O taimi e tutupu ai mala faalenatura e pei o mafuie, afā, tafega ma lologa ma galulolo poo sunami, e tasi lava le tulaga e muamua silasila i ai se Malo, o tupe e toe fausia ai mea ua faaleagaina.
O atunuu e vaivai tamaoaiga e pei o Samoa, e le gafatia e ana tupe maua ona faatupe ni alatetele e afaina i se mala faalenatura faapea isi vaega.
O le autu lea o se fuafuaga ua faataoto e le Malo o Iapani, o le Faletupe o le Lalolagi, ma le nofoaga autu o polokalame fesoasoani mo atunuu o le Pasefika le SPC (Secretariat of the Pacific Community), e faatino se polokalame tau inisiua mo atunuu laiti e vaivai tamaoaiga ina ia mafai ona maua ai se toomaga tau tupe e tua i ai i taimi o mala faalenatura.
O Samoa, Tonga ma le Atu Solomona faapea Vanuatu ua muamua aofia i lea polokalame tau inisiua ua faaigoaina o le Pilot Catastrophe Risk Insurance Programme, sa faalauiloa pe launch i le faaiuga o le vaiaso ua tuanai.
E valu atunuu o le Pasefika o loo pito maualuga lo latou tulaga i le itu i tupe alu maumau i le faatulaga o atunuu e luasefulu o le lalolagi, e mafua ona o meatotino e faaleagaina i mala faalenatura.
O Samoa le isi atunuu o le toavalu lea. Faaalia e le Minisita o Tupe a le malo o Tonga o Lisiate Akolo, ua silafia uma le tulaga ogaoga o tulaga tau tupe pe a aafia se atunuu i ni mafatiaga mai ni mala faalenatura ma o le a avea le fuafuaga ua faataoto nei i le polokalame tau inisiua o le a mafai ona vave maua ai se fesoasoani tau tupe e atunuu mo le faaleleia o meatotino e faaleagaina.
O le afa o Eveni ma isi afa ua mavae aemaise o lologa ma tafega na aafia ai Samoa, sa molimauina o le tele o aiga e afaina meatotino e pei o fale, e leai ni inisiua.
O le tulaga foi lea na iloa i fale ma taavale faapea isi meatotino a aiga na afaina i le malosi o lologa ma tafega i le taimi o le afā o Eveni.
O le Malo lava ia o Samoa o lea faatoa ofi i se polokalame ua faavaeina nei e maua ai se toomaga mai seleni o inisiua mo le toe faaleleia o alatetele, eletise ma le suavai pe a faaleagaina i mala faalenatura, auā ua iloa ma mautinoa o vaega lava ia e muamua afaina ma aafia ai loa le tulaga solo lelei o le maua pea o ia auaunaga e tagata lautele.
O le polokalame inisiua foi ua faavaeina nei o le a vave toe foi ai le sologa lelei o tamaoaiga o atunuu i se tulaga lelei pe a mae‘a ni mala faalenatura. O le feagaiga e ta‘ua o le Sendai Dialogue na sainia e le Malo o Iapani ua auala ai lona fia avea ma se tasi o itutino e faavaeina le polokalame e avea ma se isi ana fesoasoani mo atunuu o le Pasefika e aafia i ni afā, lologa ma tafega faapea mafuie ma sunami.
O Iapani foi o se tasi o paaga lelei a atunuu o le Pasefika e pei o Samoa ma ua tele foi ana fesoasoani i le tamaoaiga o lo tatou atunuu.
