Vevela tele taamilosaga Kirikiti faa-Pasefika i le taumafanamafa ma le suia o le tau e pei ona masani ai le toatele o tagata i vaitaimi faapenei i Niu Sila. Molimauina i lenei tausaga e lē gata i taaloga masani a Ekalesia lava ia, ae o loo faapea foi taaloga faagasolo a faalapotopotoga eseese i Aukilani.
O nisi o nei taamilosaga o loo faagasolo ma foliga mai o loo fuafuaina agai i ai malae i le taumafanafana mo le faaaogāina.
E foliga mai i se feiloaiga ma le pulega a “Le Mau a Pule ma Tumua” o le a se‘i tālia le faamaeaina o isi taamilosaga o loo faagasoloina e pei o le PIMKA, Teuila ma nisi ona faatoa amataina loa lea, ona o loo iai nisi o Au o loo fia auai i lea taamilosaga i tausaga taitasi.
O loo atagia mai ai le galulue vaavaalua o taamilosaga uma ina ia maua avanoa, e faataunuuina ai i lea vaitaimi o le taumafanafana, atoa ai ma le manaoga o nisi o Au e auai ai ma tauva ai i isi foi taamilosaga o loo faataunuuina i tausaga taitasi.
O se tasi o vaega matagofie na maua i se faatalanoaga ma le pulega a “Le Mau a Pule ma Tumua” o le vavalalata lea o fesoota’iga ma isi faauluuluga Kirikiti o loo faia ma tofu malamalama e nisi o vaega e siitia faatasi uma ai taamilosaga o loo faatinoina i tausaga taitasi.
E foliga mai la i le taimi nei o loo maua pea le avanoa i Au a alii ma tamaitai e resitara ai mo le faamoemoe a “Le Mau a Pule ma Tumua” e ono faataunuuina i le faaiuga o Fepuari poo le amataga o Mati.
E faafesootai Poni Fonoti i “Le Mau a Pule ma Tumua” 275 0572 pe a fia auai i lea taamilosaga i le tausaga nei, semanū o loo maua avanoa a o tālia le faamae‘aina o nisi o taamilosaga Kirikiti o loo faagasoloina nei.
