O le tausaga 2016 na faamavae aloaia ai le susuga i le toeaina ia Rev Pelu Tuai ma le faletua ia Funati, ina ua malolo manaumalo mai le galuega a le Atua i totonu o le PIPC i Ranui. Mai le taimi na tuua ai le galuega e le susuga i le toeaina ma lona faletua ona see mai loa lea o le susuga i le faafeagaiga ia Rev Nathan Pedro ma faaauau le tausiaina o le tovine a le Atua ma tau saili se isi faifeau fou auā lava le galuega i Ranui.
Na faasalalau le avanoa faifeau i totonu o le ekalesia auā o le tu lava lea ma taiala i totonu o le ekalesia aoao PIPC a oo ina saili se faifeau fou i totonu o se ekalesia, ona tatala lea o le avanoa e apalai atu ai faifeau.
E sefulu faifeau na latou apalai i le avano i totonu o le galuega i Ranui peitai ane na mananao le komiti faafoe faapitoa a le ekalesia faatasi ai ma tiakono e aumai na o ni faifeau se toatolu e fai agai iai le filifiliga. O le manaoga o le aulotu lea na toe faaleo e le susuga i le faafegaiga ia Rev Nathan Pedro agai i le taitaifono o le sinoti a le PIPC e aumai se avanoa sei toe fai ai le filifiliga a le ekalesia mo ni faifeau se toatolu e fili mai ai se faifeau se tasi mo le galuega. Na talia e le taitaifono le fanoga o le ekalesia ma le tala e faapea, a iloa e filemu ai le ekalesia ma aua ne’i iai se vevesi ia ona fai lea, ma o lea lava sa usitaia e le ekalesia le fautuaga a le taitaifono.
O le susuga i le faafeagaiga ia Rev Ieriko Afamasaga ma lona faletua, o le susuga ia Rev Siitia Siitia ma lona faletua faapea ma le susuga ia Rev Steven ma lona faletua, o susuga ia i faafeagaiga na fai agai iai le faiga filifiliga o se faifeau. A’o alu le filifiliaina o se faifeau mo le ekalesia ae tei ua faaseetuagalu le susuga ia Rev Steven ona totoe mai loa lea o Rev Ieriko Afamasaga ma Siitia Siitia.
O faifeau nei e lua na faatino ai loa le faigapalota a le ekalesia mo se isi o laua ua tatau ona nofoia le nofoa o Tavita i totonu o le ekalesia PIPC i Ranui. O le iuga o le palota na iai na manumalo ai loa le susuga i le faafeagaiga ia Rev Ieriko ma le faletua ia Aliitasi. O le masina o Aokuso i le tausaga nei na maua ai le iuga o le faigafilifiliga ma le palota a le ekalesia ma latou logoina loa le taitaifono o le sinoti i le aso ma le taimi e faia ai le osigafeagaiga.
E lua vaega tāua na vaavaai iai le ekalesia i le faiga o lana filifiliga, o le Mission ma le Vission o le tagata o loo iai le faliga mai le Atua faapea ma le Misiona a le Atua, faatasi ai ma lana le faatalatalanoaga (interview) ma lana CV. O nei vaega uma ua atoatoa ma iai le silasila ma le filifiliga a le ekalesia i Ranui na mafua ai ona latou filifiliaina le susuga ia Rev Ieriko ma le faletua ia Aliitasi.
