“I le ava ma le faaaloalo, ua avea ai au ma sui o le Aulotu PIC Owairaka, ou te momoli aloaia atu ai le susuga ia Makesi Alatimu ma lona faletua ia Ramona ia faauuina e le pulega aoao a toeaiina ma faifeau e avea ma o matou faafeagaiga.”
O le saunoaga lea a le susuga ia Malaetele Tualega, o ia o le tiakono sinia o le aulotu a le PIC i Owairaka i le taimi na foai ma faailoa atu ai lo latou faifeau ia Makesi Alatimu i luma o le taitai ma le aufono a le Ekalesia PIC.
O le afiafi o le Aso Tofi o le vaiaso na tea nei na faataunuuina ai lea sauniga mamalu i le nofoaga o le galuega i Owairaka lava. Na faatasi atu i ai nisi o auauna a le Atua ae le gata i lea o aiga na malaga mamao mai e molimauina lenei aso taua. O le susuga ia Rev Andrew Norton na taitaia le sauniga. Na ia saunoa ma toe faamanatu mai e faapea, “E taua le lua mafutaga mafanafana ma le Atua” i aso uma.
O le tatalo o le faafetai ma le faatoesega na saunia e le susuga Talosaga Su’a. O le faitauina o le afioga a le Atua mai le feagaiga tuai o le susuga ia Penehuro Tualega a o le feagaiga fou o le tamaitai ia Mele Lematua.
I le taimi o le tautinoga na fesiligia ai e le taitai le ekalesia e faapea,
Taitai: Le faalapotopotoga e, o outou o le fanau a le Atua i lenei aai, po ua outou finagalo malilie ma outou talia Makesi Alatimu e avea ma o outou taitai, ua outou sauni e galulue faatasi ma lagolagosua ia te ia?
Aulotu: O i matou o le Ekalesia PIC Owairaka ua matou talia ma le fiafia Makesi Alatimu e avea ma o matou faafeagaiga. O le a matou galulue faatasi ma ia ma lona faletua ia Ramona ina ia faailoa atili pea ma atinae le malo o le Atua i totonu o lenei palisi i aso uma ma ua tuuina atu foi la matou lagolago atoa mo ia.
O viiga o le Atua na saunia lava lea e le aufaipese a le ekalesia faapea ma pese faapitoa na usuina e le tupulaga poo le aoga Aso Sa.
Sa faaiuina le sauniga e le susuga ia Makesi Alatimu le faafeagaiga o le PIC Owairaka.
Na maea le sauniga ona alo atu ai loa lea i se taumafataga tele ma le matagofie na saunia e le Ekalesia ma aiga.
