Ua tu nei le Palemene o Samoa i se tulaga ua toe foi ai i tausaga amata o le Malo Tutoatasi sa leai ni vaega faaupufai ae tasi lava na o faipule o itumalo sa pisapisao i le maota fono i le fausina o atinae mo le manuia o le atunuu.
O le uiga o lea faamatalaga ona ua leai nei se Itu Agai ina ua mae‘a le palota sa feagai ma le atunuu i le faaiuga o lena vaiaso, ua na o le toatolu lava sui o le Tautua Samoa ua manumalo, toalua sui sa tauva tutoatasi ae 44 le HRPP.
E ui ina molali le taumafaiga a le Tautua Samoa i le malosi o sui tauva a le HRPP ua manumalo ma le toetoe maua uma e le HRPP le 49 o nofoa o le Palemene, ae lē o lotovaivai ai sui o le Tautua sa tulai mai i tofi faipule o le paeaiga ua tuanai, ae o loo galulue pea ina ia maua se fuainumera e fausia ai se itu faaupufai e agaia le faigamalo fou a le HRPP.
O se talanoaga ma le fefaaaliga o manatu ina ua mae‘a le palota ma feiloai atu i nisi o sui o le Tautua Samoa i lo latou nofoaga autu i Matautu-uta i Apia na faaalia ai e le afioga Afualo Woods Salele, e lei muta le latou galuega ona o le a iai ni tagi e faaulu i le faamasinoga faasaga i nisi o sui ua manumalo mai o le HRPP e mafua i solitulafono o faatosina na faatau ai le palota. Na saunoa Afualo o ia le isi sui e ave lana tagi ona o le tulaga sa ia molimauina faapea lana komiti e matautia le faatosina na faaalu ai tupe i lo latou itumalo o Salega i Sisifo.
O le faitau a Afualo e toatolu o latou sui na manumalo, o le afioga Aeau Peniamina mai Falealupo o le afioga Ili Setefano mai le itumalo o Aana Alofi Nu. 2, ma le afioga Olo Fiti Afoa Vaai poo le tofa Levaopolo Talatonu.
O Olo sa tauva o se sui tutoatasi ae o lana lagolago e pei ona faaalia e Afualo o loo tumau pea i le Tautua Samoa.
O le isi a latou sui sa tauva tutoatasi ua manumalo o le afioga Fuimaono Te‘o Samuelu mai le itumalo o Falealili i Sasa‘e. Na faailoa e le tusitala i le afioga Afualo o le sui tutoatasi lea ua ave lana lagolago i le HRPP ona sa vaaia i le tolauapiga a le HRPP i le Aso Toonai 5 o Mati ina ua mae‘a le palota.
E lei aumaia se finagalo o Afualo ae na o lana saunoaga e faapea e tailo la iai ae o le sui lea sa lagolagoina le Tautua Samoa a o sauni i le palota. O le tofa Pauli Ivan Williams o le isi lea sui tutoatasi e lagolago i le Tautua Samoa e pei ona faaalia e Afualo ma o lea ua manumalo mai le itumalo o Faasaleleaga Nu.1 i Sasae.
O le toe faitauina o palota a lea itumalo na toe maua ai se faaletonu i le faaopoopoina o palota ma maua ai e Pauli le manumalo ae o le sui tauva o le HRPP le afioga Sili Epa Tuioti sa palota silia i le po o le Aso Faraile ina ua mae‘a le faiga filifiliga a le atunuu.
Na vaaia lea sui i le tolauapiga a le HRPP i le taeao o le Aso Toonai a o lei toe maua le faaletonu i le fetuunaiga o palota ma iloa ai ua numera muamua Pauli Ivan Williams. Fai mai le afioga Afualo na fesootai atu i le tofa Pauli ae o lana tala atu ua mananao lana komiti e ave lana lagolago i le HRPP.
Peitai o loo ave i ai le tuualalo e onosai ona e tatau ona faamaopoopo se numera lelei o faipule e maua ai se Itu Agai. E valu faipule e manaomia e se vaega faaupufai ona faatoa aloaia lea i le Palemene.
O le a tatou tālia nei tapenaga uma a le Tautua Samoa, ae o le itu ua mautinoa ua mamao le manumalo o le HRPP.
