(E osofai lava le tina i le sapelu i luma o le taavale a leoleo na tu, … o loo i totonu malu o le malo e toalua ua lē mafai ona la taofia le maemaeā o le tamaloa)
E 40 tausaga o se alii o Lepea ma Tulaele, o le a tulai i le asō i luma o le Faamasinoga Maualuga i Apia. Ua moni ai le upu, e “moe ma manū ae sau mala e atia‘e”.
O lē ua molia o Noa Ulberg; o si tamaitai ua maliu sa nonofo ma lē ua molia, ma e toatolu ni o la alo, o loo tausi uma e le tamaitai lenei i lona aiga i Vaitele.
O le faalavelave na tulai mai i le tea o le fitu i le taeao o le Aso Toonai a o loma ai le faamanatuina o le Lotu a Tamaiti i Samoa.
O le a‘upega na faaaogā e lenei alii, na ia osofai ai lona toalua, o se agaese ma e tolu lava manu‘a ogaoga na faaoo e lenei alii i lona toalua ae maliu loa, ma e faamautu mai e le Falemai tele i Motootua, e lei au atu lenei tamaitai i le falemai.
O lona aao (tau‘au), o le isi ona lima ma ona foliga na matuā aafia ina ua osofai i le sapelu.
O le itu aupito sili ona matautia o lenei faalavelave, o le toatele o fanau laiti o loo miomio solo i luma o le maota o le Fesoasoani Katoliko i Lepea, o fanau o loo i le malumalu EFKS o loo i gauta laititi atu ma le au faatau i faleoloa o le au Loibl o loo faafesagai, na o latou molimauina uma lenei osofaiga ma e mautinoa o le a umi se taimi e aafia ai ona o vaaiga i lea taeao.
Sili atu ona matautia ona o lenei osofaiga e fai lava i luma o le taavale a leoleo na tu ina ua faasalavei ane le tina a o sau agai gauta o Lepea, talu ai le fia maua e lenei tina o se fesoasoani.
E osofai lava la le tina o i totonu o le taavale malu o le malo e toalua ua lē mafai ona taofi le maemaeā o lenei alii ona o le agaese o loo ia umia i le taimi o le osofaiga.
Faato‘ā mafai ona tau taofia lenei alii ina ua agai mai loa le solo a nisi o taulelea ma tuaoi na molimauina le faalavelave ina ia tau aveese le agaese mai i lea alii.
Na alu ese lava mai i le nofoaga lenei na tulai mai ai le faaalavelave ma faato‘ā ave i totonu e Leoleo i le Aso Sa na sosoo ai.
O le faamatalaga a Leoleo i le fono ma tusitala, na matuā faateia leoleo ina ua tulai mai lenei faalavelave ma e oo uma lava i tagata soifua le te‘i i le vaai atu ua osofai mai se isi i se agaese i o latou luma ona o ni vaaiga e lē masani ai, ae o loo faatalatalanoa pea nei alii o le a avea ma nisi o molimau malosi a leoleo i lenei mataupu. O lē ua molia e lei leva foi ona toe tatala mai i tua mai i le toese i Tafaigata ina ua mae‘a ona tuli le faasalaga o le faamaoniga o le isi foi fasioti tagata faamoemoeina na faamaonia faasaga ia te ia.
O le faamatalaga a tagata o le afioaga o Lepea, o le tulai mai o lea uluai moliaga na mafua mai ina ua maliu ai se isi alii talavou mai i le afioaga o Vaimoso sa fai se inuga ma le alii lea o Ulberg. Na osofai ai e Ulberg lē na maliu i se maa ma na osofai ai le ulu o lē na maliu. E silia i le 10 tausaga i le toese ma iu ai ina tetea ma lona toalua lea ua toe aafia nei i le faalavelave mulimuli lea. O le faamatalaga ua maua e leoleo e faapea, na fesootai ane lē ua molia i lona toalua ina ia alu atu i le taeao o le Aso Toonai e avatu se tupe mai ia te ia mo le tina lea e faatau ai ni sauniuniga a le la fanau mo le Lotu a Tamaiti, ma o le faamatalaga a le aiga o le tamaitai, e fou lea taeao e feala ane ua leai le tamaitai ma le fale, ae o lea ua usu mai e avatu le seleni e pei ona ta‘u atu ia te ia.
O le isi lipoti ua maua na fai ane tuliga i luga o le alatele ma o le tu la o le tamaitai ina ua vaaia le alu ane a le taavale a leoleo, ua faatū le taavale a leoleo ae maua atu loa e lē ua molia o loo umia se agaese ma faaoo ai lava manu‘a tuga nei i le tamaitai lea na iu ai lava lona ola i le alatele o Lepea.
Ua tele foi la faamatalaga ma fesili ua tulai mai ona o lenei faalavelave aemaise o le tuai o le tali atu a leoleo, o ē ua tatau ona iai le tomai e tali atu ai i soo se faalavelave faapenei, ae na pau le faamatalaga a le Afioga Leaupepe Fatu Pula, le Sui Sooupu o le Matagaluega, e faigofie lava faamatalaga lafo, ae e manino ua matuā faateia leoleo ma e lē faaaupegaina foi leoleo a le atunuu, ma atonu o le mafuaaga lea ua matuā faigata ai lava ona tali atu ia alii i lea taimi i le malosi o le ita o le tamaloa a o osofai lona toalua.
