E tolu aso o faagasolo le faamasinoga o se alii aoga o le Iunivesite Aoao a Samoa o Molia Fatu Taioalo, i le moliaga o le faiaiga faamalosi ma se tamaitai 22 tausaga le matua.
O molimau a leoleo e 12 e aofia ai fomai e toalua o alii leoleo, ma nisi o tamaiti aoga faapea alii leoleo o le lotoa a le Iunivesite poo security officers, sa tiute i le po na faia ai le pati o le Iupeli Siliva o le iunivesite i le tausaga na tea nei, lea na tulai mai ai le soligatulafono sa tuuaia ai lea alii talavou.
Ua faaiuina le faamasinoga ma ua faamamaina le suafa o le alii aoga mai le moliaga, ina ua le mafai ona faamaonia tuuaiga. O se tasi lenei o mataupu sa tele i ai finagalo faaalia o nisi i luga o nusipepa ma lipoti a le au faasalalau ina ua maea ona tupu.
O le tele o ia finagalo faaalia sa fesiligia ai le pitolaau a leoleo i le tuai faia o ni suesuega, ma le tuai molia o le na tuuaia. Peitai na faatino lava le tiute o malu o le Malo mulimuli ane ma faapea ona faia ai loa le moliaga.
I se toe vaaiga i le mea na tupu na faaalia ai e le itu a leoleo, o le alii na tuuaia ma le tamaitai na aafia sa auai i le fiafia o le Iupeli Siliva, ma o le alii o Molia sa serve, pe o ia lea faatasi ma nisi tamaiti aoga sa tufaina le vaitaumafa ma le avamalosi mo malo na valaaulia i le aso fanau o le Iunivesite. Sa iai foi ma le tamaitai ma nisi o ana uo faafafine e aooga i le Iunivesite. O molimau a leoleo na faaalia ai sa onā tele le tamaitai ona sa fai si tele o le avamalosi (uaina mumu) na ia tagofia.
Na molimau le tamaitai na aafia i lona manatua o se tasi o taimi na savali agai ai i luma o le ulufalega o le Iunivesite ae mulimuli atu ai ma le alii na molia e leoleo.
O le mulimuliga lava lea na iu ina toso atu ai ma lona lima ma fai ai a la tauiviga seia oo ina palasi i lalo ma ia le iloa ai se mea ona ua niniva lona ulu, ona ua onā. Peitai o le molimau a le alii na molia na ia ta‘ua ai sa ioe le tamaitai i le la faiga aiga ma na te lei faamalosia.
E fua lea mau i le leai o se ee o le tamaitai pe valaau atu i se isi mo se fesoasoani ina ua toso atu lona lima.
O le faagasologa lava o molimau na oo ai i le taimi na maua ai e se alii leoleo o le lotoa a le Iunivesite le na molia ma le tamaitai i se tasi o vaega o le iunivesite o loo pogisa ona ua tape moli. Le nofoaga lea na maua ai ma le gaioiga na faia a le na molia ma logo ai loa se faiaoga seia oo ina iloa ai le mea na tupu ua lepa le toto o le tamaitai i le vaega sa taoto ai. Sa ave i le falemai i le po lava lea ma faia ai se taotoga faanatinati ona o le ogaoga o se manu‘a na aafia ai ona o le gaioiga na faia.
O le maea o le fofogaina o molimau a itu e lua na aumai ai le faaiuga ua le faamaonia le moliaga o le alii aoga.
