O le afuafuaina mai o lenei aulotu, sa amata mai i se manaoga sa momoo i ai le Faatonu, le susuga ia Kerita Reupena faapea le autoeaiina o le Matagaluega EFKS a Kuiniselani.
O finagalo o le faatonu, ina ia faatuina se lotu i Cairns, o lea sa tatalo pea ma tuu atu i le Atua ma faatalitali. E lei umi, ae aumai loa e le Atua le tali.
O le iu mai o le a‘oa‘o Malua, le susuga ia Aminatapu Faafeū Tauā ma lona faletua ia Elena, o i laua ia sa iu i ai le tofā a le autoeaiina o le matagaluega i Kuiniselani, o le a avea ma misionare a le EFKS i Cairns. O lona uiga o lea faamatalaga, o i laua o le a tusilima i ai le Atua e sailia ni agaga poo ni tagata Samoa e amataina ai se lotu. Sa manuia taumafaiga a le susuga i le a‘oa‘o ma ua maua aiga e toatolu, a‘e ai loa se manatu i le autoeaina o le matagaluega e faatuina aloaia le EFKS i Cairns i le aso 27 Ianuari 2008.
O le iuga a le Ekalesia, afai e atoa le 3 tausaga o le A‘oa‘o ma lona faletua i le galuega faamisionare i Cairns, e mafai ona avea ma faifeau tausinuu pe afai ae mananao loa le ekalesia e osi le latou feagaiga e avea ai i laua ma faifeau o le aulotu, ma o le faamoemoe ua taunuu o le laau lea o le soifua.
Ina ua mae‘a le 3 tausaga o avea i laua ma misionare a le ekalesia, na autasi finagalo o le EFKS i Cairns ua mananao e osi le latou feagaiga ma Aminatapu ma lona faletua ina ia avea ma o latou faafeagaiga. O lea na faaoo ai loa lo latou manaoga i le A‘oa‘o ma lona faletua, ma talia fiafia e le misionare ma lona aiga le finagalo, lea na osia ai loa le latou feagaiga i le Aso Toonai 29 Ianuari 2011.
O le susuga ia Aminatapu o se lupe faalele mai le alalafaga o Moataa ma Lalomanu, ma le faletua ia Elena mai Saoluafata i le Anoamaa.
O le taitai o le sauniga o le susuga i le toeaina o le Pulega i Matu, le susuga ia Lauie Lupematasila. Sa faitauina le Tusi Paia, e le misionare a le EFKS i Townsville le susuga ia Poloaiga Imo. O le faifeau sa molia talosaga o lea faamoemoe, o le susuga ia Tapenaga Reupena, o le failautusi o le Matagaluega Kuiniselani.
Na laugaina le upu faamafanafana ia Aminatapu ma le faletua e le susuga ia Aliota Tiatia, o le failautusi lea o le pulega i Matu, a o le lauga faamalosi ma le apoapoaiga sa saunoa i ai le susuga ia Sabu Samoa. O faifeau uma ia sa mautofi i le sauniga o faifeau lava o le pulega i Matu i Kuiniselani nei.
Sa faatumulia le faamoemoe ina ua auai toeaiina o le Matagaluega Kuiniselani, faapea le aufaigaluega, susuga i faafeagaiga ma o latou faletua, aemaise ai ua matagofie le faamoemoe i le auai mai o aiganalua o le faafeagaiga ma lona faletua.
Na faapea ona tulai le Tiakono Toeaina o le Matagaluega Kuiniselani le susuga ia Su‘a Vasa Su‘a e momoli le agaga faafetai i le ekalesia ona o le maualuga o faaloaloga faatasi ai ma faamanuiaga mo le aulotu ma le faifeau ma lona faletua, auā le amataina o le galuega fou.
Ua lē toe ta‘ua nei Aminatapu ma lona faletua o se misionare, auā o lea ua mae‘a ona osi le feagaiga,ae o le susuga i le Faafeagaiga o le ekalesia poo o le Tamā ma le Tina o le galuega.
O le lotu na amata mai i le 3 aiga, peitai i le taimi nei ina ua uma ona osi le feagaiga ua atoa le 10 o aiga o le aulotu. Ia viia le Atua, auā o le tatou galuega e na o le totō ma faasūsū, ae o le Atua lava o Ia na te faatupuina.
