Osi le feagaiga EFKS Sandringham ma Dr Rev Featunai Liuaana

Ua silia i le tausaga talu ona avanoa le Ekalesia Faapotopotoga Kerisiano Samoa i Sandringham i Aukilani e lei toe iai se taitai o le lafu mamoe poo le faafegaiga.
Na mafua lea tulaga ina ua tatala le feagaiga a le ekalesia ma le susuga i le toeaina sa galue muamua ai mai le tele o tausaga ua mavae, le susuga ia Seuga Pula.
O le tatalaina o le mafutaga a Sandringham ma le toeaina, ina ua aulia tausaga e tatau ai ona malolo penisione, e pei lava o tulafono ma aiaiga faavae a le ekalesia aoao, ua faatulaga ai tausaga o le matua o le soifua o soo se auauna e malolo mai ai i le galuega a le Atua.
O Iuni o le tausaga talu ai, 2008 sa faamaea ai ma tatalaina le feagaiga a le ekalesia ma le toeaina ia Seuga.
O le avanoa ai o le ekalesia mai lea taimi, sa le mapu ai pea le tatalo ma le silasila mamao a le fofoga o le ekaleisa, le paia i tupu ma tamalii, le mamalu i faleupolu o tofiga, faletua ma tausi, saoao, aumaga alo ma fanau, i lo latou sailili pea ma vaavaai i le Atua e tuuina mai se tasi e tauaveina ma faaauau le galuega.
O le tofa saili ma le manaoga sa iai i le ekalesia, ina ia sosoo le fau i le fau, ae o sē foi e agavaa ma iai le tofa faale-Atua.
E talitonu o le tasi lea taimi e le faigofie i se ekalesia, o le taimi e toe liuliu ai ma saili se faifeau, aua foi e anoanoai ma toatele le aufaigaluega, ia a o le tau tuufaatasia foi o finagalo ma manatu o sui taitoatasi o le ekalesia ma matafale eseese.
Peitai e lei faapena le taunuuga sa oo i ai se tofa saili, na fulisia finagalo o le ekalesia, ma ua tasi moemoe ai le tofa ma le faautautaga, tasi foi le faafitiga o aleaga, ma tusi lima ai loa i le susuga ia Dr Rev Featunai Liuaana ma le faletua ia Perise.
O le susuga ia Featunai e filifilia e le Ekalesia i Sandringham, a o avea ia o se faiaoga, ae le gata i lea o ia foi o le pule lua o le kolisi faafaifeau i Malua.
O le taimi muamua lea o le susuga ia Dr Featunai Liuaana ma lona faletua, ua valaauina ai e tausia se nuu, poo se ekalesia, o lona uiga o lona nuu muamua foi lea mo le galuega faatausinuu, ma le osia o se feagaiga e avea ai o se faafeagaiga, ina ua maea aoaoga ma galuega sa galue ai i totonu o le kolisi faafaifeau o le ekalesia EFKS i Malua.
O le susuga ia Dr Featunai e mai le afioaga o Safua ma Lalomalava, a o lona faletua o Perise, e mai afioaga o Faleasiu, Saleaula, ma Vaimoso.
O le faaiuga o le vaiaso na tea nei i le Aso Faraile, na faataunuuina ai ma osi ai loa le feagaiga i le va o le Ekalesia Faapotopotoga Kerisano Samoa i Sandringham, ma le susuga i le faafeagaiga fou ua iai nei.
O le sauniga sa faia lava i le malumalu o le ekalesia, ma sa taitaia le sauniga e le susuga i le toeaina o le pulega ia Pouniu Faamausili o ia foi o le taitai o le galuega i Panmure.
O nisi o le aufaigaluega a le Atua sa auai ai ma sa maua foi le avanoa i vaega taitasi o le sauniga, e iai le susuga Penisula Tuaniu, sa faitauina le afioga a le Atua, i le feagaiga tuai ma le feagaiga fou. O talosaga sa saunoa i ai Rev Maone Leausa.
O le lauga faapitoa o le sauniga sa fofogaina e le susuga Rev Auvaa Eneliko, ma le susuga ia Rev Misikopa Loli.
O le sauniga o le faamanatuga i lea lava sauniga sa tauaveina lea e le susuga i le faafeagaiga fou o le ekalesia Dr Rev Featunai Liuaana, ma o lana uluai faamanatuga foi lea i totonu o lona nuu ma lana ekalesia tausi.
O le maea ai o le sauniga i le tea laititi o le itula e sefulu lua i le aoauli o le aso lava lea, na saunoa ai lea o le fofoga o le ekalesia le susuga ia Palame Mauga e fai ma sui o le faafeagaiga ma le aulotu e faasilasila aloaia i le mamalu o le aofia ma e na auai atu e molimauina lea faamoemoe, i nisi o tulaga taua mo le silafia, atoa ai ma le valaauina o le taumafataga.
O le hall a le Manhattan i Mt Roskill sa faataunuuina ai le taumafataga, atoa ai ma tulaga uma i faaaloaloga e pei ona masani ai i aso faapenei.