O le tali atu lea a le Alii Palemia i faaseā ua amata foi ona laga e le mamalu o le au faifaatoaga i le tele o le talo ua maua i le atunuu i lenei vaitaimi.
O le mau a faifaatoaga e pei o Tiatia Motootua, o se tasi o faifaatoaga iloga mai i le motu tele i Salafai, o lea ua tali mai faifaatoaga i le unai faifai pea a le Malo e agai le atunuu i le eleele e toe atiae auā le tamaoaiga lautele o Samoa ma le tafiesea o se fia ‘ai ae o lea la ua tali mai faifaatoaga ae ua lē lava foi maketi e ave i ai le talo.
O le vaiaso lenei e agai atu ai le uta, o se tasi o uta e tolu ua amata ia Fepuari ona auina atu i Niu Sila.
O lea ua faaopoopo le uta e tasi auā na o le tailua pusa o taga talo (container) sa mafai ona avatu i Niu Sila i masina taitasi talu ona toe tatala mai le maketi i Aukilani mo lea matai‘ai a le atunuu auā le faatau atu i fafo. O lea la ua tolu i le masina. E tasi le pusa o taga talo o loo agai i Ausetalia. O Amerika, o lea e salasala lava le numera o pusa o taga talo, o isi masina e maua le avanoa mo pusa taga talo e lua ae o isi masina ua na o le tasi.
E ui i ia maketi, o le tele ma le anoanoai o le talo ua maua i Samoa i lenei vaitaimi ua vaaia ai nei le palasi maualalo o le tau o le tautalo e pei ona masani ai i le faatau atu i le $20 i le tautalo e tasi, i le $5 i le tautalo aemaise lava i maketi i Salelologa atoa ai Fugalei.
O se tulaga ua fiafia tele ai le mamalu o le au faatau ae mo faifaatoaga ua o latou ta‘ua le faigata ona o le tigaina o le toe faamalagai o le totoina o lenei matai‘ai a le atunuu ae ua iu ina pala le tele o nei fua o faaeleeleaga ona ua tuai ona faaaogā. O le toatele o le atunuu o loo ua toe foi i le totoina o le talo, ua ta‘ua e na o le Talo 1 ma le Talo 2 lea e talia i maketi i fafo ma o le talosaga ua tuu atu i le Malo ina ia saili nisi auala e mafai ona avatu ai le talo lea ua tele i totonu o le atunuu. O loo faataga lava ona ave taga talo a aiga i Amerika Samoa peitai e lē o iai se maketi tele mo le talo ona o loo lelei foi maumaga i Amerika Samoa latou. Ua iai foi talosaga mo le malo e saili i Hawaii.
O lea ua iai foi galuega ua faatali le faamautu e le alii Minisita o Faatoaga, Le Mamea Ropati ma le Matagaluega ina ia iai se isi uta e lua ai uta o taga talo e ave i Ausetalia, ma o se taumafaiga ua agai ai e ave le talo lea mo taro chips i Ausetalia. E lei mae‘a feutagaiga o lea taumafaiga.
I le manatu o le alii Palemia, o lea e lei leva ona toe tatala le maketi i Niu Sila mo le talo a Samoa, ae ua tino mai foi le amata lava ona faaopoopo le manaoga ae e lē mafai ona aveese ai le tulaga lea o loo iai foi le talo a Fiti o loo tele ina faaaogā i Niu Sila talu lava ona aafia le talo a Samoa i le lega.
“O lea lava e galulue i latou o loo tau sailia maketi i fafo ae e tatau lava ona lava le onosai i nei maketi ua iai i le taimi nei,“ o le faaaliga lea a le taitai o le Malo. “O le mea lena e aofia ai i le tatalo le faaupuga, o le talia o mea ua maua i lea aso.” Faaalia e le alii Palemia e faigata tele ona maua se fesootaiga ma Hawaii ma Amerika Samoa mo ni maketi e pei ona vaaia i Niu Sila ma Ausetalia ae o lana fautuaga lea i le mamalu o le au faifaatoaga ina ia onosai ai i mea ua maua i lenei vaitaimi.