O le faaiuga o le vaiaso ua mavae i le Aso Toonai na faataunuuina ai loa le osigafeagaiga i le ekalesia PIPC i Ranui ma le latou faifeau fou ia Rev Ieriko ma le faletua ia Aliitasi. Na iloga ona faatumulia le malumalu i Ranui i susuga i faafeagaiga mai ekalesia eseese o le sinoti PIPC faapea ma o latou faletua aemaise o sui o aulotu taitasi lea sa auai atu e molimauina lea sauniga mamalu. O le susuga i le taitaifono o le sinoti ia Rev Karima Faiai na ia taitaina le sauniga a’o le susuga ia Rev Elder Leaia Pio na faitauina le Tusi Paia i le gagana Samoa a’o le laugaina o le upu a le Atua na fofogaina lea e le susuga i le faafeagaiga ia Rev Soosemea Faatui. O tautinoga o le osigafeagaiga na tulai ai le fofoga o le ekalesia ia Folasa Sio e fai ma sui o le ekalesia e faaleo se lagona o le ekalesia i luma o le mamalu o le auvalaaulia e faapea, ua iai le ioe ma le mananao o le ekalesia i Ranui e faauu le susuga ia Rev Ieriko e avea ma a latou faifeau. O nisi vaega o le tautinoga na fetaliai ai le ekalesia ma le taitai o le sauniga, faatasi ai ma le tautinogaa le susuga i le faafeagaiga ia Rev Ieriko ua ia taliaina le avea aloaia ai o laua ma faifeau i totonu o le galuega i Ranui e tusa ai ma taiala ma faavae o le ekalesia.
Na mae’a le sauniga ona sosoo lea ma le ava o le feiloaiga na saunia e le ekalesia i Ranui, ma faasolo atu ai loa i le taumafataga. O le fofoga o le ekalesia ia Folasa Sio sa fai ma fofoga o le aso a’o le afioga ia Mataafa Itione o le sui failautusi o le ekalesia sa fai ma sui o aiga na lua faapea le ekalesia e momolia faaaloaloga mo susuga i faafeagaiga sa auai aemaise o le paia o Samoa potopoto.
Maualuga le viiga o le Atua i le faamoemoe o le aso auā ua iloga ona lele le gogo ma si ana ia i le lava tapena o aiga na lua aemaise o le ekalesia i le latou osigafeagaiga ma le latou tofi fou. Na mae’a le mafutaga ona faatoa faafesagai loa lea o aiga na lua ma le ekalesia ma momoli aloaia mai ai loa le latou faifeau io latou lima auā le galuega a le Atua.
O Rev Ieriko Afamasaga ma le faletua ia Aliitasi Afamasaga e lima tausaga na aotauina ai i le upu a le Atua i totonu o le Kolisi a Carey Baptist College ae na iai foi taimi na ave ai le isi ana pepa i totonu o le Iunivesite i Aukilani, sa aotauina foi i totonu o le Kolisi o Knox Theological Seminary i Dunedin. I totonu o lea lima tausaga, e lua tausaga sa iai i totonu o le kolisi i Knox ae sa iai le suiga i lea taimi, sa fai ma nonofo tamaiti aoga i lalo i le aoga, ae sa iai ma taimi na o mai ai tamaiti i tua i ekalesia e faataitai e vaai aulotu.
O le ekalesia PIPC i Manukau le Fatugatiti sa muamua lava o mai ma faataitai ai a’o nisi o masina i totonu o le lua tausaga sa galulue faataitai ai i totonu o Botany. O le tausaga 2016 na faauu mai ai loa i le kolisi i Knox a’o le tausaga 2017 na maua ai loa le la nuu muamua i le ekalesia palani soofaatasi Perepereane ma le Metotisi i Opotiki i Bay of Plenty i le tasi le tausaga. O Rev Ieriko Afamasaga e mai le afioaga o Fasitootai, Saleaumua, Satapuala a’o le faletua ia Aliitasi e mai le afioaga o Asau.
Pei ona ta’ua e le susuga i le faafeagaiga e faamaualalo lava o laua loto i le Atua ona o lenei valaau ua aumai mo laua, auā e toatele lava faifeau iloga sa apalai i le avanoa ae o le faasinomaga ma le valaau a le Atua e lē mafai ona tu se isi ma tetee.
O le susuga i le toeaina ia Rev Elder Setefano Leiite sa tele ina faafaileleina lo laua soifua faaleagaga auā o le ekalesia i Tamaki sa lolotu ma galulue ai. Na faigaluega i le ofisa o lafoga i Manukau ae lei see atu i le valaauina a le Atua.
