Sa iai lava le manatu o le toatele ailoga a toe mafai ona faatino se isi osofaiga a leoleo i faatoaga maruana sa laumanuia solo tala o loo i gauta o fanua mamao i uta o le nuu o Faleatiu. Pei sa iai lea lagona ona o le taumafaiga muamua a leoleo i le lua tausaga ua mavae na osofai ane ai e nisi o le nuu i ni laau malosi le galuega a leoleo lea na maliu ai se matai o Faleatiu ae manunu‘a ni alii leoleo i pulufana.
A fua i le tausaga e 2012 na tulai mai ai lea faalavelave ma le toe fafau o le isi gaioiga a leoleo na faatino i le Aso Faraile na tea nei, ua sili atu ona saogalemu le osofaiga lea auā e silia i le toaonosefulu leoleo na auai e aofia ai ma le Komesina o leoleo, ae na filemu le faatinoga o le galuega auā e lua ni faatoaga na maua, lea e silia i le 600 laau maruana na maua ai. O nisi o laau ua uumi ma matua e iloa i le lauusiusi mai ma ua oso foi fuga o nisi o laau.
E na o le tasi le laau malosi na maua o se fana o le ituaiga o le 12 ma ni agaese se lua. O le molimau a le Komesina le susuga Egon Keil, o se galuega sa ave uma i ai le tomai faaleoleo e faatino ai ina ia mautinoa ia manuia le galuega ma maua le auga o le faamoemoe.
E toafā nisi ua taofia e aofia ai ni alii se toatolu ma se tamaitai, ae na faaalia na mafua ona avatu nisi ona sa faalavelave i le faatinoga o le galuega a Malu o le Malo. O moliaga o le umia ma le totoina o laau faasāina faapea le umia o ni aupega ua molia ai i latou faapea moliaga o le faalavelave i tiute o leoleo.
O nisi o le nuu o Faleatiu ua silafia tele o latou suafa i moliaga e fesootai ma laau faasāina faapea le umia o aupega matautia o loo aofia ni o latou tagata o aiga ia i latou ua taofia nei e leoleo. O le faamatalaga a se molimau na ta‘ua ai, o le nofoaga na osofai e leoleo e mamao lava i uta o Faleatiu ma e faapea e lata i atumauga.
O le talitonuga o leoleo o loo iai nisi nofoaga mamao lava i uta o loo faafailele ai le laau faasāina, peitai o le a oo lava i ai le galuega i se taimi o le a talafeagai ai.
O se osofaiga muamua a leoleo ua tele ni laau faasāina ua maua ai, auā o le tele lava o nisi osofaiga e i lalo ifo o le 20 poo le itiiti foi ni laau e maua faapea ni sikaleti taai o le maruana ma ni taga pepa ua utu i lala ma lau mamago o le maruana.
A fua foi i ni tausaga ua tuanai na alu ai se isi osofaiga i se fanua o se aiga i Afiamalu e na o le fitu sefulu ma ona tupu laau faasāina na maua ai. O le manuia o le galuega a leoleo i Faleatiu e aunoa ma se soifua o se leoleo poo nisi tagata na aafia, o le molimau ola lea o le lē toe faatamala o leoleo ua iai le tomai aoaoina aemaise o le silafia i galuega faapea e faataatia le faafanua e agai i ai le osofaiga aemaise o tapenaga i le saogalemu o Malu o le Malo mai se tasi poo nisi e osofaia i latou.
