O le silia i le sefulu tausaga o pulea ma faagaioia e Chris ma Wendy le nofoaga tu matafaga i A’ufaga o se faletalimalo ua manumalo ai pea i tausaga sosoo e ono i faailoga taualoa faavaomalo o le faletalimalo tulaga muamua lana tautua.
O le nofoaga sa iai le polokalame o le Paradise Cove sa faamautu ai fanau tama talavou mai Amerika sa toe fuataina ai o latou olaga mai aafiaga leaga e pei o le tago i fualaau faasāina, le avamalosi ma le faalogogata io latou mātua.
I le avea ai o le nofoaga e faagaioia ai se pisinisi faletalimalo a le ulugalii o Chris ma Wendy mai Ausetalia, ua toatele tupulaga tama ma teinei o afioaga o Lotofaga, Vavau ma A’ufaga ua maua ai galuega. O le tautua lelei oi latou e pei ona faaalia e le pulega o le Seabreeze Resort ua fua aliali mai i faailoga faavaomalo ua faamanuiaina ai pea le Seabreeze.
Sa tauva foi nisi o faletalimalo i Samoa e pei o le Taumeasina Resort, peitai na sola le Seabreeze ma le tulaga muamua i le toatele o tagata i le lalolagi na palota mo le faletalimalo i le faailoga muamua. O le taunuu i fanua o Chris ma Wendy i le afiafi o le Aso Faraile ua mavae, e taunuu tusitala i A’ufaga i le nofoaga o iai le faletalimalo ua teteu mai le aufaigaluega, ma ua sasala le manogi o faasolo mosooi ma isi fugalaau manogi. O le loli dyna ua teteu i fatu laugasese ma felanulanu a’i mai ai ma fugalaau ona o le faataliga o le alii pule ma lona faletua, ma le faasavaliina i totonu o afioaga e tolu o Lotofaga, Vavau ma A’ufaga o le faailoga lona ono ua toe manumalo ai le Seabreeze Resort.
O Hong Kong na faalauiloa ai faletalimalo, o pisinisi taavale totogi poo rentals, ma isi auaunaga e fesootai ma le atinae o tulisi ua maua faailoga taualoa. Na malaga iai Chris ma Wendy e talia le faailoga ma ua faaalia ai e le ulugali ua na’o le lagona o le fiafia ma faafetai i le la aufaigaluega auā o fua ia o a latou galuega lelei mo tulisi e nonofo i le faletalimalo.
Ua lua tausaga o maua foi e le Seabreeze faailoga maualuluga o le tufaga faailoga faaletausaga a le atina’e o tagata tafafao i Samoa ma o le isi lea molimau ola o le maualuga o le tautua ma le auaunaga a lea faletalimalo e na’o le 12 fale e nonofo ai Malo ma le faleaiga e tu i lalo ifo o papa maa maualuluga ae siomia e le sami.
Ua faato’a oo lava lea iai o le tusitala o lenei lipoti ma e foliga e laititi le nofoaga o loo faagaioia ai, ae ua sa’o ai upu o le laititi ae ma’ini.
O le afiafi poo le Aso Faraile ua mavae na potopoto ai le paia o malo valaaulia i le nofo a suafa i tamalii ma failauga o le afioaga o A’ufaga mo le fiafia e sami ai le faailoga taualoa faavaomalo lona ono ua maua e le Seabreeze Resort.