A taunuu se faamoemoe, fai se taulaga faafetai i le Alii e pei ona masani ai le masina o Novema i tausaga uma e tusa ma faigataulaga a le Ekalesia Metotisi Aoao i lea faasinoti ma lea faasinoti. O le Aso Toonai na se‘i mavae atu nei sa faataunuuina ai le faigataulaga a le faleono o aulotu i le sinoti i Niu Sila i Saute, lea e amata mai le matagaluega i Invercargill (Rev Masele Tolai), Dunedin (Rev Fiaalii Pese), Ashburton (Rev Leauma Faalafi), Halswell (Rev Poasa Leaupepe), Addington (Rev Neru Tiatia) ma Kalaiesetete (Rev Ale Palelei).
O se uluai taimi ua faatasia ai aulotu nei e 6 i se nofoaga e tasi mo le latou faiga Me, pei ona ofaga potopoto ai i le malumalu o le matagaluega i Kalaiesetete, sa masani ona tuufaatasi Dunedin ma Invercargill, faapea foi aulotu vavalalata i le aai o Kalaiesetete, ae ua manatu se‘i fai foi se suiga i lenei tausaga.
O le sauniga amata o le lotu faafetai sa taitaia e le susuga i le sea o le faasinoti, Rev Savaii Loto mai Ueligitone ma ia saunoa faalaeiau mo le taulaga faafetai i le Atua, o le tali faaeaea ia te Ia e tusa ma lona alofa, o le taulaga foi e faia ma le loto saoloto, loto fiafia, loto malie, loto momomo ma le loto ua lē toe faalotolotolua.
Matagofie le tapenaina o viiga o le Atua saunia e aulotu, o aso faapenei e matuā faaiila ai taleni musika ma siufofoga mālie aemaise le pao o nota eseese, o i foi e iloga ai le tagata sa toaga ma le tagata faiaga ae o le itu tāua o le ave faatasi o le faafetai i le Atua e ala i le taulaga pese. I le mae‘a ai o le sauniga lotu ona alo lea i le lafoina o taulaga a aulotu e ala i matafale tusia, o aiga fesoasoani, aemaise lala eseese pei o le ‘Auso a tina, aoga aso sa, aufaipese ma le autalavou faatasi ai ma sē ua mu lona loto i le fia faitaulaga i lea aso faitauina o le ekalesia.
O le uluai faigataulaga lea a le matagaluega fou o Ashburton, o le uluai faigataulaga foi lenei a le susuga Neru Tiatia i totonu o lana matagaluega i Addington ina ua siitia mai Vaivase-uta. E taga eseese lea aso matagofie i le tauaaoina o taulaga a nai aiga, maitauina le sagisagi mai o nai faletua malolo ma nai tina i le faaulaina o le ofisa o le faiga Me, aemaise le sisiva fiafia o tagata i le lafoina o latou taulaga.
O foliga fiafia ia o le tagata faitaulaga ua foai ma le lotomalie, e oo lava i susuga i tausi matagaluega o Neru Tiatia ma Poasa Leaupepe na matuā faaalia i lea aso le vaivai o la nota musika.
O le failautusi o le sinoti, Rev Kolani mai Pamasetone sa tolaulauina le ma‘au faitaulaga o matagaluega taitasi ma o le aofai o le faigataulaga a le faleono na sasaoina e $73,560.80. Na saunoa faafetai le susuga i le Sea, Rev Savaii Loto ma ia faapea ane “Faafetai i le Atua mo mea uma ua faia ma foai e le faleono, ia faamanuia foi le Atua i le taulaga, ua outou matitiva ona o le taulaga, ave ma le loto malie ma le loto talitonu, o oe nei, taeao le Atua”.
Na alo atu i le taumafataga fiafia ina ua mae‘a faigataulaga, faasolo atu le polokalama i fuafuaga masani mo le ofisa aufai Me pei ona alo i ai le faleono mo faaaloaloga, lea sa avea ai le fetalaiga Taumai Leoo e fai ma lauama tootoo o le aso. Na faaiuina le faamoemoe i le saunoaga mulimuli ma le tatalo saunia e le susuga i le sea o le sinoti, lululima ma faatofa ina ua iu atu i le Atua Lona lava viiga.
