Ofo le Malo e totogi faiaoga mo fanau ua sauaina

“O au o mātua fanau”, ma o se fuaitau e lē mafai ona sese pe a fua i le tiute o matua i le vaaia ma le tausiga o fanau.
Peitai o nisi o fanau a le atunuu ua lē maua le avanoa o loo maua e le toatele o fanau o le saolotoga e ulufale ai i aoaoga ma ola saoloto ma fiafia.
E mafua ona o nisi ua aafia le mafaufau mu‘amu‘a a o tuputupu a‘e ona o sauaga ma faiga solitulafono a nisi, aemaise o le toatele lava o fanau ua toe sauaina e o latou mātua e pei o o latou tamā.
O fanau ia o loo nonofo i le apitaga ua saunia e le faalapotiopotoga o le Toomaga mo ē Puapuagatia, ona ua lē mafai ona toe tuu atu i o latou lava aiga ona o faaeteetega ile  toe aafia i sauaga ma faiga solitulafono sa faia iai.
O le vaai alofa o le faalapotopotoga ile afaina o le sologa lelei olo latou tuputupu a’e ile itu tau a’oa’oga na amata ai ona faatino se a’oga moi latou, lea sa faaoga ai potu tuai o le fale faamasino i Apia.
Peitai e lei atoa se tausaga talu ona faaaogā ia potu, ae maua loa le fesoasoani o se Samaria agalelei mai Ausetalia ua na faatupe atoa le fausia o se faleaoga fou i tafatafa ane lava o le apitaga o loo nonofo ai nei fanau e silia i le onosefulu.
O se alii papalagi o se milionea na ia ofo se tupe e silia i le faselau afe mo le galuega, toe faatupe ai ma totoga o mea e faaaogā mo le aoaoina o nei fanau.
O le faafetai leotele lea a le taitai o le Malo le afioga ile palemia i lana saunoaga na tatala aloaia ai lea falea’oga e fa ona potu ile faaiuga o le vaiaso na tea nei.
Na toe faamamafa ai e le alii palemia susuga Tuila’epa Lupesoliai Sailele Malielegaoi, le naunau o le Malo e lagolago i le Toomaga ma ana galuega mo nei fanau, e pei ona tuuina iai le fanua e lua eka lona tele ua iai nei le apitaga ma le faleaoga.
Na saunoa le palemia ma ia toe faapupula le afaina o nei fanau ona o faiga solitulafono, ma e ao ai i le Malo ona tapu‘e fesoasoani faapenei mo le mautinoa ia maua e ia fanau a le atunuu ni aoaoga lelei o latou lumanai manuia.
O le falea‘oga ua tatalaina o le a galulue ai ni faiaoga o le a totogi uma e le Malo. O lea fesoasoani na faailoa e le Palemia i lana saunoaga autū ma o se fiafiaga foi lea i le tamaitai pelesetene o le Toomaga le faletua o Lina Chang.
O loo iai le talitonuga o le a faaopoopo le numela o fanau e aoaoina i le aoga o le School of Hope, ona e lē o faaitiitia mataupu tau solitulafono e aafia ai le fanau o loo faatoa‘i atu i le Toomaga ma faia i ai suesuega a leoleo.