E ogaoga le silasila a le faamasinoga i le gaioiga na faia e le tina o Vaselisa Stowers, o lona sainia lea o pepa i luma o se loia e foliga ai o ia moni e ana le meatotino, ae o le fanua o le isi tagata.
O mafatiaga sa feagai ma le tina o Vaselisa Stowers ina ua tuua na o ia ma lana fanau e toafitu, ina ua alu lona toalua faaipoipo ua fai le isi ona toalua.
O le silasila lea a le faamasinoga i le tele o faigata sa feagai ma Vaselisa, i le taimi na saili ai mo se galuega e tausi ai lana fanau.
O lana galuega i se tasi o faletalimalo i Apia, na fetaui ai ma se tasi o tamalii sa fai se la faanunumi, pe sa faatino se la faigauo faaulugalii i se tulaga faapouliuli. Le mafutaga lea na mafua ai ona taunuu i se tulaga faaletonu le siosiomaga o Vaselisa, ina ua ia faasese faamaumauga o se fanua o se tasi o tagata o le aiga o lona toalua faaipoipo, lea na liliu ma tuu i ai le suafa o le tamalii sa la faanunumi, o le tofa Toluono Feti sa avea ma faipule o le Palemene.
E lua moliaga sa ioeina e le tina, o lona faia o se gaioiga na faaseseina faamaumauga o ni fasi fanua se lua.
O le tasi o fanua o se meatotino a Theresa Taufau Stowers, a o le isi fanua o se meatotino a Rosita Bourke.
I le lima tausaga le maualuga e mafai ai ona faafalepuipui se tagata e faamaonia lona faia o lea moliaga (forgery), na mamafa le silasila a le faamasinoga i aafiaga o Vaselisa ina ua aafia i lenei mataupu, lea sa la faia toalua ma le tofa Toluono Feti.
Ua na o le lua tausaga ua nofosala ai i le falepuipui mo moliaga uma e lua. Faaalia e le Faamasino Sili, ua ia talia le tautinoga a lē ua molia, ua lagona lona matuā salamō moni. O le faamatalaga a Vaselisa na tuuina atu i le ofisa faanofo vaavaaia, sa lilo i lona manatu e oo i se tulaga ogaoga le gaioiga na ia faia, auā o lana mau i le ofisa faanofo vaavaaia, o le tamalii sa la mafuta i se faigauo faapouliuli sa ia tauanauina o ia e saini i pepa o fanua ua mafua ai ona tulai i le faamasinoga.
E ui i lea tulaga na ia faaalia ma fofogaina i luma o le faamasinoga, ae na saunoa le Faamasino Sili, afioga Patu Tiavaasu‘e Falefatu Sapolu, e lē avea lea ma ‘alofaga o le matuia o le solitulafono.
O se taimi muamua foi lea ua molia ma faamaonia ai i luma o le faamasinoga se solitulafono tau faiga tau faasese i ni fanua i Samoa, e pei ona saunoa le Faamasino Sili.
O itu lelei mo Vaselisa o lona ioeina vave o moliaga, o lona lagolagoina o suesuega a leoleo, ma lona malie e molimau mo le itu a leoleo faasaga i le tamalii o loo tuuaia foi i lenei lava mataupu. O le masina o Me o le tausaga nei e suesueina ai moliaga e 15 o Toluono Feti.
O itu lelei foi ia na mafua ai ona toesea nisi o tausaga ma masina o lona faasalaga na amata i le 3 tausaga ma le ono masina. O le taitasi o tausaga faafalepuipui mo le moliaga e tasi ua tuli eseese e pei ona saunoa le Faamasino Sili.
Ua mafua ona o le matuia o le solitulafono, ma o lona uiga e lua tausaga atoatoa o le nofosala ai Vaselisa Stowers i le falepuipui i Tafaigata.
O le ogaoga o le gaioiga na faia e Vaselisa i lona sainia o pepa o fanua o Taufau Stowers ma Rosita Bourke, ua aafia ai le tina o Terisa Taufau i le gasegase o le stroke poo le pē itutasi o le tino.
E lē o iloa pe mafai ona faafoi le fanua o lea tina lea ua umia e Toluono ma o loo faamauina o se mokesi mo le nonogatupe a lea tamalii i se tasi o faletupe i Apia.
