“O a’u sa tautau la’u tagatamea i le taeao lea, ae ua ou te’i i le vaai atu o tutu mai taavale a leoleo ma leoleo o feoai mai. O’u alu loa i le atoa i tua o le fale i lo’u fefe, ae ua ou te’i i le pue ai o a’u i tua e isi foi leoleo, ua lio atoa e leoleo le matou fale, ae leai ma se matou iloa. Na pue a’u ma ave i le ofisa o leoleo i Tuasivi, ae matou o atu o’u fai atu iai, poo le ā se mea ua tupu ua latou pue ai a’u faamatagā faapea. Ae fai mai leoleo, ua aumai oe e fai sau tala i pusa pia ia na faatau faasolitulafono.”
Na ta’ua e Alatise, “sole o le mea e mafai lava ona tou valaau atu, ou te sau tatou talanoa, ae ua tou faamatagā a’u faapea i le aiga o lo’u toalua.” “Ai pea na fai muamua i le matai o le aiga, ae fai iai le matai, (o le tuagane o le faletua o Alatise), e toe foi i le ofisa, ae faitalia ia ma alu atu e avatu Alatise. Ae leai ua fai lava le galuega a leoleo.” “Ua ta ma lava i le vaai mai a le matou nuu, ua amata ona gasolo mai tagata o le nuu ma autilo poo le ā le mea ua tupu. E oo lava ia te au ia ua matuā ou fefe lava i le omai soli o nei leoleo ua pei o se solitulafono matuia lava, ae leai ma se pepa poo se tala.”
Tautala Terry le toalua o Alatise
“Talu ona ma mafuta mai, e ese le ma fiafia faatasi. O le tolu tausaga talu ona falepuipui Alatise ae ma masani. O la’u vaai i le fatu o le tagata o se tagata lelei ma sa ou faamasani lava iai. Na alu a’i tausaga o faaauau pea le ma mafutaga. O lenei masaniga, sa faia i luga o laupepa ma telefoni. Ina ua iloa ane e tagata o lo’u aiga aemaise o o’u tuagane, e leai ma se isi na manao ia Alatise. Pau lava le vaai a tagata o le pagota soloatoa fasioti tagata. Ae o la’u vaai, Talofa e.
Na fasi faafia a’u e le matou aiga, fasi a’u e lo’u tuagane matua ae ua ou manao lava ou te alofa pea i le tagata lea. Na matuā faapogisaina lava la’u vaai o se pagota soloatoa.” “Sa tele lava ina ou nofo i le fale i na aso, e lē o a’u o se tagata e fealuai solo. Ae ina ua ma masani ma Alatise, sa alu iai lo’u mafaufau, sa ou solasola iai i le falepuipui. A momoe le matou aiga i le po, ou te alu iai i le taxi, ou te manu’anu’a i se fasiga o a’u pe a iloa ane. Na matua’i fiu lava le matou aiga e fai tala ma upu, o auala e momotu ai lo’u alofa ia Alatise, ae ua avea lena ma mea ua atili ai lo’u alofa faananau iai.” “Ua mafanafana le ma mafutaga i luga o laupepa ma ua amata ona ou alu o’u moe ai i le falepuipui, ua amata lava ona vaai mai le matou aiga, e leai lava ma so’u usitai atu ia latou. O tagata, e oo mai nei lava o loo tauemua lava a’u, ona faapea, ua ou poto poto o’u toe valea le nonofo ma lea pagota fasioti tagata.
Ua fai soo ma o loo faaauau pea ona fai mai e tagata, e iai taimi e lagona ai le tau faavaivai, peitai ou te malosi lava lo’u alofa isi o’u toalua.” “Ua maua le ma teineititi lea ua 15 nei tausaga lona matua.
O le faamaoniga o la’u tala o le taimi nei, ua iloa e lo’u aiga le lelei o le tagata lenei o Alatise, i soo se itu. O le faaaloalo, o le tausi aiga, o lana tautua ma le faiga o le ma’ua lava aiga, i le ma va ma lo’u aiga, ua taliaina ai ma le atoatoa e o’u tuagane ma lo’u aiga. Vagana ai lava isi tagata o loo tilotilo lava ia Alatise i ona foliga mai fafo ma lona aafiaga talu le usitai ma le fefe i lona tamā.” I le talanoa a Alatise, e matautia puapuaga na ui mai ai, i le taimi a’o nofo i lona tamā i Hawaii.
O le a talanoa iai le tatou nusipepa i lomiga oi luma i le tele o mataupu e lei faalogo muamua iai se isi, aemaise o le fuafuaga a lona tamā, e tagatavale faipule o le Palemene a Samoa. E lē na’o Luagalau sa manao lona tamā fasioti…E faia pea
