O le faalavelave matautia e pei ona logo ai itu e fā o le lalolagi, sa lei manatunatu ai si nei aiga o le a lē toe maleifua mai i le taeao na sosoo ai; o se tala na ulufia ai agaga ma faateia ai tagata uma i soo se tafailagi i le misialofa ma le loto momomo. Talofa! e mou atu i le vaaiga o mata, ae tumau pea foliga ma uiga tausaafia o le laufofoga fiafia e lē mafai ona mavae.
E tuufesili ai le tele o mafaufauga pe faapefea ona tupu? Ae se‘i iai foi se laveai a o sasao le afi ma mou faafuasei atu ai foliga lalelei o ē sa pele i totonu o aiga. E lē talanoa nisi ma faalavelave, e ui ina oona matuitui ma ua lē mautonu ai le tele o lagona, peitai o la le tusi, “Amuia ē faanoanoa, auā e faamafanafanaina i latou”.
O le ola foi e pei o se puao e na ona sau ma toe mou atu. O se faalavelave matautia e matuā faigata ona faamatala ma faagalo i loto ma agaga ona o le ootia ma le alofa i le motusia faafuasei o mafutaga mafanafana.
O le tofa ia Faalafi Ieremia Lale mai Faletagaloa Safune ma Apolima, o si ona faletua o Neti Teukisia Lale (ua maliu), o se tamaitai Toga peitai, e faigata ona silafia o se Toga ona o le masau o lana tautala faa-Samoa.
I le faaiuga o Iulai a o lei tupu le faalavelave na saunoa ai Ieremia ma si ona faletua i se matou talanoaga, na mafua ona sifi i le fale o le uso o lona toalua (Fusikalau Taufa ua maliu foi) e faatali ai so latou fale ona ua fia sifi foi i le la itu. Peitai o le aso lava lea na maliliu ai, na fuafua e sifi ai i lo latou fale fou, ae o lea ua lē tau lau o le faamoemoe ua leva na nofo tatali i ai.
O se tala faamomoiloto i le alafa‘i mai i le taeao o le Aso Lulu, aso 24 o Aukuso ua liu efuefu le to‘a sefulu ma le tasi o le aiga, o ē sa pele i loto ma faamoemoe.
O le faamatalaga lava lea o loo lealea pea, na mafua le sasao o le afi ona o fagu kesi na liki ma pāpā, sasao ma faasolo ai loa le mu. Sa leai ma se avanoa e faia ai se gaioiga, ona na amata sasao mai le afi i le fogafale pito i lalo ma agai atu ai i le fogafale lua.
E iai le talitonuga, ua sola manatu ma lagona ua leai se to‘a o le mafaufau, sa lei mafaufauina i le lē lava lea o se taimi e fai ai a latou gaioiga. Ina ua vaaia le sasao mai o le afi, na opoopo e si ona toalua si ana fanau ae pisi ia e tata‘e le faamalama ma tau‘ai momi i fafo ina ia tulioso i ai. Na fai atu i lona toalua e tulioso ae fai mai le fafine e oso muamua ia.
Ona o lona naunau e na te sapoina si ona toalua ma tamaiti o lea na lototele ai e oso, peitai e iai lona talitonuga ua ui lona toalua ma tamaiti i se isi itu e sao mai ai, ae ui i lea na ia iite lava i le mea ua tupu ma ua leai sona faamoemoega.
Na ia taumafai pea i le mafai e gata ai i se laveai peitai ua leai lava. Na saunoa Ieremia, sa sili ai ona oti ma ia nai lo le tulaga ua iai nei, o ia lava o se tagata ua gaogaoina, ina ua tuua na o ia.
O le isi alii Samoa o Misi Matauaina, o ona mātua o Malaga Lei‘aifaga ma Fiavaai Matauaina mai Samatau ma Saluafata, e mafuta foi ma le niece o le toalua o Faalafi Ieremia, si tamaitai lea o Annamalia, ma e toalua si a la fanau, ua maliliu uma foi ae o loo faasaoina pea Misi.
Ta‘ua e Misi, na fafagu o ia e Annamalia o lana paaga, ua ia faalogoina se nanamu o se kesi ae o le taimi lena o loo gase lana moe.
Na te‘i valevale a‘e i luga ma oso i fafo ma lona manatu ua maua se auala e o ai i fafo lona toalua ma nai tamaiti laiti nei e to‘a 2, ona ua matuā lē iloa se mea ua ta‘ai le asu i totonu o le fale ma pogisa atoa ai. Ae pagā lea, e oo atu i fafo e leai ma nisi ua oo atu.
O Tau, o le Faafeagaiga o se ekalesia Toga, o ia e ona le fale ma sa moe i lalo ona e tele ina moe ua leva le po i ana galuega. Na faalogoina e Tau le nanamu o le kesi ma taumafai loa e saili se laveai peitai ua fai sina tuai. Na ave Tau i le falemai i nai ona manu‘a mitimiti, ma na toe vave tea i tua.
O i latou ua maliliu e aofia ai: Annamalia Taufa (Toga 23yrs) ua maliuliu foi ma si ana fanau o Kahlani Matauaina (3yrs) & La’Haina Matauaina (6yrs).
