O le finagalo o le Atua ina ia faalautele le faaolataga. O le ala lea e mafua ai ona faatutū le tele o ekalesia auā o se tasi lea o auala e mafai ona mafuta ai ma saga manumaloina ai pea agaga fou, ma fafaga ai i le Upu a le Atua ina ia matutua faaleagaga, ma saili ai poo le ā le finagalo moni o le Atua i le tagata lava ia ma lona lumanai.
O le Ekalesia, o le meatotino a le Atua. E faavae i le Atua, e atiae foi e le Atua Lana Ekalesia. Pau lava la le galuega a le faifeau e fai ma le Ekalesia, o le saili lea o le finagalo o le Atua i le tatalo ma le anapogi, ona mulimuli lea e tusa ai ma le taitaiga a le Agaga Paia i le vaega o loo finagalo le Atua e agai i ai Lana Ekalesia.
O isi ia o upu na apoapoai ma toe faamanatu e le susuga i le faafeagaiga ia Viliamu Mafoe ina ua laugaina le Upu a le Atua e tusa ai ma le faamoemoe e pei ona osi ai le feagaiga i le va o le Ekalesia Lighthouse Worship Center ma lo latou faifeau, le susuga i le faafeagaiga ia Eveni Tioa Fenika ma lona faletua ia Annie ma o la alo.
O lenei faamoemoe sa faataunuuina lea i le Aso Sa na sei mavae atu nei, sa faapea ona molimauina e le toatele o faifeau mai Ekalesia eseese a le Worship Center i totonu o Aukilani nei. E lē gata foi i lea ae o se faamoemoe sa faapea ona molimauina e le toatele o aiga ma uo, ae faapea aiga o le Ekalesia ma o latou foi tau aiga.
Na saunoa le susuga i le faafeagaiga ia Eveni, o se faaaliga sa faapea ona faailoa atu e le Agaga o le Atua ia te ia i le tolu tausaga talu ai a o galulue i se tasi foi o Tovine ina ia faapea ona agai e faatu se lotu. O lenei faaaliga sa faapea ona ia usitai i ai peitai sa lei matuā iloa tonu pe o le ā le taimi e tatalaina ai auā sa saili pea i le Alii.
Talu ai ona o le fia usitai pea i le Atua ma le faaaliga na faailoa atu ia te ia, na mafua ai ona faamavae ma le tovine sa iai ae mafuta atu loa i se tasi o Ekalesia Worship Center ma galulue ai i lalo o le taitaiga a le susuga i le faafeagaiga ia Fesalaiai ma si ona faletua.
E moni lava la sa lolotu i lalo o le taitaiga a le susuga ia Fesalaiai ma lona faletua, peitai sa ola pea le faaaliga na avatu e le Agaga o le Atua ia te ia, o le ala lea na ia talatalanoa malamalama ai ia Fesalaiai ma faamavae ai loa ona ua iai le lagona ua oo mai le taimi a le Atua e faatuina ai le lotu e pei ona iai lea faaaliga.
E ui ina sa faigata ona ua mafana foi le latou mafutaga ma le faafeagaiga ia Fesalaiai ma lona faletua ma le Ekalesia, peitai sa fia tulimatai pea le faasinomaga a le Atua e tusa ai ma faaaliga.
Na iu ina faamanuia atu le susuga ia Fesalaiai ma fai lelei le latou aiga faamavae ona agai ai loa lea e faatino le faamoemoe. Na lagona le ootia o le loto i le saunoaga a le susuga ia Eveni pe a toe mafaufau i le amataga mai o le lotu.
O North Shore lava na aumai i le faaaliga e faatū ai le lotu, o le ala foi lea sa tau saili ai se avanoa i North Shore ma maua ai loa le faleaoga i le tulagalua i Sunnybrae Rd i Northcote, o iina la na amata mai ai loa le lotu e oo lava i le taimi nei. Sa lei faigofie le amataga mai o le galuega ona sa amata mai lava i le leai o se mea e tasi. Na o le susuga lava ia Eveni ma si ona faletua ma si a la fanau sa fai le latou lotu i le Aso Sa muamua, ma e lē galo lena aso ina ua fai lava na o latou le latou sauniga ma tootutuli atu i luma o le Atua ina ia alofa mai i le galuega ua amata e tusa ai ma Lona fingalo.
E lei umi ae maua le aiga e toatasi ona faapea ai lava lea ona faaauau mai seia oo lava ina iai aiga e toalima lea ua mautu ai loa ma le faamoemoe o le a tatala aloaia loa le lotu ma fai ai loa ma le latou osiga feagaiga.
O le susuga lava i le taitai aoao o le Ekalesia Worship Center Worldwide, le susuga Pastor Viliamu Mafoe o ia sa nafa ma le faataunuuina o le polokalame o le osiga feagaiga, atoa ai ma le lagolagosua a susuga i faafeagaiga sa auai.
Na iu ma le manuia le faamoemoe ma sa oo lava foi i tulaga uma e pei ona sa iai faaaloaloga a le Ekalesia i susuga i faifeau. Sa lei alo tamala foi le susuga ia Eveni ma lona faletua aemaise ai o le paia ma le mamalu o le ekalesia i tulaga masani o aso faapenei.
E tasi le sauniga a le Lighthouse Worship Center i le Aso Sa i le taimi nei, ma o loo faagasolo a latou sauniga lotu i le tuatusi 36 Sunnybrae Rd, i Northcote.
O le Ekalesia o le Lighthouse Worship Center ua atoa i ai le sefulufa o Ekalesia Worship Center i totonu o Aukilani lava latou, faatasi ma le lua i Hamilton, ma le tolu i Ueligitone, o le lua i Kalaiasetete ma le tasi i Hasting.
O le aso ananafi sa faapea ona malaga atu ai le susuga Viliamu ma nisi o faifeau o le Komiti Faafoe o le Ekalesia aoao i Napier auā le feiloaiga ma se tasi foi o Ekalesia o le a faapea ona tatalaina i se taimi e lē o toe mamao.
