I le tauvaga o le sailia o se taleni uigaese i Ausetalia o loo faagasolo nei (Australia’s Got Talent), na matuā silamio le atunuu nei ina ua toe pese le alo o Samoa o Mark Lowndes i sana pese fatu (original) i le vaiaso na tea nei.
O lenei tauvaga e faamasino ai taleni eseese e pei o le siva, pese, faapea togafiti faamaneta. O le taimi la na toe pese ai Mark i luga o le ala ata iva poo le Channel Nine, na to ai pulou o alii faamasino lauiloa ia Kyle Sandilands o le Today FM, Brian McFadden o le aufaipese iloga o le Westlife ma le tamaitai faamasino ia Danii Minogue.
Sa pese Mark Lowndes ae lagolago i ai se faaili atoa ma o lenei avanoa na maua ai lona tomai e lē maua e isi tagata pese i le tauvaga lea e ta e CD a latou taumafaiga.
Na iloa gofie o se alo o Samoa Mark i le ata o lana taulima Samoa e pei ona laei ai le toatele o isi tamafanau a le atunuu o loo soifua i atunuu i fafo nei. Na faaali mai foi ma si ona toalua ma nai ona afafine laiti e toalua le tausaafia o lenei alo.
O le tuaa o Mark Lowndes o se alii palagi mai Farani ma lona tina Samoa. Sa ia usu lana pese ‘This Girl’ na ia fatu ma ta lana kitara ae peitai o le faalogo a le toatele o lenei pese e pei o se pese ua leva ona faalogologo i ai tagata i le lelei o upu faapea lona fati.
O le alii faamasino faamalie gata ia Kyle Sandilands na matuā sii lona aao ma ia momoli lana faamalo ia Mark Lowndes “O se tasi o a‘u galuega e faia o le faailoa lea o pese ou te lagona e avea ma numera tasi i le lalolagi ma na ou lagona mai lava i le amataga o lau pese lea na usuina o le a avea ma Pese iloga” Na sosoo ai ma le faailoa e le alii Faamasino ia Brian Mcfadden lona maofa tele i le taleni a lenei alo o Samoa “O mea uma lava na e pese ai ua matuā talitonu i ai le aofia i lenei po!!
O lau pese lena na fatu o se numera tasi e pei oe o John Mayer o Ausetalia!!! ma e pei lava o lea sa matou molimauina sau koneseti”.
O le faamasino mulimuli le tamaitai ia Danii Minogue sa saunoa “Ausetalia!! O lea faatoa maua la tatou Mr Soulman! ma o se taleni o le a fiafia i ai le lalolagi.”
E le taumate o le a lagolago foi tagata Samoa i Ausetalia nei e palota mo lenei alo talenia ua tauleleia ai Samoa i Ausetalia nei faatasi ai ma ana paaga ua faafofoga ma fiafia i lana taleni.
