Osofaia le faleoaga a Massey Primary ma gaoi iPad e 20

O ituaiga masini iPad ua gaoia mai le aoga

Ua matuai faaalia se lagona faanoanoa ma le ofo tele o le pulega o le Aoga tulagalua a Massey i Aukilani ina ua osofaia ai e se tagata gaoi le faleaoga ma aveesea ai ni masini iPad se tele mo le faaaogāina e le fanau aoga.
O loo tau sailia ai nei e leoleo le maula lea na faia lenei gaioiga lë alofa ma le lē ‘ano’ano i le vaveao o le Aso Gafua 26 o Ianuari. I se saunoaga a le alii Pule Aoga, na ia ta’ua ai o le tagata na ia faia lea gaioiga e matuai malamalama lelei i si ana mea lea na fai ma na ia iloa lelei lava le vaega o le faleaoga lea na teu uma ai nei masini aoga a le fanau.
O Bruce Barnes o le alii Pule lea o le Aoga tulagalua a Massey ma e nofo latalata lava foi i le faleaoga, na ia ta’ua pe tusa ma se 5 lava minute na oso mai i lona fale agai i le faleaoga ina ua e’e le alarm, peitai e paka lana taavale ma faanatinati atu loa i totonu o le faleaoga.
E taunuu atu lana siaki i le potu lea sa teu ai masini iPad a le fanau aoga, ua nutililii mai le faitotoa tioata o le potu, lea sa mafai ai ona tago mai le tagata i totonu ma tatala le ‘au o le faitotoa ae gaoi ai ma iPad e 20 ma le anoanoai o le fagamaa mo nei masini aoga a le fanau.
Na ia ta’ua, faatoa ta’i 6 masina le umi talu ona faaaogā nei masini fou mo le faafaigofieina o meaaoga ma suesuega a le fanau a’o lenei ua gaoia, ma e tusa ma le $12,500 le tau aofai o le tupe e toe faaalu i le toe faatauina mai o nisi masini fou se 20 ae pau le mea e laki ai o lea e kava e le inisiua le $12,000.
O loo tālia pea la le kamupani inisiua mo le toe faatauina atu o nisi iPad fou e suia ai masini e 20 ia ua gaoia e le tagata. Peitai o le popolega o le susuga i le alii Pule ona o le vaiaso fou e toe a’e ai le fanau i a’oa’oga. E silia ma le 200 tamaiti aoga o le a lē mafai ona faaaogāina lea auaunaga poo nei masini iPad mo meaaoga ona o faiga a le gaoi.
Na saunoa foi le Pule Aoga, e leai lava ma se aogā tele o nei iPad e 20 ua sola ma le gaoi, ona e tofu lava le iPad latou ia ma lona numera faalilolilo e tatala ai ma ua mae’a foi ona faafesootai le kamupani e ana nei masini i le mea ua tupu, ae na pau le sasi o le Aoga, latou te lei faaolaina le vaega e mafai ai ona iloatino le nofoaga (location) la e iai nei masini pe a leiloloa pe gaoia foi e pei la o lenei mea ua tupu.
Ua aogā foi lenei mea ua tulai mai o le a a’oa’oina ai se lesona tāua mo isi masini iPad lea o le a taunuu mai. Ma e matuai maumaututu le talitonuga o le alii Pule ia Bruce Barnes o le tagata lea sa faia lenei gaioiga, e matuai malamalama lelei i totonu o le Aoga ma o se tagata lava foi e fegalegaleai lelei ma le aoga pe sa aoga ai foi.
E silia ma le 12,000 afe tagata ua faaalia lo latou lē fiafia ma le feita tele i le tagata gaoi lea i luga o le tusi o foliga (FB) ina ua tuuina i luga faalauaitele e le Aoga le tala e uiga i le mea ua tupu. Saunoa le susuga i le alii leoleo Detective Sr Sgt Roger Small, o se matuai faanoanoaga lava mo le Aoga faapea nai fanau le tupu ai o lenei mea ae ua toe o se aga ona toe amatalia lea o aoga o lenei tausaga fou.
Ma o loo tau sailia ai pea e leoleo ni faamatalaga e uiga i le tagata na faia lea gaioiga e ala i le toe siakiina o ata CCTV o le faleaoga, o loo talosaga mai foi i le mamalu lautele o le atunuu e fesootai atu i le numera vili fua mo faalavelave 0800 555 111 ma e malupuipuia uma ou faamaumauga pe a e fesootai atu.