Ua sauni le Matagaluega o le Soifua Maloloina e osofai faamai pipisi ma faamai lē pipisi taatele ua aafia ai le soifua maloloina o le fanau, e ala i se polokalame o le a amata i le masina nei, lea o le a faamalosia ai meaai saogalemu mo fanau i totonu o aoga, atoa ai ma le faalauiloaina o taiala o le tumamā lautele mai le faaaogāina o faleui poo falelēta‘ua.
Ua faaalia le saoasaoa o ma‘i ua maua ai le fanau e pei o le tino puta, ma‘i suka ma gasegase o le fatu, le toto maualuga aemaise o gasegase e pei o le fiva taifoi.
E lē gata ina aafia le au matutua ma tupulaga talavou i nei mau faamai ae ua oo lava i fanau lea ua faamauina, o le itupa o tamaitai o loo maualuga le pasene ua aafia i le tino puta, e 9 pasene ae o alii e 4 pasene.
O faamaumauga nei o loo faatusatusa i ni sailiiliga a le matagaluega na faia i le va o le tausaga e 1979 ma le 2003.
O le maualalo tele o le tulaga saogalemu o meaai o loo aai ai fanau, o le mafuaaga lea o le tele ma le faatupulaia o nei faamai aemaise lava i fanauiti, ma o loo faamaonia lea i se suesuega na faia i le tausaga e 2006 i totonu o aoga lea na iloa ai o le toatele o fanau i totonu o aoga o meaai suamalie e pei o ice cakes, tonati, panikeke, lole ma saimini e aai ai.
O ia ituaiga o meaai ua faaalia e le soifua maloloina e matuā lē saogalemu ona e tele ai le suka, le masima, ma le ga‘o. E itiiti lava ni aoga na maua i le suesuega o loo faatau ai fualaau aina poo fruits, poo taumafa e ave i ai fualaau faisua ma fualaau taumafa mata poo vegetables ma isi meaai o loo fautuaina e le soifua maloloina e sili ona lelei mo fanau.
I le itu i le tumamā lautele mo faleui i totonu o aoga i le atunuu ua faaalia o le 87 pasene o aoga e leai ni fasimoli e faaaogā e tamaiti e fufulu ai lima pe a uma ona faaaogā ia fale, ae o le 20 pasene o aoga e leai ni pesini poo washing basins e faaaogā e fanau.
O le faaletonu lenei na mafua ai ona tapunia e le Matagaluega o le Soifua Maloloina le toe tatalaina o se tasi o aoga tulagalua ona o le lē lelei o faleui o loo faaaogā e tamaiti.
O le vaiaso na tea nei na tapunia ai le aoga tulagalua ma e lē o iloa poo le a toe tatala ile vaiaso nei mo le faaauauina o aoga a le fanau.