O Ardelle Lee (15yrs) o lona tina o Treiice Taufa a o lona tamā o Vincent o le alo o Sonny O’Brian ma Thelma Lee o Malie ma Faleula. E lē o toe mafuta si ona alo o Vincent ma Treiice.
Ta‘ua i lipoti, o le tamaitai o Treiice Taufa, le tina o Ardelle, o le isi ana galuega part-time sa mafua ai ona faasaoina o ia i lea po mai le faalavelave, e galue i le Enchiro Screen Printing ma fesoasoani i le susuga ia Mika ma Dianne ma le tamaitai o Cathy Timoteo.
O le isi tina o Fusikalau Taufa (maliu), o le toalua lea o Tau (Toga) o laua nei e ona le fale sa faamautu ai Faalafi Ieremia ma lona toalua ma le fanau e toalima, e saili ai so latou fale.
O le faletua o Ieremia, o Neti Teukisia ua maliu faatasi ma si ana fanau o: Jerry Lale (tama 18yrs), Paul Lale (tama 17yrs), Lafoai Lale (teine 14yrs), Selamafi Lale (teine 10yrs), ma Richard Lale (tama 8yrs). O le taimi nei e lē o maua se to‘a o mafaufau o Ieremia, Misi ma Tau, na pau ia o tagata e toatolu na sao mai le fale na mu.
O le itu e faafetaia ai ma maua le mafanafana o Tau, Ieremia ma Misi faapea aiga faanoanoa, ona o le tele o fesoasoani ma le lagolago a le toatele o tagata mai soo se lanu, auā e lē gata ina faatumulia le nofoaga i teufugalaau, o meaalofa, ma faamafanafanaga aemaise o taumafa sa kukaina pea e le Salvation Army ma le tele o tagata loto fesoasoani.
E lagona foi e le tamaitai o Treiice Taufa lona agaga faafetai tele i ana uo mamae o ē o loo fesoasoani pea ma faamafanafana ia te ia i nei taimi matuitui o faanoanoaga, ona o le motusia faafuasei o le mafutaga ma si ona tina ia Fusi, si ana tama pele o Ardelle, si ona uso o Annamalia, si ona aunty o Neti, nai ona nephews, nieces ma cousins.
O le sauniga lotu foi i le po o le Aso Tofi, e lē faamatalaina le lava tapena ma le saunia lelei e le Logan City Council, e ala lea i le opogi malosi a le tamaitai pulenuu o Logan City, le tamaitai o Pam Parker.
Na matuā momoli le agaga faafetai o le susuga ia Tau Taufa i le tamaitai Palemia faasetete o Kuiniselani, Anna Bligh ma tagata uma ona o le tele o fesoasoani ma faamafanafanaga ua faamāmā avega i o latou loto mafatia.
O le susuga i le Peresitene o le Mafutaga a le Leo o Tagata Samoa ia Faimalo John Pale na lauina faamaisega ma faafeiloai faapitoa a le tamaitai Palemia faasetete o Kuniselani o Anna Bligh i lea sauniga.
Na fai sao foi le afioga ia Faimalo Faleiva Tau o le Peresitene a le Logan Samoa Advisory Council auā le sailia o nofoaga o tagata.
Na fai sao ai faafeagaiga Samoa i le sauniga tuufaatasi a o faatumulia le malae taalo (Logan Metro Sport Complex, i Browns Plains).
Na tiga ona fia afe tagata na molimauina le sauniga, peitai e lei taitai manifi ai le anoano o le taumafa; o nisi ia o tulaga e vaaia ai le agaga moni o le loto fesoasoani.
O le aoauli la o le Aso Faraile, na faamae‘a ai ona aveese mai tino maliu e toalua sa totoe ai o le tina e ona le fale ma si ana tama o Anamalia sa i totonu o le fale.
E tusia lenei ripoti e lē o mafai ona ma‘oti mai i le taimi nei se taimi o falelauasiga ma toe sauniga ona o loo faia pea suesuega a le matagaluega a le soifua maloloina ma leoleo.
O pusa maliu ma fanua e lagomau ai tino maliu uma o i latou nei faatasi ma le tele o tapenaga o le a faia lava e le Malo faasetete o Kuiniselani.
Atonu e avea foi lenei faalavelave e fai ma timaiga ma lapataiga ina ia mataala ma nofouta ai le tele o tagata i tulaga faapenei, e lē gata e siaki smoke alarms poo ola, ae ia mautinoa o sefe ma malupuipuia fagu kesi ina ia aua ne‘i liki, ma ia taumafai i latou e taumafa tapaa ina ia saili se paka ma se nofoaga mamao e te ulaula ai.
O i latou e faasuaavā faamolemole, afai e te tifa mai i le fale, e lelei ona e faaeteete e aua le kiina le ogaumu auā e te lē o silafia le taimi e nenefu ai lau channel ae talalī ai le fale.
O auli ma vaega uma e palaka, ia mautinoa ua tapē ma se‘i ese ma le palaka ina ia malupuipuia na vaega uma.
