O le Aso Toonai 28 o Setema na osi feagaiga ai le ekalesia EFKS a Morayfield ma le auauna a le Atua, le susuga ia Rev Ioane & faletua ia Silaumua Aloalii (Solosolo ma Uafato Fagaloa).
O le ekalesia fou lenei o loo i lalo o le pulega EFKS a Matu lea o loo tausia e le susuga ia Rev Lauie & Autalataga Lupematasila.
Sa taitaia lava le sauniga e le susuga i le toeaina ia Rev Lauie Lupematasila. E lua lauga o le faamoemoe e pei ona fofogaina e Rev Poloaiga Imo mo le faifeau ma le faletua, ae o le susuga ia Rev Tapenaga sa faalaeiau i le ekalesia fou faatasi ai ma le faaopoopo a le toeaina ia Lauie Lupematasila.
O le faitauina o le Tusi Paia sa fofogaina e Rev Aliota Tiatia (EFKS Chermside), o talosaga sa momolia e le susuga ia Rev Osa Nanai EFKS Caboolture. E 10 matafale na amataina ai le lotu faamisionare ma vaaia e le faafeagaiga ia Rev Ioane ma Silaumua talu mai le masina o Ianuari 2012 ma tasi ai le finagalo autasi o le ekalesia ua tatau ma onomea ona osia se feagaiga ma le faifeau ma le faletua.
Ua atoa ai nei le valu o aulotu ole Pulega a Matu e aofia aulotu e 2 o Cairns ma Townsville. Na avea le Fofoga o Suafai Patū o ia sa fai ma sui o le ekalesia aoao mai Samoa e pei ona malaga mai ai ma le faletua ia Naomi Patū.
O le failautusi poo le tiakono ia Tao‘ai Pita Tao‘ai sa fai ma Fofoga o le aso ae avea le susuga ile tiakono mai le ekalesia ale Ola Fou ma le Pulega a Matū e faafetaia le ekalesia ona o le fofoga taumafa auā o le taimi lona lua lenei ua lē toe faia ai ni faaaloaloga i le ekalesia EFKS.
Sa auai le susuga i le Toeaina Faatonu ia Rev Kerita Reupena o le toeaina foi lea o le pulega a Sisifo faapea le susuga i le toeaina ia Rev Tauaaga Mataafa ma le toatele o sui tofia ae tainane le au faigaluega faafeagaiga sa auai ma na iu manuia mea uma i le faatasi mai o le Atua.
