Ua vevela le taamilosaga a le Super Rugby, e pei ona amatalia mai i le lua vaiaso talu ai, seia paia mai le vaiaso lona tolu, e pei ona iai le faaiuga o le vaiaso na tea nei. O taaloga o le Super 15 i le faaiuga o le vaiaso na mavae atu nei. Sa faigata le amataga o le taamilosaga i lenei tausaga, talu ona oso malosi le faaoso fu‘a a le au malosi a le Auckland Blues, ina ua faiaina ai le Hurricanes i le vaiaso muamua, 34 i le 20 a le afā malosi mai Ueligitone. Peitai, e leai se isi taaloga o loo laualuga i fefaasoaaiga a le atunuu, nai lo o le toe suipi foi o le Blues i le la taaloga ma le Crusaders i le faaiuga o le vaiaso na se‘i mavae atu nei, manumalo i ‘ai e 34 i le 15 a le Crusaders.
E finau le taaloga, auā sa taumate lava poo ai a manumalo, auā o au malolosi uma nei a Niu Sila. Mataina le taaloga, iva minute muamua o le taaloga, ae tau ‘ai Crusaders, 3 i le leai a le Blues.
E lei leva lava ona faavevela ogaumu lanumoana a Aukilani, ae ta ane le ‘afa o le taaloga, ua 20 le Blues i le 6 a le Crusaders.
Sa telē le avanoa e sikoa ai le Crusaders, auā o le tele o taimi na lole ai le polo i luma o le pou, le itu e sikoa i ai Crusaders. Peitai sa fai si malosi o le puipui mai a le Blues, ua lē mafai ai ona laasia le laina sikoa i le taaloga atoa. O ‘ai uma na maua a le Crusaders, e mai sala na aa ma ova uma.
E fa sikoa a le Blues e pei ona seki mai e le alii o Piri Weepu ma Rene Ranger le faataaloga o le polo, ae faatini ma sikoa e Francis Saili 22 tausaga le matua, Charles Peutau 21 ma le uigi saoasaoa a le Blues o Frank Halai 24 tausaga le matua. Ua matuā ese le tulai mai a le au a le Auckland Blues i le amataga o le taamilosaga a le Super Rugby i lenei tausaga, ua faafefefefe ai le tele o au.
O le taaloga a le Waratahs ma le Melbourne Rebels o au uma a Ausetalia lea sa faataunuuina i le malae taalo i Sini Ausetalia. E limasefulu ane minute o le taaloga, o loo 9 Waratahs i le 16 a le Rebels. O minute lava na totoe o le taaloga, na fai ai lava ‘ai a le Waratahs ma manumalo ai lava i le Rebels i ‘ai e 31Waratahs i le 26 a le Rebels.
O se taaloga mataina ma le finau, pe a faatusatusa atu i le taimi atoa na sili ai ‘ai a le Rebels, peitai lea ua toe tuli mai lava e le Waratahs ma manumalo ai i le la taaloga. E ui i le malolosi o James O’conner ma Kurtley Beale o le Rebels, peitai e lei tuumamaina foi e Israel Folau o le Waratahs, se tasi o latou sui fou, le faafetauia o le malosi o le Rebels ma manumalo ai le Waratahs i le latou taaloga o le faaiuga o le vaiaso.
Manumalo le Reds 18 i le la fetauiga ma le Hurricanes 12 i le vaiaso na tea nei, ae na matuai lami faalelei a le au a le Chiefs 45 i le la taaloga ma le Cheetah e na o le 3 ‘ai, lea sa faia i le Waikato Stadium i Hemilitone.
Pei ona silafia o le Chiefs, o le siamupini lea o le Super Rugby o le tausaga na tea nei. O le tupua taumate la lea, faamata e mafai e le malosi lea ua iai le mumū o le taalo a le Blues ona faafetauia le Siamupini o le tausaga na se‘i mavae nei?
O le taaloga i le va o le Bulls 36 vs 26 Western Force ma le taaloga a le Sharks ma le Stomers, manumalo le Malie i ‘ai e 12 i le 6 a le Stomers, o le taaloga lea sa faia Kings Park, i Durban. E ui i le tele o nisi o taaloga faagasolo ua fuafua atu i le faaiuga o le vaiaso nei, peitai e toatele o le a tulimatai le isi taaloga a le Blues i le Aso Sa nei, o le a fetaui ai ma le Bulls, o se tasi foi o au malosi o le taamilosaga, lea o le a faia i Eden Park i Aukilani i le vaiaso lona fā o le taamilosaga a le Super 15.
