faatatau i le faatauaina o le saolotoga o le au tusitala e mafai ai ona faatinoina o latou tiute ma galuega i totonu o le Pasefika.
O loo auai atu i lenei Fono, le Susuga i le Sooupu a le Malo, Uale Papalii Taimalelagi ma le Pule Lagolago o le Nusi Pepa a le Malo (Savali), Tupuola Terrence Tavita e fai ma sui o Samoa.
3. Fono Faalapotopotoga o le Pasefika ma le Atu Asia
Ua faamaonia e le Kapeneta le auai atu o le Alii Sui Loia Sili, Donald Kerslake i le Fono a le Faalapotopoto o le Pasefika ma le Atu Asia e faatatau i Aia Tatau o tagata, lea o le a usuia i Ioritana i le aso 5 ma le aso 6 o Aukuso 2009.
O lenei Fono o le a talanoaina ai aafiaga o Aia Tatau o tagata i totonu o atunuu ma le taua o galuega o Faalapotopotga i totonu o atunuu taitasi o loo lagolagoina Aia Tatau o Tagata. O le a tuuina foi avanoa i Faalapotopotoga o loo gafa ma lenei matafaioi i totonu o le Lalolagi, e tufatufa ai o latou manatu e uiga i puipuiga ma le faamalosia o aia tatau o tagata i totonu o atunuu ma itulagi.
O lenei Faalapotopotoga na faavaeina i le tausaga e 1996, ma o loo o latou unaia malosi lea mataupu o le faatauaina ma le lagolagoina o Aia Tatau o tagata.
